حال ہی میں ہونڈا سوک ٹائپ آر 2019ء برطانیہ کی سڑکوں پر نظر آئی ہے جس کے کچھ حصے ماسکنگ ٹیپ لگا کر چھپائے گئے تھے۔ ادارے نئی گاڑیوں کی ہمہ وقت جانچ کرتی رہتی ہیں لیکن اس بارے میں دلچسپ بات یہ ہے کہ اس 2019ء ٹائپ آر کو بہتر بنانے کا فیصلہ اس کے اجراء کے محض چند سال میں کرلیا گیا۔ سامنے کے حصے پر لگا ماسکنگ ٹیپ صاف ظاہر کرتا ہے کہ ہونڈا نے نئی سوک 2019ء ٹائپ آر کے فرنٹ پر تبدیلیاں کی ہیں۔ یہی نہیں بلکہ پچھلا بمپر بھی ماسنگ شیٹ میں ڈھکا ہوا ہے۔
لیکن میرے خیال میں یہ کہنا بہتر ہوگا کہ صرف اگلے اور پچھلے بمپرز ہی ہیں جن پر کچھ نئی تبدیلیاں آئیں گی اور لائٹیں بدستور ویسی ہی رہیں گی۔ آپ سامنے کے رخ پر بمپر سے اندازہ لگا سکتے ہیں کہ درمیان میں موجود جالی کچھ بڑی ہے۔ پھر فرنٹ بمپر کے سائیڈ وینٹس بھی موجودہ ماڈل سے مختلف نظر آ رہے ہیں۔ پچھلا بمپر بھی ری-ڈیزائن کے کچھ اشارے ظاہر کرتا ہے۔
ٹائپ آر سوک 2019ء کے انٹیریئر کی کوئی خفیہ تصاویر نہیں، لیکن یہ کہا جا سکتا ہے کہ انٹیریئر بھی تقریباً ویسا ہی ہوگا۔ انجن بھی وہی 2.0-لیٹر ٹربوچارجڈ پٹرول یونٹ ہوگا البتہ ہونڈا کے انجینیئرز سے آپ توقع رکھ سکتے ہیں کہ انہوں نے کارکردگی کو کچھ بہتر بنایا ہوگا۔
ہونڈا سوک کے عام صارفین کو یہ دیکھنے کی ضرورت ہوگی کہ یہ اپڈیٹ عام سوک 2019ء میں بھی دستیاب ہوگا، اور اگر ہوتا ہے تو کیا یہ پاکستان میں آئے گا؟ پھر لوگ اب بھی حیران ہیں کہ مستقبل میں پاکستان میں ٹربو ہونڈا سوکس پیش ہونے جا رہی ہیں یا نہیں۔ آئل کمپنیاں پیٹرول میں مینگنیس مادّے کو محدود کرنے کے خلاف مزاحمت کر رہی ہیں اور یہ حکام کے روبرو ہونڈا پاکستان کے اٹھائے گئے اعتراضات میں سے ایک ہے۔
