پاکستان ایسوسی ایشن آف آٹوموٹِو پارٹس اینڈ ایکسیسریز مینوفیکچررز (PAAPAM) کی جانب سے منعقدہ پاکستان آٹو شو 2019ء میں پاک سوزوکی کی جانب سے کچھ نیا پیش کرنے کی خبریں ہر طرف گردش کر رہی ہیں۔ اس کا امکان بہت زیادہ ہے کہ کمپنی سوزوکی آلٹو 2019ء ہیچ بیک ویریئنٹس کی رونمائی کرے۔
عوام کو اندازے لگانے پر مجبور کرنے والے پاک سوزوکی نے تقریب کے دوران سب کو “2019ء کی سب سے بڑی پیشکش” دیکھنے کے لیے مدعو کیا ہے۔ ایک فیس بک پوسٹ میں کمپنی نے کہا کہ “12 سے 14 اپریل تک ایکسپو سینٹر کراچی آئیں اور PAPS 2019 میں سال 2019ء کی سب سے بڑی پیشکش دیکھیں۔ سوزوکی پاکستان ملک بھر میں مجاز ڈیلرشپس کے سب سے بڑے نیٹ ورک کے ساتھ آپ کا بھروسہ مند پارٹنر بننے پر فخر محسوس کرتا ہے۔”
پاک ویلز کو باوثوق ذرائع سے پتہ چلا ہے کہ پاک سوزوکی آٹو شو کے دوران 660cc آلٹو کے تین ویریئنٹس پیش کرے گا۔ ان میں شامل ہیں:
سوزوکی آلٹو VX (بغیر AC کے)
سوزوکی آلٹو VXR (AC کے ساتھ)
سوزوکی آلٹو VXL AGS (AC اور آٹومیٹک ٹرانسمیشن کے ساتھ)
ابتدائی طور پر سوزوکی 660cc آلٹو 2019ء کی بکنگ صرف کارپوریٹ کلائنٹس کے لیے کھولی گئی۔پاک سوزوکی کے ڈیلرز میں سے ایک نصیر آٹوز کہتا ہے کہ سوزوکی آلٹو2019ء کی ایڈوانس کارپوریٹ بکنگ کے لیے 5 لاکھ روپے لیے جا رہے ہیں۔ ڈلیوری لانچ کے بعد ہی شروع ہوگی۔
لانچ جون میں
مزید بتایا گیا کہ پاک سوزوکی جون 2019ء میں تین آلٹو ویریئنٹس متعارف کروائے گا۔ اس کے بعد سوزوکی 660cc آلٹو کی قیمتوں کا اعلان بھی لانچ کے دوران ہوگا۔ ایک اندازے کے مطابق سوزوکی آلٹو 2019ء کے ویریئنٹس کی قیمتیں 8 سے 12 لاکھ کے درمیان ہوں گی۔
ہمیں پہلے پتہ چلا تھا کہ پاک سوزوکی نے پاکستان میں اپنی 660cc آلٹو کی پیداوار شروع کردی ہے۔ ذرائع کے مطابق پاک سوزوکی پرزوں کی فراہمی کا شیڈول پہلے ہی اپنے وینڈرز کو پیش کر چکا ہے اور پرزوں کے آرڈرز بھی فراہم ہونا شروع ہوگئے ہیں۔
پاک سوزوکی نے اپنی مشہورِ زمانہ 800cc ہیچ بیک مہران کو 30 سال بعد بند کردیا کہ جو کمپنی کی سب سے زیادہ فروخت ہونے والی گاڑی تھی اور اس کے بجائے اپنے صارفین کو سوزوکی آلٹو 660cc پیش کر رہا ہے۔
سوزوکی آلٹو اس وقت اپنی 8ویں جنریشن میں ہے اور پاکستان میں بھی وہی 8ویں جنریشن کی صورت پیش کی جا رہی ہے، لیکن فیچرز مختلف ہو سکتے ہیں۔ ہو سکتا ہے ہمیں JDM آلٹو میں دستیاب فیچرز نہ ملیں کہ جو لوگ ویسے ہی باہر سے درآمد کر رہے ہیں۔ بہرحال، پہلے سے کچھ بھی کہنا قبل از وقت ہوگا۔
مزید توقعات کیا؟
چند وینڈرز کے مطابق گاڑی کی اسمبلنگ کم از کم 50 فیصد مقامی پرزوں کے ساتھ شروع ہو جائے گی۔ پاکستان میں پرزوں کی زیادہ لوکلائزیشن (70 فیصد) کی وجہ سے وینڈرز پر منحصر مضبوط انڈسٹری بنانے میں مہران جیسی چھوٹی گاڑیوں نے اہم کردار ادا کیا۔ اس لیے انہیں سہولت دینے کے لیے پاک سوزوکی نے مبینہ طور پر تقریباً 80 فیصد مہران وینڈرز کو اپنی نئی آلٹو کے پرزے تیار کرنے میں شریک کیا۔ ان سب کے ساتھ ساتھ آلٹو کی قیمت بھی پاکستان میں اس کے مستقبل کو طے کرنے میں اہم ترین عنصر ہوگی کہ جہاں نئے ادارے آہستہ آہستہ قدم جما رہے ہیں۔
کئی معروف بینک، انشورنس اور فائنانسنگ کمپنیاں بھی پاکستان آٹو پارٹس شو 2019ء میں اپنی خاص سروسز اور اپنے بہترین مالی سودوں کے ساتھ موجود ہوں گی۔
جہاں تک آلٹو کی تعارفی قیمت کا تعلق ہے، امریکی ڈالر کے مقابلے میں پاکستانی روپے کی گھٹتی ہوئی قدر نے کمپنی پر بہت زیادہ دباؤ ڈالا ہے ۔ پھر بھی یہ اسٹیک ہولڈرز کے لیے بہترین موقع ہے کہ وہ اپنی مصنوعات اور سروسز کے ذریعے مقامی آٹو سیکٹر کی صلاحیت ظاہر کریں۔
تب تک سوزوکی آلٹو کی رونمائی کے حوالے سے تمام تفصیلات جاننے کے لیے PakWheels.com پر آتے رہیے۔
