جس طرح جاپانی ادارے ٹویوٹا نے لیکسز (Lexus) کو ایک نئی پہچان دی بالکل اسی طرح اپنی پرتعیش اور مہنگی گاڑیوں کو منفرد بنانے کے لیے جنوبی کوریائی ادارے ہیونڈائی نے جینسز (Genesis) کو علیحدہ برانڈ بنانے کا فیصلہ کیا ہے۔ کچھ عرصے قبل ہیونڈائی نے اسی برانڈ کے تحت پلگ-ان ہائبرڈ متعارف کروانے کا اعلان کیا تھا اور اب کوریائی ادارے نے جینسز کے تحت برقی گاڑیاں بھی پیش کرنے کا ارادہ ظاہر کیا ہے۔
جینسز کے چیف ایگزیکٹو آفیسر مینفریڈ فِٹزگرالڈ نے جنوبی کوریا میں جاری بوسان موٹر شو کے دوران ذرائع ابلاغ کے نمائندوں سے بات کرتے ہوئے کہا کہ ہم ہرحال میں جینسز برانڈ کو مقبول بنانے کی ہر ممکن کوشش کریں گے اور اور اسی نام سے پُرتعیش برقی گاڑیوں کی تیاری بھی ہمارے منصوبے کا حصہ ہے۔ انہوں نے پیش گوئی کرتے ہوئے کہا کہ بجلی سے چلنے والی گاڑیوں ہی سے شعبے کا مستقبل وابستہ ہے۔
یہ بھی پڑھیں: ہیونڈائی Genesis برانڈ کے تحت ہائبرڈ گاڑیاں پیش کرے گا
ہیونڈائی (Hyundai) کی کوشش ہے کہ وہ بجلی سے چلنے والی پُرتعیش گاڑیوں کے زمرے میں دیگر کار ساز اداروں مثلاً آوڈی، بی ایم ڈبلیو، مرسڈیز اور پورشے کا مقابلہ کرسکے۔ جرمن کار ساز اداروں کی جانب سے برقی گاڑیوں کی پیش کش بہت جلد متوقع ہے تاہم فی الوقت بجلی سے چلنے والی گاڑیوں کی تیاری میں امریکی ادارے ٹیسلا کو واضح برتری حاصل ہے۔
ہیونڈائی مشہور زمانہ G80 سیڈان کا ڈیزل ماڈل بنانے کی بھی کوشش کر رہا ہے جس سے وہ یورپی مارکیٹ میں جرمن ڈیزل گاڑیوں کا مقابلہ کرسکے گا۔ گو کہ امریکا اور چین میں ڈیزل گاڑیوں کو زیادہ شہرت حاصل نہیں لیکن یورپی مارکیٹ میں اب بھی ڈیزل گاڑیوں کی فروخت قابل ذکر ہے۔ ہیونڈائی جتنی جلد ممکن ہو زیادہ سے زیادہ منڈیوں تک رسائی حاصل کر کے اپنے ادارے کو مزید وسعت دینے کا خواہش مند ہے۔
