پاکستانی آٹوموٹیو شعبے میں شاذ و نادر ہی کوئی نیا نام نظر آتا ہے۔ اس کی بنیادی یہ مشہور خیال ہے کہ یہاں چند ایک مقامی کار ساز اداروں کی اجارہ داری ہے اور یہاں کوئی نیا ادارہ زیادہ دیر نہیں ٹک سکتا۔ تاہم ایچ آر ایل (حبیب رفیق گروپ) اس خیال کو غلط ثابت کرنے کے لیے پُرامید ہے اور انہوں نے چین میں تیار شدہ گاڑی “زوتیے Z100” کو پاکستان میں متعارف کروا کر اس کی عملی مثا بھی پیش کردی ہے۔
پہلی نظر میں اگر آپ زوتیے Z100 کو سوزوکی آلٹو کی ہم شکل محسوس کر رہے ہیں تو آپ کی نظر قابل تعریف ہے۔ زوتیے Z100 درحقیقت سوزوکی آلٹو کی ساتویں جنریشن ہی کی طرز پر بنائی گئی ہے۔ اسے پاکستان میں متعارف کروانے کے لیے ایچ آر ایل موٹرز نے گاڑیاں بنانے والے چینی ادارے زوتیے کے ساتھ شراکت داری کی ہے۔ ایچ آر ایل موٹرز کی ویب سائٹ پر اس حوالے سے بتایا گیا ہے کہ یہ شراکت داری پاکستان میں کم قیمت چینی گاڑیوں کی فروخت ممکن بنانے کے لیے کی گئی ہے۔
“فی الحال ہم زوتیے کی تیار شدہ مختلف گاڑیاں متعارف کروا رہے ہیں جن میں ایل سی وی اور چھوٹے ٹرکس وغیرہ شامل ہیں”
زوتیے Z100 میں یورو 4 معیارات کا حامل 1000cc انجن لگایا گیا ہے۔ یہ 12 والو 3-ان لائن انجن ہے جسے 5-اسپیڈ مینوئل ٹرانسمیشن سے منسلک کیا گیا ہے۔ یوں یہ گاڑی 3500 آر پی ایم پر 68 بریک ہارس پاور اور 66.4 فٹ پاؤنڈ ٹارک فراہم کرسکتی ہے۔ ان اعداد و شمار کو دیکھتے ہوئے کہا جاسکتا ہے کہ Z100 کی زیادہ سے زیادہ رفتار 150 کلومیٹر فی گھنٹہ تک پہنچ سکتی ہے۔ ایندھن کی کھپت سے متعلق ایچ آر ایل کا کہنا ہے کہ زوتیے Z100 ایک لیٹر میں 18.9 کلومیٹر تک سفر کرسکتی ہے۔ اس میں 35 لیٹر ایندھن کی بھی گنجائش ہے جس کی مدد سے آپ ایک بار ‘ٹنکی’ بھروا کر 660 کلومیٹر تک باآسانی سفر کرسکیں گے۔
زوتیے Z100 کی چند نمایاں خصوصیات یہ ہیں:
- اینٹی تھیفٹ سسٹم
- الائے ویلز
- برقی ریئر مررز
- پاور ونڈوز
- مرکزی لاکنگ
- مینوئل ایئرکنڈیشننگ
- 2-اسپیکر اسٹیریو مع ریڈیو اور MP3
- برقی پاور اسٹیئرنگ
- ٹرِپ کمپیوٹر
- 5 میٹر ٹرننگ ریڈیئس
قابل ذکر خصوصیات کی لمبی فہرست کے ساتھ زوتیے Z100 کو 11,72,000 روپے کی قیمت میں پیش کیا گیا ہے۔ خریداری میں دلچسپی رکھنے والے صرف 25 ہزار روپے میں اس گاڑی کی بکنگ کرواسکتے ہیں۔ یہ چینی گاڑی مختلف رنگوں بشمول سفید، نقرئی، نیلے اور سرخ میں دستیاب ہوگی۔
