مارکیٹ میں دستیاب گاڑیوں کو بہتر بنانے کے لیے بہت سے کار ساز اداروں نے ایک علیحدہ اور غیر جانبدار شعبہ بنایا ہے۔ یہ خود مختار شعبہ طاقتور انجن، بہتر سسپنشن، گاڑی کے بیرونی ڈیزائن میں نمایاں تبدیلیوں جیسے کام کرتا ہے جس سے عام گاڑی کی کارکردگی کو زیادہ بہتر بنانے میں مدد مل سکے۔ اس مقصد کے لیے ٹویوٹا کے TRD، بی ایم ڈبلیو کے M ڈیویژن اور مرسڈیز کے AMG سے مثال لی جاسکتی ہے۔
نسان نے بھی دیگر اداروں کو دیکھتے ہوئے نسمو (NISMO) قائم کیا جس نے 600 براک ہارس پاور والی نسمو R35 جی ٹی آر پیش کی تھی۔ لیکن اس بار نسمو نے کچھ مختلف کرنے کا سوچا اور نسان کی عظیم SUV ‘پیٹرول’ کو تختہ مشق بنایا۔ نسمو کی جادوگری سے ‘نسان پیٹرول نسمو’ کا وجود ہوا جسے متحدہ عرب امارات میں پیش کیا گیا ہے۔
پیٹرول نسمو میں 5.5 لیٹر V8 انجن لگایا گیا ہے جو 428 براک ہارس پاور پیدا کرتا ہے۔ یہ عام نسان پیٹرول سے 28 براک ہارس پاور زیادہ ہے۔ اس کے علاوہ سسپنشن میں بھی بہتری کے لیے بلسٹین شاک کو اسپورٹس کار جیسے اسٹیرئنگ کے ساتھ شامل کیا گیا ہے تاکہ گاڑی پر ڈرائیور کی گرفت اور بھی مضبوط ہوسکے۔ گاڑی کی رفتار کو مزید بہتر بنانے کے لیے اس میں 22 انچ کے پہیے لگائے گئے ہیں۔ علاوہ ازیں اندرونی حصے کو بھی بہتر بنایا گیا ہے جس میں نسمو کے لوگو کی شمولیت بھی شامل ہے۔
