شہر قائد میں ڈرائیونگ لائسنس دو طرح کے ہوتے ہیں۔ ایک وہ جو حکومت پاکستان کی طرف سے جاری کیا جاتا ہے اور اس پر آپ کی معلومات مع تصویر شامل ہوتی ہے۔ اور دوسرا مختلف رنگوں میں دستیاب ہے ، اس پر ایک جانب بانی پاکستان کی تصویر اور دوسری جانب “حصول رزق حلال عین عبادت ہے” لکھا ہوا ہوتا ہے۔ اس سے بھی زیادہ افسوسناک بات یہ ہے کہ دوسری قسم کا لائسنس صرف کراچی ہی نہیں بلکہ پورے میں باآسانی چلایا جاسکتا ہے۔
پچھلے دونوں ایک رپورٹ سے علم ہوا کہ کراچی میں 90 فیصد گاڑیاں چلانے والوں کے پاس لائسنس موجود نہیں۔ اس کی بہت سی وجوہات ہیں جن میں لائسنس کے حصول کا مشکل طریقہ کار بھی شامل ہے۔ لیکن اس کا یہ مطلب ہرگز نہیں کہ ناجائز کام کا دفاع کیا جائے اور لوگ لائسنس کے حصول کی کوشش ہی نہ کریں۔ ایک معزز اور ذمہ دار شہری ہونے کی حیثیت سے ہمارے لیے ضروری ہے کہ وہ قانون کی پاسداری کرے اور ہر اس کام پر پورا عمل کرے جس کے لیے قانونی طریقہ کار موجود ہے۔ چاہے وہ کام قانونی طریقہ کار سے مشکل اور غیر قانونی طریقہ سے بہت آسان ہی کیوں نہ ہو۔اگر تمام شہری قوانین پر عمل کریں تو ٹریفک کی بدنظمی، چوری کے واقعات اور حادثات میں خاطرخواہ کمی لائی جاسکتی ہے۔
لائسنس کی درخواست دینے سے پہلے اگر آپ اس کے حصول سے متعلق معلومات حاصل کرلیں تو اگلے تمام مراحل باآسانی طے کرسکیں گے۔ سب سے پہلے یہ جان لیں کہ ڈرائیونگ لائسنس تین طرح کے ہوتے ہیں اور ہم اس کے متعلق مفصل معلومات اس مضمون میں فراہم کر رہے ہیں۔ لیکن مزید تفصیلات میں جانے سے پہلے یہ جاننا بھی ضروری ہے کہ گاڑیوں، موٹر سائیکلوں، رکشا یا مال بردار ٹرک کے لیے آپ کو علیحدہ اجازت نامے کی ضرورت ہوسکتی ہے۔ یعنی اگر آپ کے پاس موٹر سائیکل چلانے کا لائسنس موجود ہے تو آپ کو ٹرک چلانے کے لیے علیحدہ لائسنس درکار ہوگا کیوں کہ ان دونوں سواریوں میں زمین و آسمان کا فرق ہے۔
متعلمین کے لیے ڈرائیونگ لائسنس (Learner Driving License)
چاہے آپ گاڑی چلانے میں زبردست مہارت رکھتے ہوں یا آپ کے پاس انتہائی مہنگی گاڑی ہو، سب سے پہلے لرنر ڈرائیونگ لائسنس لینا ہی ہوگا۔ یہ لائسنس ایک سال کے لیے حاصل کیا جاسکتا ہے۔ اندراج کرواتے ہوئے آپ کو کمپیوٹرائزڈ قومی شناختی کارڈ کی نقل اور پاسپورٹ سائز کی چار تصاویر درکار ہوں گی۔ موٹر سائیکل کے لیے لائسنس کی فیس 50 روپے ہے جبکہ گاڑی کے لیے 100 روپے۔ اگر دونوں طرز کی سواریوں کے لیے لرنر ڈرائیونگ لائسنس لینا چاہیں تو 150 روپے ادا کرنے ہوں گے۔ اس لائسنس کی معیاد ایک سال ہوتی ہے اور تجدید کروانے کے لیے 100 روپے فیس ادا کرنی ہوگی۔
مستقل ڈرائیونگ لائسنس (Permanent Driving License)
اول الذکر ‘لرنر ڈرائیونگ لائسنس’ حاصل کرنے کے 42 روز بعد آپ مستقل ڈرائیونگ لائسنس (جسے پکا لائسنس بھی کہا جاتا ہے) حاصل کرسکتے ہیں۔ لیکن اس کا طریقہ اتنا سہل نہیں کہ جتنا لرنر ڈرائیونگ لائسنس کا ہے لہٰذا بہتر ہوگا کہ آپ آگے آنے والے موضوعات کو بغور پڑھیں اور اس ڈرائیونگ لائسنس کے لیے درخواست دینے سے قبل مکمل تیاری کرلیں۔
ڈرائیور کی قابلیت اور معلومات کا امتحان
کراچی میں پکا ڈرائیونگ لائسنس لینے کے لیے آپ کو تحریری اور عملی دونوں امتحانات میں کامیابی حاصل کرنا ہوگی۔ اس دوران ڈرائیور کی ختلف صلاحیتوں کو بھی جانچا جاتا ہے جیسے دور اور نزدیک کی بصارت (نظر) کے علاوہ جسم کے دیگر اعضاء کی فعالیت دیکھی جاتی ہے۔
