کیا آفیشل ویب سائٹ پر 4 گاڑیاں ظاہر، ممکنہ طور پر پاکستان میں پیش ہوں گی

2016ء میں آٹو پالیسی میں تبدیلی کے بعد گاڑیاں بنانے والے مختلف بین الاقوامی اداروں نے پاکستان کی آٹوموٹو صنعت میں سرمایہ کاری کی خواہش ظاہر کی تھی۔ مختلف اداروں کو گرین فیلڈ درجہ دیا گیا تھا، جن میں سے ایک کیا (KIA) بھی تھا۔ ہیونڈائی کی جانب سے اپنے اسمبلی پلانٹ کے سنگ بنیاد کی تقریب اور دیوان موٹرز کی جانب سے ڈائہان شہ زور کے اجراء کے علاوہ گاڑیاں بنانے والوں کی طرف سے اب بھی کوئی بڑی خبر سامنے نہیں آئی، لیکن یہ افواہیں ہیں کہ کیا موٹرز آنے والے مہینے میں کیا اسپورٹیج کی رونمائی کرے گا۔ واضح رہے کہ یہ صرف افواہیں ہیں، اور اسا کوئی اشارہ نہیں کیا گیا کہ ایسا واقعی ہونے جا رہا ہے، کم از کم اس وقت تو بالکل نہیں۔

پاکستان میں کیا موٹرز لکی سیمنٹ کمپنی کے ساتھ شراکت داری رکھتا ہے اور دونوں کے درمیان مسافر اور کمرشل گاڑیاں بنانے کے ایک معاہدے پر دستخط ہوئے تھے۔ کیا موٹرز پاکستان کی باضابطہ ویب سائٹ اب کھل چکی ہے جو پہلے صرف ایک خالی صفحہ تھی اور انٹرنیشنل ویب سائٹ سے لنک بھی ہو چکی ہے۔ ویب سائٹ پر ایک پیغام کے ساتھ آپ کا خیرمقدم کیا جاتا ہے جو کہتا ہے

“ہیلو پاکستان! طاقت حیران کرنے کی”۔

مرکزی صفحہ چار گاڑیاں ظاہر کرتا ہے، تین مسافر اور ایک کمرشل

پکانٹو

اسپورٹیج

کارنیول

K2700

اس امر کی تصدیق تو کوئی نہیں کہ کیا موٹرز کی جانب سے کون سی گاڑی لانچ کی جائے گی، لیکن کیونکہ یہ چار گاڑیاں مین پیج پر دکھائی گئی ہیں اس لیے امکان ضرور ہے کہ یہ چار گاڑیاں سب سے پہلے جاری ہوں گی۔ ان گاڑیوں کی خصوصیات کے بارے میں تفصیلات کے حامل بروشرز بھی ویب سائٹ پر موجود ہیں، لیکن وہ انٹرنیشنل مارکیٹ کے ہیں یعنی امکان ہے ہمیں ویسے انجن اور خصوصیات کی حامل گاڑیاں نہ ملیں جو بروشر مین موجود ہیں۔ کیا نے ایک چھوٹا سا نوٹ بھی لگا دیا ہے کہ اصل خصوصیات علاقے کے حساب سے مختلف ہو سکتی ہیں اس لیے بروشر ہمیں صرف گاڑی کے بارے میں ایک سادہ سا تصور ہی دے سکتا ہے۔