گزشتہ روز ٹویوٹا پرایوس کے برقی پارکنگ بریکس میں خرابی کی خبر سامنے آنے کے بعد گاڑیاں تیار کرنے والے جاپانی ادارے ہونڈا نے بھی دسویں جنریشن ہونڈا سِوک کے الیکٹرانک پارکنگ بریکس (EPB) میں خرابی کا اعتراف کرلیا ہے۔ ہونڈا کی جانب سے جاری تازہ اعلامیے میں کہا گیا ہے کہ وہیکل اسٹیبلٹی کنٹرول یونٹ برقی، انجن بند کرنے کے فوراً بعد، پارکنگ بریکس کی کارکردگی کو متاثر کرسکتا ہے۔ برقی پارکنگ بریکس کی کارکردگی متاثر ہونے سے گاڑی ازخود چلنے کے امکانات بڑھ جاتے ہیں جس سے نقصان کا اندیشہ ہے۔ جاپانی ادارے کے مطابق اب تک اس مسئلے کی وجہ سے کسی قسم کے حادثے یا نقصان کی کوئی اطلاع موصول نہیں ہوئی۔
یہ مسئلہ اس وقت سامنے آیا کہ جب سِوک کے متعدد مالکان نے ہونڈا ڈیلرشپس پر رابطہ کر کے برقی پارکنگ بریکس کی فعالیت سے متعلق شکایات درج کروائیں۔ ان مالکان کا کہنا تھا کہ کئی مرتبہ پارکنگ بریک لگانے اور کلسٹر پر اس کے فعال ہونے کی لائٹ روشن ہونے کے باوجود پارکنگ بریکس غیر فعال ہی رہے۔ یہ مسئلہ دراصل وہیکل اسٹیبلٹی اسِسٹ الیکٹرانک کنٹرول یونٹ کے سافٹویئر میں خرابی کی وجہ سے ہورہا ہے جو انجن بند ہوجانے کے بعد برقی پارکنگ بریکس کی فعال ہونے سے روک رہا ہے۔ یاد رہے کہ ہونڈا کی جانب سے امریکا میں اب تک ساڑھے تین لاکھ سے زائد ہونڈا سِوک (سیڈان اور کوپے) فروخت کی جاچکی ہیں اور امکان یہی ہے کہ اب تک صارفین کو فراہم کی جانے والی تمام سِوک X میں یہ مسئلہ موجود ہے۔ ہونڈا شمالی امریکا کی جانب سے سِوک کے تمام خریداروں کو فی الفور ڈیلرشپس سے رجوع کرنے اور برقی کنٹرول یونٹ (ECU) کا سافٹویئر اپڈیٹ کروا کر اس ممکنہ مسئلے کو دور کرنے کی درخواست کی گئی ہے۔
یہ بھی پڑھیں: ہونڈا ایٹلس کی مسلسل خاموشی؛ ہونڈا سِوک کے مداح کشمکش کا شکار
ایشیائی ممالک میں پیش کی جانے والی ہونڈا سِوک میں اب تک ایسی کسی بھی قسم کی خرابی یا مسئلہ کی شکایات منظر عام پر نہیں آئی۔ تاہم ضروری ہے کہ ہونڈا سِوک خریدنے والے تمام افراد اپنی گاڑی میں شامل برقی سہولیات کی کارکردگی کا بغور جائزہ لیں اور یہ بھی دیکھیں کہ آیا انجن بند کرنے کے بعد برقی پارکنگ بریکس درست طریقے سے کام کر رہے ہیں یا نہیں۔ اس ضمن میں کسی بھی قسم کا مسئلہ یا پریشانی درپیش ہونے کی صورت میں مقامی ہونڈا ڈیلرشپس سے رابطہ کریں۔
