نسان پیٹرول کی 4×4 سیریز کے بارے میں دنیا کا ہر وہ شخص جانتا ہے جو 4×4 گاڑیوں میں دلچسپی رکھتا ہو۔ 1951ء میں پیش کی جانے والی نسان پیٹرول اپنے وقت کی بہترین اور طاقتور گاڑیوں میں شمار کی جاتی ہے۔ بہت سے لوگ لینڈ کروزر سے اس کا موازنہ کرتے ہیں لیکن میرے خیال سے نسان پیٹرول بہت آگے کی چیز ہے۔ اگر کبھی آپ نے مشرق وسطیٰ کا سفر کیا ہوتو وہاں یہ گاڑی ایمبولینس کے طور پر استعمال ہوتی ہوئی ضرور دیکھی ہوگی۔ اس کی مقبولیت کا اندازہ اس سے بھی لگایا جاسکتا ہے کہ اب تک پاکستان کی سڑکوں پر بھاگتی دوڑتی نظر آتی ہے۔
گو کہ نسان پیٹرول کی سیریز میں تمام ہی گاڑیوں کو طویل اور کٹھن سفر کے لیے بنایا گیا لیکن Y60 کی تیاری پر اس حوالے سے زیادہ توجہ دی گئی۔ یہی وجہ ہے کہ بہت کم لوگ Y60 کی قابلیت پر انگلی اٹھا سکے ہیں ۔ ان میں وہ لوگ بھی ہوں گے جنہوں نے اس کی رفتار اور مضبوطی کو اپنی آنکھوں سے نہیں دیکھا۔
نسان کی جانب سے 5 دروازوں اور 3 دروازوں پر مشتمل Y60 کی تیاری 1987ء سے 1997ء تک جاری رہی۔ یہ پیٹرول سیریز کی پہلی گاڑی تھی جس میں کوائل اسپرنگ سسپنشن کے ساتھ لیف اسپرنگ استعمال کیا گیا تھا۔علاوہ ازیں پاور اسٹریئرنگ کے ساتھ اگلے اور پچھلے بریکس بھی شامل تھے۔
Y60 کو چار مختلف انجنز کے ساتھ پیش کیا گیا جس میں 3000 سی سی، 4200 سی سی، 28 سی سی ٹربو ڈیزل اور 4200 سی سی ٹربو ڈیزل انجن شامل ہے۔ پاکستان میں پیش کی جانے والی 95 فیصد گاڑیوں میں اصلی انجن کے بجائے ترمیم شدہ انجن استعمال کیا جاتا رہا ہے لیکن اس کے باوجود ملک میں یہ کافی مقبول رہی ہے۔
نسان کی جانب سے Y60 کو مزید بہتر سے بہتر بنانے کے لیے کوششیں کی جاتی رہی ہیں جنہیں صارفین کی جانب سے پسند بھی کیا گیا ہے۔ جھکی ہوئی ، نیچی چھت اور بہتر گرفت کی حامل نسان پیٹرول کی دنیا بھر میں مقبولیت کے برعکس پاکسان میں SGL ماڈل کو زیادہ دیکھا گیا ہے۔
