پولیس کا بائیک اسکواڈ کراچی کی سڑکوں پر دھوم مچانے کے لیے تیار ہے۔ مقامی میڈیا آؤٹ لیٹ کے مطابق، حکومت ’’اسٹریٹ واچ فورس‘‘ کے اقدام کے تحت 2000 سکیورٹی اہل کاروں کے ساتھ 1000 بائیکوں پر مشتمل اسکواڈ لانچ کرنے جا رہی ہے تاکہ شہر سے اسٹریٹ کرائم کو جڑ سے اکھاڑ پھینکا جائے۔
ابتدائی مرحلے میں، حکام نے 200 اہل کاروں کو 100 بائیکوں پر ڈیفنس اور کلفٹن کے علاقوں میں تعینات کیا ہے جبکہ کچھ ہی عرصے میں مزید کمانڈوز بھی کراچی کے مختلف اضلاع میں تعینات کیے جائیں گے۔
میڈیا سے بات کرتے ہوئے، کراچی پولیس کے چیف ڈاکٹر عامر احمد شیخ نے کہا کہ انھیں امید ہے کہ یہ نئی فورس اسٹریٹ کرائمز اور دیگر مجرمانہ عناصر کو جڑ سے اُکھاڑ پھینکے گی اور گلیاں عوام کے لیے محفوظ ترین ہو جائیں گی۔
یہ پہلی بار نہیں ہے کہ صوبائی حکومت نے ڈاکوؤں اور اسٹریٹ کرائم مافیا کے خاتمے کے لیے مختص بائیک اسکواڈ لانچ کیا ہو۔ پنجاب میں قانون کے نفاذ اور سڑکوں پر حالات قابو میں رکھنے کے لیے، گورنمنٹ پہلے ہی ’’ڈولفن‘‘ کے نام سے ایک بائیک پولیس فورس لانچ کرچکی ہے۔
اسٹریٹ کرائم کے خلاف کراچی پولیس کی کارروائی کے علاوہ، اٹک پولیس نے خیبر پختونخوا اور پنجاب میں سرگرم بائیک اٹھانے والے گینگ کو بھی حال ہی میں گرفتار کیا ہے۔
یادش بخیر، کچھ عرصہ پہلے ہی اینٹی کار لفٹنگ سیل کراچی (ACLC) نے بھی دو پروفیشنل بائیک چوروں کو گرفتار کیا تھا جو شہر میں 2000 سے زائد بائیک چرا چکے تھے۔ مجرموں کا دعویٰ تھا کہ انھیں ہر کامیاب بائیک چوری پر 5000 روپے ملتے تھے۔
تازہ ترین خبروں کے لیے جڑے رہیے۔
