رواں سال جولائی میں پیش کی جانے والی ہونڈا سِوک نے گاڑیوں کے شوقین افراد کو کئی نئے رنگوں سے بھی متعارف کروایا۔ پچھلی جنریشن کے مقابلے میں دسویں جنریشن سوک (Civic) کو بالکل مختلف اور دلکش رنگوں کے ساتھ پیش کیا گیا۔ ان میں جاذب نظر ریلے ریڈ (سرخ) اور لونار سِلور (نقرئی) کی شمولیت سب سے زیادہ قابل ذکر ہے جنہیں نویں جنریشن میں پیش کیے جانے والے شوخ قرمزی (Red) اور سنگ مر مر (Silver) رنگ کی جگہ شامل کیا گیا ہے۔ اس کے علاوہ ہونڈا سِوک 2016 کی فہرست میں شوخ نیلے رنگ (Blue) کی شمولیت سے دستیاب رنگوں کی مجموعی تعداد 7 تک پہنچ چکی ہے۔
ہونڈا سوک میں پیش کیے جانے والے نئے رنگوں کی پزیرائی کو دیکھتے ہوئے ہونڈا سِٹی کو بھی ان خوبصورت رنگوں کے ساتھ پیش کرنے کا فیصلہ کیا ہے۔ اگر آپ بھی ان لوگوں میں سے ہیں کہ جنہیں چمکیلے و ہلکے خاکی (Beige) رنگ میں ہونڈا سِٹی کا دلکش انداز بہت بھاتا ہے تو آپ کے لیے افسوسناک خبر یہ ہے کہ اب ہونڈا پاکستان نے سِٹی میں اب یہ رنگ دستیاب نہیں ہے۔ سادے لفظوں میں اس کا مطلب یہ ہے کہ جہاں سِوک میں ایک نئے رنگ کا اضافہ ہوا وہیں سٹی میں ایک رنگ کم کردیا گیا ہے۔
یہ بھی پڑھیں: ہونڈا سِوک 2016 کے تینوں ماڈلز کا تفصیلی جائزہ
ہونڈا ایٹلس نے منفرد قرمزی (سرخ) رنگ میں پیش کی جانے والی سِوک ٹربو (Civic Turbo) کو بہترین ماڈل کے طور پر پیش کیا تو تمام ہی شائقین نے اسے بے حد سراہا۔ اس سے قبل کہ ہم کوئی اور فرمائش کرتے ہونڈا ایٹلس نے اس خوبصورت اور دلکش رنگ کو سٹی میں بھی پیش کرنے کا فیصلہ کیا ہے۔ یوں اب ہونڈا سٹی پرانے قرمزی اور سنگ مر مر جیسے پرانے رنگوں کی جگہ سِوک ہی کے منفرد ریلے ریڈ (سرخ) اور لونار سِلور (نقرئی) رنگوں میں پیش کی جائے گی۔ یاد رہے کہ یہ ان دلفریب رنگوں کو پاکستان میں پیش کی جانے والی دسویں جنریشن ہونڈا سِوک کے ساتھ ہی متعارف کروایا گیا تھا۔
یہ بھی پڑھیں: گاڑیوں کے مشہور رنگ؛ ماضی کی خوبصورتی آج ماند پڑ چکی ہے!
ہونڈا سٹی (City) کی نئے رنگوں میں دستیابی سے اب ہونڈا ایٹلس کی دونوں سیڈان گاڑیوں میں کسی حد تک مماثلت پیدا ہوگئی ہے۔ کیا آپ سمجھتے ہیں کہ پرانی جنریشن ہونڈا سٹی کو نئے رنگوں میں پیش کر نے کا فیصلہ ٹھیک ہے؟ ہمیں اپنی رائے سے بذریعہ تبصرہ آگاہ کریں۔
