پاک سوزوکی کے منیجنگ ڈائریکٹر ہیروفومی نگاؤ نے وزیر خزانہ سینیٹر اسحاق ڈار سے گزشتہ روز (جمعرات) ملاقات کی اور انہیں پاکستان میں سوزوکی کے نئے سرمایہ کاری منصوبے سے متعلق آگاہ کیا ہے۔ اس ملاقات کے دوران وزارت خزانہ کے اعلی عہدیداران سمیت پاک سوزوکی کے وفد میں شامل دیگر اراکین بھی موجود رہے۔
ذرائع کے مطابق ملاقات کے دوران پاک سوزوکی کے منیجنگ ڈائریکٹر نے پاکستان میں اپنے کاروبار کو وسعت دینے کے لیے 46 کروڑ ڈالر سرمایہ کاری سے ایک نئے کارخانے کے قیام کا بھی ذکر کیا ہے۔ انہوں نے کہا کہ اس ضمن میں درکار تمام قانونی مراحل کے بعد نئے منصوبے کو 2 سال کے عرصے میں مکمل کیا جائے گا یوں سال 2018 کے اختتام تک نئے کارخانے میں سوزوکی گاڑیوں کی تیاری شروع کیے جانے کی امید ہے۔
یہ بھی پڑھیں: سال 2016 میں سب سے زیادہ سرچ کی جانے والی 5 پاکستانی گاڑیاں
وزیر خزانہ نے پاک سوزوکی کے منصوبے کا خیر مقدم کرتے ہوئے انہیں اس ضمن میں بنائے گئے طریقہ کار کے مطابق مزید تفصیلات کے ساتھ مکمل منصوبہ پیش کرنے کا مشورہ دیا ہے۔ وزیر خزانہ نے کہا کہ جاپان ایکسٹرنل ٹریڈ آرگنائزیشن (JETRO) نے سرمایہ کاری کے بہترین ممالک کی فہرست میں پاکستان کو دوسرے نمبر پر رکھا ہے۔ انہوں نے اس کا تمام تر سہرا پاکستان کی اقتصادی صورتحال، معاشی استحکام اور امن و امان کی صورتحال میں بہتری کے سر باندھا ہے۔
