وزیر اعظم کی گاڑیوں کی نیلامی کا دوسرا مرحلہ 17 اکتوبر 2018ء کو تکمیل کو پہنچا۔
تفصیلات کے مطابق 49 انتہائی لگژری گاڑیاں جن میں بم اور بلٹ پروف گاڑیاں بھی شامل تھیں، نیلامی کے لیے پیش کی گئیں، البتہ حکام صرف ایک گاڑی کی نیلامی ہی کر سکے، جس سے 9 ملین روپے حاصل ہوئے، مقامی میڈيا ادارے نے بتایا۔
قبل ازیں، پہلے مرحلے میں، حکومت کی جانب سے 60 سے زیادہ گاڑیاں نیلام کی گئی تھیں، لیکن تب تمام لگژری اور مہنگی گاڑیاں صارفین کی جانب سے نہیں خریدی گئی تھیں کیونکہ ان کی قیمتیں مارکیٹ قیمت سے کہیں زيادہ تھیں۔ حکام نے قیمتوں پر نظرثانی کی اور ایک مرتبہ پھر ان گاڑیوں کو نیلامی کے لیے پیش کیا لیکن جیسا کہ اوپر بتایا گيا ہے کہ نیلامی میں صرف ایک گاڑی فروخت ہوئی۔
اس معاملے پر تبصرہ کرتے ہوئے ایک کسٹمز عہدیدار نے کہا کہ مارکیٹ سے زیادہ قیمت ہونے کی وجہ ان کے فیچرز ہیں، اس کے باوجود ان کا کہنا تھا کہ ایک اور نیلامی 25 اکتوبر کو I-9 ڈرائی پورٹ پر کی جائے گی کیونکہ وزیر اعظم ہاؤس میں لوگوں کی محدود تعداد ہی آ سکتی ہے۔
وزیر اعظم کی سادگی مہم کو نظر میں رکھتے ہوئے قومی اسمبلی کا سیکریٹریٹ بھی 24 اکتوبر کو استعمال شدہ گاڑیوں کی نیلامی کرنے جا رہا ہے۔ واضح رہے کہ میڈيا رپورٹوں کے مطابق اب تک گزشتہ نیلامی میں کامیابی حاصل کرنے والے بولی کنندگان کو کوئی این او سی جاری نہیں کیا گیا۔
تازہ ترین خبروں کے لیے آتے رہیے۔
