جاپان انٹرنیشنل کوآپریشن ایجنسی (JICA) نے عبد الرزاق داؤد کے ساتھ ملاقات میں مقامی آٹو سیکٹر کے مختلف پہلوؤں اور اس کی ترویج کے لیے ضروری اقدامات کا جائزہ لیا۔
چیف نمائندے شگیکی فوروتا کی زیر قیادت JICA وفد نے پاکستان کا دورہ کیا جس کے دوران وزیر اعظم کے مشیر برائے تجارت، ٹیکسٹائل، صنعت و پیداوار عبد الرزاق داؤد کے ساتھ ملاقات کی۔ وفد نے پاکستان میں آٹوموبائل انڈسٹری کی اپگریڈیشن میں دلچسپی کا اظہار کیا۔ ٹیم نے وفاقی حکومت کی جانب سے بھاری بھرکم ٹیکس اور ڈیوٹیز لگانے سے آٹو انڈسٹری کو درپیش چیلنجز پر بات کی۔ اس کے علاوہ کرنسی کی گھٹتی ہوئی قدر بھی پچھلے چھ مہینوں میں سیلز میں کمی کا سبب بنی۔ شگیکی کی زیر قیادت JICA ٹیم نے مقامی طور پر اسمبل ہونے والی گاڑیوں کی وقتاً فوقتاً جانچ کے ساتھ ان کے لیے سکیورٹی فیچرز حاصل کرنے اور لگانے کے معاملے پر بھی روشنی ڈالی۔ ملک میں تجارت اور سرمایہ کاری کو فروغ دینے کے لیے ضروری ہے کہ اقتصادی ترقی کی اہمیت کو نہ بھلایا جائے۔ وفد نے آٹو سیکٹر میں سرمایہ کاری کے فروغ اور اس کی بہتری میں مدد کا یقین دلایا۔
کامیاب ملاقات میں JICA ٹیم نے مقامی سطح پر پیداواری گنجائش کو موجودہ 2 لاکھ گاڑیوں سے آگے لے جانے پر بھی زور دیا۔ ان کا سمجھنا ہے کہ ملک میں جاپانی آٹو اداروں کی مددگار سرگرمیاں اس مقصد کے حصول میں کافی مدد دیں گی۔ ایک بہتر کاروباری ماحول اور نئے حفاظتی اور ماحول دوست فیچرز مقامی آٹو سیکٹر کے لیے بہتر نتائج فراہم کریں گے۔ ایجنسی صارفین کی سیفٹی کو یقینی بنانے کے لیے استعمال شدہ اور نئی گاڑیوں کی تمام اقسام کے لیے انسپکشن ڈھانچہ تیار کرنے میں بھرپور مدد فراہم کرے گی۔ اس موقع پر آٹو ڈیولپمنٹ پالیسی (ADP) 2016-21ء کو بھی سراہا گیا کیونکہ یہ نئے اداروں کو ملک میں اپنا پروڈکشن سیٹ اپ لگانے اور پالیسی فریم ورک تیار کرنے کے لیے یکساں اور زبردست مواقع فراہم کرتی ہے۔ اسے متعارف کروائے جانے سے اب تک متعدد یورپی، چینی اور کوریائی برانڈز پاکستان کی آٹو مارکیٹ میں داخل ہونے کے موقع کا فائدہ اٹھا چکے ہیں کہ جو ترقی کے زبردست امکانات رکھتی ہے۔
وزیر اعظم کے مشیر نے آٹو سیکٹر کی ترقی کے لیے ملک میں سرمایہ کاری کے زبردست مواقع رکھنے والے چند شعبوں سے وفد کو آگاہ کیا۔ انہوں نے مزید کہا کہ پاکستان 11 پوائنٹس کے اضافے کے ساتھ ease of doing business index کی عالمی رینکنگ میں بہتر مقام حاصل کر چکا ہے۔ کاروباری قواعد کو نرم کرنے اور اس کی سرگرمیوں کو آسان بنانے کے لیے ایک پروگرام بھی متعارف کروایا گیا ہے کہ جو ہر ماہ چند قواعد کا خاتمہ کر رہا ہے۔ مزید یہ کہ تجارتی عمل میں بہتری پر بھی ترجیحاً غور کیا جا رہا ہے۔
قبل ازیں JICA کے وفد نے ملک کے مقامی آٹو پارٹس میکرز کے لیے ٹیکنیکل سپورٹ کی یقین دہانی کروائی۔ اس نے پرزوں کے معیار کو بہتر کرنے اور عالمی مارکیٹ میں مقابلے کے قابل بنانے پر آٹو پارٹس مینوفیکچرنگ کمپنیوں کی حوصلہ افزائی کی۔ ان جدید طریقوں سے حاصل کردہ نتائج کے بارے میں متعدد ٹولز اور طریقوں سے بھی آگاہ کیا گیا۔
اپنی رائے نیچے تبصروں میں پیش کیجیے اور مزید خبروں کے لیے پاک ویلز کے ساتھ رہیے۔
