اس بات سے انکار ممکن نہیں کہ پاکستان میں سب سے بڑا موٹر سائیکل بنانے والا ادارہ ایٹلس ہونڈا ہی ہے۔ پاکستان میں فروخت ہونے والی موٹر سائیکلوں کے اعداد و شمار ملاحظہ فرمائیں تو بخوبی اندازہ لگایا جاسکتا ہے کہ ملک میں 50 فیصد سے زائد صارفین ہونڈا ہی کی تیار کردہ موٹر سائیکلیں استعمال کر رہے ہیں۔ اس سے نہ صرف پاکستانی عوام کی ضروریات پوری کرنے میں مدد مل رہی ہے وہیں ادارے کو بھی خاصہ منافع حاصل ہورہا ہے۔ البتہ گزشتہ چند سالوں میں ایٹلس ہونڈا پر پرانی ٹیکنالوجی اور ڈیزائن کی حامل موٹر سائیکلیں فروخت کرنے پر تنقید کی جاتی رہی ہے۔ یہی وجہ ہے کہ اب پاکستان میں نووارد موٹر سائیکل ساز اداروں مثلاً یاماہا، کیوے اور روڈ پرنس کو زبردست پزیرائی حاصل ہورہی ہے۔
پاکستان میں موٹر سائیکل پیش کرنے والے تمام اداروں پر واضح برتری رکھنے کے باوجود ایٹلس ہونڈا نے اپنی سبقت کو مزید مستحکم اور ادارے پر ہونے والے تنقید کا موثر جواب دینے کے لیے عملی اقدامات اٹھانے کا فیصلہ کیا ہے۔ ذرائع کے مطابق ایٹلس ہونڈا پاکستان میں نئی 150cc موٹر سائیکل پیش کرنے کی تیاری میں مصروف ہے۔ امکان ظاہر کیا جارہا ہے کہ ایٹلس ہونڈا کی یہ متوقع پیشکش ہونڈا CB 150 ہوسکتی ہے جس کی قیمت 1,50,000 رکھے جانا متوقع ہے۔ پاکستانی مارکیٹ میں نئی ہونڈا موٹر سائیکل کی آمد سے جہاں صارفین کو مزید بہتر انتخاب کا موقع میسر آئے گا وہیں ملک بھر میں موجود ہونڈا ڈیلرشپس اور موٹر سائیکل کے پرزے بنانے والے اداروں کو بھی فائدہ پہنچے گا۔
پاک ویلز فورم پر ہونڈا موٹر سائیکلوں پر گفتگو کے لیے یہاں کلک کریں۔
ہونڈا CB 150 کے بارے میں
ہونڈا CB 150 کو پہلی مرتبہ سال 2005 میں متعارف کروایا گیا تھا۔ پڑوسی ملک بھارت میں اس موٹر سائیکل نے بہت جلد مقبولیت حاصل کرلی۔ ایک اندازے کے مطابق گزشتہ 7 سے 8 کے دوران 1 کروڑ 30 لاکھ ہونڈا CB 150 موٹر سائیکلیں فروخت ہوچکی ہیں۔ سال 2012-13 میں اس کی فروخت روک دی گئی تاہم بے پناہ مشہوری کو دیکھتے ہوئے ہونڈا نے اسے مزید بہتر انداز اور ہونڈا ایکو ٹیکنالوجی کے حامل انجن کے ساتھ دوبارہ متعارف کروایا۔
ذرائع کے مطابق ایٹلس ہونڈا نے CB 150 کو ہونڈا ایکو ٹیکنالوجی کے بغیر یا اس کے ساتھ پیش کرنے سے متعلق حتمی فیصلہ نہیں کیا تاہم نئی موٹر سائیکل کو میدان میں اتارنے کا معاملے طے پاگیا ہے۔ اس حوالے سے ادارے نے وزارت صنعت و پیداوار اور اقتصادی رابطہ کمیٹی سے موٹر سائیکل کو ‘نووارد’ قرار دیئے جانے کی درخواست کی ہے جس سے ایٹلس ہونڈا کو متعدد فوائد حاصل ہوں گے۔
ہونڈا CB 150 کی تکنیکی خصوصیات