یہ لائسنس کم از کم 3 سال اور زیادہ سے زیادہ 5 سال تک کے لیے جاری کیا جاتا ہے۔ درخواست کے ساتھ آپ کو کمپیوٹرائزڈ قومی شناختی کارڈ کی نقل اور پاسپورٹ سائز کی چار تصاویر جمع کروانی ہوں گی۔ موٹر سائیکل کے لیے لائسنس کا معاوضہ 510 روپے برائے 3 سال اور 660 روپے برائے 5 سال ہے۔ البتہ گاڑی چلانے کے لیے لائسنس کا معاوضہ 960 روپے برائے 3 سال اور 1260 روپے برائے 5 سال ہے۔
معیاد ختم ہوجانے کے بعد لائسنس کی تجدید کروانا لازمی ہے ورنہ آپ گاڑی یا موٹر سائیکل چلانے کے اہل نہیں رہیں گے۔ لائسنس کی تجدید کے لیے علیحدہ درخواست دینی ہوگی اور اس کا معاوضہ بھی ادا کرنا ہوگا۔ درخواست فارم اس ربط سے بالکل مفت ڈاؤن لوڈ کر کے پرنٹ کیے جاسکتے ہیں ۔ اگر آپ کے پاس یہ سہوت موجود نہیں تو یہ فارم متعلقہ محکمے کے دفاتر سے 20 روپے میں مل جائے گا۔ اگر آپ تصاویر ساتھ نہیں لائے تو محکمہ ٹریفک پولیس کے منتخب مراکز میں تصاویر اتارنے کی سہولت بھی موجود ہے لیکن اس کا 100 روپے دینا ہوگا۔
اس ڈرائیونگ لائسنس کے حصولی کی درخواست سے پہلے بہتر ہوگا کہ آپ ہائی وے اور موٹر کوڈ کی کتابیں ضرور پڑھیں۔ ان کتابوں میں ٹریفک قوانین کی مکمل معلومات شامل ہیں جو تحریری امتحان کی تیاری میں آپ کے لیے مددگار ثابت ہوں گی۔ اس ربط سے انگریزی اور اس ربط سے اردو میں یہ کتابیں بھی بالکل مفت ڈاؤن لوڈ کی جاسکتی ہیں۔ محکمہ ٹریفک پولیس کے منتخب ڈاک خانوں سے بھی یہ کتابیں معمولی قیمت پر حاصل کی جاسکتی ہیں۔
بین الاقوامی ڈرائیونگ پَرمِٹ (International Driving Permit)
اگر آپ چھٹیاں گزارنے یا سیر و تفریح کی غرض سے بیرون مالک جا رہے ہوں اور وہاں گاڑی ڈرائیو کرنی ہوتو اس کے لیے بین الاقوامی ڈرائیونگ پَرمِٹ حاصل کرنا ہوگا۔ یہ دراصل ایک اجازت نامہ ہے کہ جسے آپ پاکستان کے علاوہ کسی دوسرے ملک میں ڈرائیونگ لائسنس کے حصول تک استعمال کرسکتے ہیں۔ یہ اجازت نامہ حاصل کرنے کے لیے آپ کو درخواست کے ساتھ کمپیوٹرائزڈ قومی شناختی کارڈ، ویزا اور قومی ڈرائیونگ لائسنس کی نقل فراہم کرنا ہوگی۔ علاوہ ازیں طبی سرٹیفکیٹ (Medical Certificate) بھی درکار ہوگا۔ درخواست گزار کے لیے ضروری ہے کہ وہ متعلقہ محکمہ میں بذات خود پیش ہو کر عرضی جمع کروائے۔ اس پَرمِٹ کا معاضہ حتمی نہیں۔
ڈرائیونگ لائسنس حاصل کرنے کے مراکز
کراچی میں ٹریفک پولیس کے محکمے نے لائسنس جاری کرنے کے لیے چار مراکز قائم کیے ہیں جو صبح 9 تا شام 4 بجے تک کام کرتے ہیں۔ یہ مراکز جمعہ کے روز نصف اوقات یعنی صبح 9 تا دوپہر 12:30 تک کھلے رہتے ہیں جبکہ اتوار کے روز ہفتہ وار تعطیل ہوتی ہے۔ ان مراکز کی معلومات مع نقشہ درج ذیل ہیں:
1۔ کلفٹن شاخ، نزد موہاٹا پیلس اور دو تلوار (نقشہ دیکھیں)
2۔ کورنگی شاخ، مہران ٹاؤن (نقشہ دیکھیں)
3۔ بلدیہ ٹاؤن شاخ، نزد حب چوکی (نقشہ دیکھیں)
4۔ ناظم آباد شاخ، ناظم آباد نمبر 4، کالٹیکس پیٹرول پمپ (نقشہ دیکھیں)
ڈرائیونگ لائسنس کے حصول میں بعض افراد رشوت اور تعلقات کا استعمال کرنا چاہیں تو وہ ان کی صوابدید پر ہے۔ ہم تمام غیر اخلاقی اور خلاف قانون اقدامات سے پرہیز کا مشورہ دیں گے۔ یاد رہے کہ یہاں فراہم کی گئی معلومات ہماری تحقیق کا نتیجہ ہے اور مستقبل میں متعلقہ محکموں کی جانب سے معاوضے یا طریقہ کار میں تبدیلی کی جاسکتی ہے۔ ہماری کوشش ہوگی کہ اپنے قارئین کو بنیادی تبدیلیوں سے آگاہ کرسکیں۔
