کچھ روز قبل پاک سوزوکی نے کلٹس کا لمیٹڈ ایڈیشن پیش کیا۔ اس کی قیمت 10,99,000 (دس لاکھ ننانوے ہزار) روپے رکھی گئی۔ پہلے سے دستیاب یورو II کلٹس کی قیمت 10,44,000 (دس لاکھ چوالیس ہزار) روپے جبکہ سی این جی کلٹس کی قیمت 11,19,000 (گیارہ لاکھ انیس ہزار) روپے ہے۔ پاکستان میں سوزوکی کلٹس کی قیمت ہمیشہ زیر بحث رہی ہے۔ بعض شائقین کے خیال میں ایک دہائی پرانی گاڑی کی یہ قیمت بالکل بھی جائز نہیں۔ شاید یہی وجہ ہے کہ پاک سوزوکی کلٹس کو ختم کر کے نئی سلیریو لانے والا ہے۔ لیکن نئی گاڑی کی آمد سے قبل وہ آخری بار کلٹس کی فروخت میں اضافے کی کوشش کے طور پر لمیٹڈ ایڈیشن پیش کر رہا ہے۔
جب میں نے پاک سوزوکی کی ویب سائٹ پر کلٹس کے انجن اور ٹرانسمیشن سے متعلق معلومات حاصل کرنے کی کوشش کی تو وہاں یہ درج تھا:
کلٹس میں طاقتور انجن لگایا گیا ہے جو برق رفتاری، ہموار سفر اور ایندھن کی بچت کو یقینی بناتا ہے۔
سوزوکی کلٹس کا انجن اگلے حصے میں لگایا جاتا ہے اور گاڑی بھی اگلے پہیوں کی قوت پر سفر کرتی ہے۔ اسے چار سلنڈر 1 ہزار سی سی انجن سے منسلک 5 اسپیڈ گیئر باکس کے ساتھ پیش کیا جاتا ہے۔ انجن 60 بریک ہارس پاور اور 74 نیوٹن میٹر ٹارک فراہم کرتا ہے۔ مجموعی طور پر گاڑی کا ڈیزائن بہت پرانا ہے اور اس کی تیاری میں استعمال ہونے والا سامان بھی غیر معیاری ہے۔
آئیے اب آپ کو ایک اور کار ساز ادارے کی ہیچ بیک سے متعلق بتاتے ہیں جسے V2 کا نام دیا گیا ہے۔ چینی کار ساز ادارے FAW پاکستان میں الحاج FAW موٹرز (AHFM) کے نام سے کام کرتا ہے اور V2 اسی کا برانڈ ہے۔ FAW کا شمار چین کے نامور کار ساز اداروں میں کیا جاتا ہے جو شعبے کے دیگر معروف ناموں بشمول ووکس ویگن، مزدا، جنرل موٹرز اور ٹویوٹا کے ساتھ مل کر چین میں کام کرتے ہیں۔ AHFM نے سال 2013 میں اپنی مذکورہ ہیچ بیک کی پہلی جنریشن پاکستان میں متعارف کروائی۔ اس کی قیمت 10,49,000 (دس لاکھ اننچاس ہزار) روپے ہے۔
یہ بھی پڑھیں: کیا FAW کی گاڑیاں سوزوکی کا مقابلہ کرسکتی ہیں؟
دونوں مذکورہ گاڑیوں کا عامیانہ تقابل کیا جائے تو V2 کو کئی اعتبار سے کلٹس پر سبقت حاصل ہے۔ V2 نہ صرف قیمت میں کلٹس لمیٹڈ ایڈیشن سے کم ہے بلکہ انجن و دیگر پرزہ جات اور انداز میں بھی جدت سے ہم آہنگ ہے۔ یہ ٹویوٹا وِٹز سے بہت زیادہ میل کھاتی ہے خاص طور پر انجن اور انداز میں تو دونوں بالکل ایک ہی جیسی ہیں۔
کلٹس کی اگر بات کریں تو اس کا یورو II اور سی این جی ویریئنٹ نسبتاً کم قیمت ہے۔ چونکہ یہ ایک طویل عرصے سے پاکستان میں دستیاب ہے اس لیے اس پرزہ جات اور دیکھ بھال بھی سستی ہے۔ پاکستان بھر کے مکینکس اس گاڑی سے مانوس ہوچکے ہیں اور اس کے مسائل آنکھ بند کر کے حل کردیتے ہیں۔ FAW وی 2 کو عوامی مقبولیت کے اس مقام پر آنے کے لیے ابھی کافی وقت درکار ہوگا۔
چونکہ رواں سال کلٹس کا دور ختم ہو رہا ہے، اس لیے دیکھنا ہوگا کہ اس کی فروخت میں تسسلس برقرار رہتا ہے یا عوام نئی گاڑی کی خریداری میں زیادہ دلچسپی رکھتے ہیں۔
سوزوکی کلٹس
FAW V2
سوزکی کلٹس بمقابلہ FAW V2
