یونس برادرز گروپ کی کمپنی لکی موٹرز نے ملک میں فرانسیسی پوژو (Peugeot) کاروں کو اسمبل کرنے کے لیے ایک معاہدے پر دستخط کردیے ہیں۔
تفصیلات کے مطابق مقامی کمپنی نے فرانس کے PSA Groupe کے ساتھ مئی کے وسط میں اظہارِ دلچسپی (EoI) اور مفاہمت کی یادداشت (MoU) پر دستخط کیے۔ گروپ PSA فرانس میں گاڑیاں اور موٹر سائیکلیں بنانے والا ایک ملٹی نیشنل ادارہ ہے۔ ان کی گاڑیاں یورپ میں برانڈز کے تحت فروخت ہوتی ہے جیسا کہ اوپیل، DS، پوژو، ستروئن اور واکس ہال۔ البتہ پوژو یورپ میں PSA کا سب سے بڑا برانڈ ہے۔ معاہدے کے تحت لکی موٹرز پاکستان میں پوژو کی مسافر کاریں اور لائٹ کمرشل گاڑیاں (LCVs) اسمبل، تیار، مارکیٹ، تقسیم اور فروخت کرے گا۔ اب تک فی الحال LML یہ گاڑیاں بن قاسم انڈسٹریل پارک میں موجود اپنے آٹوموبائل مینوفیکچرنگ پلانٹ پر بنانے کا منصوبہ رکھتا ہے۔ واضح رہے کہ لکی موٹرز جنوبی کوریائی ادارے کِیا کے ساتھ مل کر بھی گاڑیاں بنا رہا ہے جسے مشترکہ طور پر کِیا لکی موٹرز کا نام دیا گیا ہے۔
رینو (رینالٹ) اور فوکس ویگن جیسے دیگر یورپی برانڈز، جو پاکستان کی آٹو مارکیٹ میں داخلے کے لیے تیار ہیں، نے ابھی تک اپنے پلانٹس کا آغاز نہیں کیا۔ الفطیم رینالٹ کی 165 ملین ڈالرز کی سرمایہ کاری ملک کی اقتصادی کیفیت کی وجہ سے کچے دھاگے سے بندھی ہوئی ہے۔ دریں اثناء، پوژو اس جوائنٹ وینچر کے ذریعے ملک میں پہلا یورپی برانڈ بن سکتا ہے۔ لکی موٹرز کے CEO آصف رضوی پرامید ہیں کہ یہ معاہدہ پاکستان کے مقامی آٹو سیکٹر میں بڑی تبدیلی لائے گا۔ انہوں نے بتایا کہ ان کی کمپلی نے آٹو ڈیولپمنٹ پالیسی (ADP) 2016-21ء کے تحت اس مخصوص سرمایہ کری کے لیے کیٹیگری A گرین فیلڈ اسٹیٹس حاصل کرنے کی درخواست دی ہے۔ آٹو پالیسی پاکستان میں غیر ملکی سرمایہ کاروں کی جانب سے 1.3 ارب ڈالرز سے زیادہ کی سرمایہ کاری لانے کا سبب بنی ہے۔ انہوں نے مزید یقین دلایا کہ تمام ضروری معاہدے اگلے چند مہینوں میں کرلیے جائیں گے۔ واضح رہے کہ پوژو کاریں completely knocked down یعنی CKD کیٹیگری کے تحت ملک میں آنے والی پہلی یورپی برانڈ کی کاریں ہوں گی۔
نئے وینچر میں لکی موٹرز کے موجودہ پلانٹ پر پوژو کاریں بنانے کے لیے 15 ملین ڈالرز کی سرمایہ کاری شامل ہوں گی۔ LML گروپ کے سربراہ سمجھتے ہیں کہ پاکستان میں آٹوموبائل انڈسٹری کا مستقبل دنیا بھر کے بڑے آٹو اداروں کی ملٹی برانڈ مینوفیکچرنگ میں ہے۔ لکی موٹرز پہلے ہی کِیا بنانے کے لیے بنیاد رکھ چکا ہے اور اب پاکستان میں پوژو کاریں لائے گا۔ ان کے مطابق اس سے صارفین کو انتخاب کے وسیع مواقع ملیں گے جو آٹو سیکٹر میں نئے اور موجوٹہ کھلاڑیوں کے درمیان مقابلے کی شدت میں اضافہ کریں گے۔
یہ پاکستان کے آٹوموبائل سیکٹر میں ایک زبردست پیشرفت ہے۔ بلاشبہ یہ کسی سے بھی بڑھ کر صارفین کو فائدہ پہنچائے گی۔ اس بارے میں آپ کی رائے کیا ہے؟ اپنے خیالات نیچے تبصروں میں پیش کیجیے اور ایسی ہی دیگر آٹوموبائل خبروں کے لیے پاک ویلز پر آتے رہیے۔
