ہمیں عوام کی جانب سے بارہا ایسی شکایات موصول ہوتی ہیں کہ پاکستان کے معروف ترین سیاحتی مقامات میں ایک سوات کا سفر شاہراہ اور سڑکیں نہ ہونے کی وجہ سے بہت تھکا دینے والا ہے۔ یہ مسئلہ بالآخر حل ہونے والا ہے کیونکہ وزیر اعظم عمران خان نے خیبر پختونخوا (KPK) کے حکام کو ہدایت کی ہے کہ سوات ایکسپریس وے کو اس سال مکمل کرلیا جائے اور 25 مئی 2019ء کو اسے گاڑیوں کے لیے مکمل طور پر کھول دیا جائے۔
گزشتہ سال ہم نے قارئین کو بتایا تھا کہ خیبر پختونخوا کے اُس وقت کے وزیر اعلیٰ پرویز خٹک نے سوات موٹر وے کے 50 کلومیٹر حصے کا افتتاح کردیا ہے۔ ابتدائی طور پر کرنل شیر خان انٹرچینج اور دوبیان کے درمیان راستہ عوام کے لیے کھولا گیا جبکہ باقی حصے زیر تعمیر تھے۔ کرنل شیر خان صوابی انٹرچینج سے کٹلنگ مردان تک کے 51 کلومیٹر طویل حصے کا افتتاح پچھلے سال ہوا تھا۔ اگست 2016ء میں سنگِ بنیاد رکھنے کے بعد اس منصوبے کی تکمیل میں چند سال لگے۔
اب وزیر اعظم عمران خان کے وژن کے ساتھ پاکستان نئے ویزا نظام میں داخل ہو چکا ہے کہ جس میں مقامی اور غیر ملکی سیاحت کو فروغ دیا جا رہا ہے۔ 81 کلومیٹر طویل سوات ایکسپریس وے سیاحوں کو سوات، چترال، دیر بالا، دیر زیریں، شانگلہ، کوہستان، بونیر، مہمند اور باجوڑ کے خوبصورت اضلاع کو دیکھنے کا موقع دے گی۔
پاکستان تحریک انصاف حکومت مالاکنڈ ڈویژن کے سات اضلاع کی بھرپور صلاحیت کا فائدہ اٹھانے کی منصوبہ بندی کر رہی ہے۔
سیاح جو سوات جانے کے منصوبے بنا رہے ہیں، جان لیں کہ سوات ایکسپریس صوابی ضلع کے کرنل شیر خان انٹرچینج سے شروع ہوتی ہے جو پشاور-اسلام آباد موٹروے پر موجود ہے۔ ایکسپریس وے دیر زیریں میں چکدرہ کے مقام پر مکمل ہوتی ہے۔ یہ 21 پلوں پر مشتمل ہے۔ اس میگا پروجیکٹ میں 1300 میٹر طویل دہری سرنگیں بھی ہیں جو نیشنل ہائی وے N-45 پر ہیں۔
ماضی میں مسافروں کو سوات کی مسحور کن خوبصورتی دیکھنے میں مشکلات کا سامنا تھا۔ ہر سال ہزاروں سیاح سوات کا رخ کرتے ہیں اور وفاقی و صوبائی حکومت سیاحت کے مواقع سے فائدہ اٹھانا چاہتی ہیں ساتھ ہی سیاحوں کی مشکلات بھی سمجھتی ہیں۔
کرنل شیر خان صوابی انٹرچینج سے کٹلنگ مردان تک کا 51 کلومیٹر طویل حصہ گزشتہ سال کھولا گیا تھا۔ ابتدائی منصوبہ 2018ء کے آخر تک پوری سوات موٹر وے کھولنے کا تھا۔
چار لین کی سوات ایکسپریس وے بعد ازاں چھ لین میں تبدیل کی جائے گی جبکہ اسے مستقبل میں منگورہ تک توسیع بھی دی جا سکتی ہے۔
