روڈ پرنس ویگو 150 اسپورٹس بائیک کا پہلا تجربہ

اب سے کچھ ہفتوں پہلے جب روڈ پرنس کی 150 سی سی اسپورٹس بائیک سامنے آئی تو موٹر سائیکل کے شوقین افراد میں اس کے انداز، کارکردگی پر زبردست بحث شروع ہوگئی۔ ہمارے ذرائع کے مطابق ویگو 150 سی سی دراصل راوی اور روڈ پرنس نے مل کر تیار کی ہے۔ راوی اور پیاگو نے موٹر بائیک بنانے کے معاہدے کی توثیق نہیں کی اس لیے ہوسکتا ہے کہ اب آپ کو راوی پیاگو مقامی مارکیٹ میں نظر نہ آئے۔

پاک ویلز کی ٹیم نے گزشتہ دنوں ویگو 150 سی سی کا تجربہ کیا جس میں مجھے بھی شریک ہونے کا موقع ملا۔ گوکہ ہمیں بہت کم وقت ملا لیکن اس کے باوجود ہم نے بھرپور کوشش کی کہ اپنے قارئین کے لیے زیادہ سے زیادہ معلومات اور نتائج اخذ کیے جائیں۔

شکل و صورت:

کہتے ہیں First Impression is the Last Impression اور ویگو 150کو دیکھ کر لگتا ہے کہ اس کے خالقین اس بات کو بخوبی جانتے ہیں اسی لیے انہوں نے اسے بہترین ڈیزائن کیا ہے۔ باوجودیکہ یہ روایتی اسپورٹس بائیک کی طرح بھاری بھرکم لگنے کے بجائے ہلکی اسپورٹس بائیک لگتی ہے لیکن اس کے خوبصورت ہینڈل، چوڑے ٹائرز اور پہیوں کے ساتھ سرخ رنگ گویا غضب ڈھاتا ہے۔ صرف ایک چیز جس سے بائیک کی خوبصورتی میں مزید اضافہ ہوسکتا تھا وہ ہے اس کی اونچائی۔

کارکردگی:

میری خوش قسمتی ہے کہ مجھے 10 منٹ کے لیے ہی سہی لیکن ویگو 150 کی پہلی سواری کا موقع ملا اور یقین جانیے یہ تجربہ میرے لیے بہت اچھا رہا۔ ہوسکتا ہے آپ کہیں کہ 10 منٹ میں کیا پتہ چلتا ہے؟ لیکن اس مختصر دورانیے ہی میں ویگو 150 نے میرا دل جیت لیا۔ میں کسی بھی چینی موٹر سائیکل سے اتنی اچھی گرفت اور رفتار کی توقع نہیں رکھ رہا تھا۔ اس نے صرف تیسرے ہی گیئر میں 85 کلومیٹر فی گھنٹہ کی رفتار پکڑ لی اور سب سے اچھی بات یہ ہے کہ اس دوران انجن یا بائیک میں کوئی لرزش محسوس نہیں ہوئی۔ اب اور کیا چاہیے؟

آواز:

اس 150 سی سی اسپورٹس بائیک کی آواز بھی جاندار ہے۔ کم از کم اس وقت مقامی مارکیٹ میں جو موٹر سائیکل دستیاب ہیں ان سے تو کہیں زیادہ بہتر ہے۔ اس کی آواز میں وہ گھن گھرج ہے جو پاکستان کی زیادہ تر بائیکس میں نہیں ملتی۔

سواری:

بائیک کی سواری کافی آرامدے ہے۔ تقریباً 10 منٹ کی سواری میں مجھے بہت اچھا محسوس ہوا۔ اس میں ہائیڈرولک شاکس لگائے گئے ہیں اور بیٹھنے کی جگہ بھی کافی کشادہ ہے۔ البتہ موٹر سائیکل چلانے والے کے علاوہ دوسرے مسافر کو کچھ مشکل پیش آسکتی ہے کیوں کہ اس پچھلی نشست نسبتاً ترچھی اور پیر رکھنے کی جگہ روایتی موٹر سائیکلوں سے کافی مختلف ہے۔

گیئر باکس:

ویگو 150 میں 5 گیئر ہیں جس میں پہلا گیئر اوپر نیچے کی طرف اور باقی چار گیئر اوپر کی طرف لگتے ہیں۔ یہ چونکہ عام موٹر سائیکل کے گیئر سسٹم سے مختلف ہے، اس لیے ممکن ہے آپ کو اس سے مانوس ہونے میں تھوڑا وقت لگے۔

منفرد خصوصیات:

اس بائیک میں کچھ اضافی خصوصیات بھی شامل ہیں مثلاً:

• ایک ڈیجیٹل میٹر ج(جو سوزوکی انازوما 150 سی سی سے ملتا جلتا ہے)
• اگلی روشنیوں کو کم کرنے کے لیے ایک بٹن
• بائیں ہینڈل کے ساتھ ایک چھوٹی چوک ناب

مجموعی طور پر ویگو 150 کے ساتھ مختصر تجربہ میری توقعات سے زیادہ اچھا رہا۔ مجھے خوشی ہوئی کہ پاکستانی مارکیٹ میں جاری مقابلے میں ایک اچھے کھلاڑی کا اضافہ ہوا۔ اس سے مہنگی موٹر سائیکلوں کی اجارہ داری ختم ہوگی اور وہ لوگ بھی اسپورٹس بائیک کے مزے لے سکیں گے جو ہونڈا بائیکس کی طرف نہیں جانا چاہتے۔