پچھلے دنوں میرے ایک دوست کو اپنی گاڑی کے ویل الائنمنٹ کروانے کی ضرورت پیش آئی تو ہم نئے ٹائرز کی دکان پر گئے۔ وہاں موجود ویل الائنمنٹ کے جدید نظام سے ہم بہت متاثر ہوئے۔ ایک اور چیز جو ہمیں وہاں عام دکانوں سے مختلف نظر آئی وہ تھی ٹائرز میں نائٹروجن گیس بھرنے کی سہولت۔ میں نے پہلے بھی کئی آن لائن فورمز پر اس حوالے سے پڑھا تھا کہ گاڑیوں کے ٹائرز میں نائٹروجن گیس بھری جاتی ہے، لیکن اس بارے میں کبھی نہیں سوچا کہ آیا یہ پاکستان میں موجود پرانی یا عام گاڑیوں کے لے بھی مفید ہے یا نہیں؟
اس پر مزید بات کرنے سے پہلے میں آپ کو بتاتا چلوں کہ گاڑی کے ٹائروں میں بھری جانے والی عام ہوا اور نائٹروجن میں کیا فرق ہے۔ پہلے تو یہ بات سمجھ لیں کہ عام طور پر گاڑیوں کے ٹائرز میں بھری جانے والی ہوا میں 80 فیصد (یا اس سے کچھ کم) نائٹروجن گیس ہوتی ہے اور باقی حصہ آکسیجن و دیگر گیس کا ہوتا ہے۔ اس کا مطلب یہ ہوا کہ فٹ پاتھ پر بنی ٹائرز کی عام دکان پر بھی نائٹروجن و دیگر گیس بھری جاتی ہے۔ لیکن یہاں ہم عام ہوا کا موازنہ جس سے کر رہے ہیں وہ خالص نائٹروجن گیس ہے جس میں کسی قسم کی کوئی ملاوٹ نہیں ہوتی۔
عام ہوا کے مقابلے میں خالص نائٹروجن گیس ٹائر سے کم خارج ہوتی ہے۔ اس کے علاوہ یہ بھی کہا جاتا ہے کہ نائٹروجن گیس سے ٹائر کے گلنے یا سڑنے کا امکان بھی کم ہوتا ہے۔ مزید یہ کہ نائٹروجن گیس سے بھرے ہوئے ٹائر کے درجہ حرارت میں بھی بہت کم تبدیلی واقع ہوتی ہے اور یہی وجہ ہے کہ اسے گاڑیوں کی دوڑ میں استعمال کیا جاتا ہے۔
اگر آپ نے گاڑیوں کے ٹائر تبدیل ہوتے وقت پہیوں پر غور کیا ہوتو اندرونی حصے میں آپ کو کچھ زنگ محسوس ہوگا۔اس کی وجہ ٹائر سے خارج ہونے والی نمی ہے جو دراصل عام ہوا میں شامل آکسیجن کی وجہ سے بنتی ہے۔ یہ نمی ٹائر کے درجہ حرارت میں غیر معمولی تبدیلی کا باعث بنتی ہے جس سے ٹائر پھول جاتا ہے۔ اس مسئلہ پر خالص نائٹروجن گیس کے استعمال سے قابو پایا جاسکتا ہے۔
تو مختصراً کہا جائے تو نائٹروجن گیس کے فوائد بہرحال موجود ہیں۔ لیکن اصل سوال یہ ہے کہ آیا یہ اتنی اہم ہے کہ اس کے لیے اضافی خرچہ کیا جائے؟ اس کا جواب ہم نہیں بلکہ آپ دے سکتے ہیں کیوں کہ آپ اپنی گاڑی کو بہتر جانتے ہیں! اس کا انحصار مختلف عوامل پر ہے مثلاً آپ کی گاڑی روزانہ کتنا سفر کرتی ہے، کہاں اور کیسی سڑکوں پر سے گزرتی ہے وغیرہ وغیرہ۔
اگر آپ کے پاس نئی گاڑی ہے جس میں خوبصورتی پہیے اور مہنگے ٹائر ہیں اور آپ کو گاڑی کی تیز رفتار بھی پسند ہے تو پھر نائٹروجن گیس بھروانے سے متعلق ضرور غور کرنا چاہیے۔ لیکن اگر آپ کے پاس نسبتاً پرانی گاڑی ہے جس کے ٹائر بھی ایک عرصہ گزار چکے ہیں تو پھر آپ عام دستیاب ہوا پر ہی اکتفا کریں تو بہتر رہے گا۔
خالص نائٹروجن گیس کی خصوصیات اپنی جگہ لیکن یہ آپ کے ہاتھ میں ہے کہ اس سے فائدہ اٹھائیں یا اپنی جیب پر بوجھ بنائیں!
