ہم اپنے اردگرد دیکھتے ہی رہتے ہیں کہ گاڑیوں کے شوقین اپنی کاروں کو موڈیفائی کرکے ویسا بنانے کی کوشش کرتے ہیں جیسی گاڑی وہ اصل میں خریدنا چاہتے تھے لیکن جیب اجازت نہیں دیتی تھی۔ زیادہ تر ایسے اقدامات نامکمل ہی رہتے ہیں اور جیسا ارادہ کیا جاتا ہے ویسی شکل و صورت نہیں پاتے۔ لیکن ایسے سارے منصوبے پیسوں کا ضیاع نہیں ہوتے بلکہ کبھی کبھی تو بہت ہی زبردست چیز بن جاتی ہے۔ کچھ یہی متحدہ عرب امارات کے ایک گیراج میں ہوا ہے کہ جہاں کسی نے مرسڈیز جی-ویگن کی نقل پر مبنی باڈی کٹ کو سوزوکی جمنی پر لگانے کا فیصلہ کیا۔
سوزوکی جمنی آغاز سے ہی اپنے چوکور ڈبّا ڈیزائن کی وجہ سے سرخیوں میں آئی کہ جو کسی حد تک جی-ویگن سے ملتی جلتی ہے۔ اس گاڑی میں ایسا کچھ خاص نہیں ہے لیکن اسے ایک طرف رکھ کر ہم اصل موضوع کی طرف بڑھتے ہیں اور ایک نظر ڈالتے ہیں اس شاہکار پر کہ جس کو دیکھ کر تو میرے دل میں بھی خواہش اٹھ رہی ہے کہ یہ گاڑی میرے ہاتھ لگ جائے اور میں اسے دن بھر چلاتا رہوں۔ واقعی! یہ بہت ہی خوبصورت لگ رہی ہے۔
آپ اس کے اگلے حصے پر ہائی ڈیف دائرہ نما ہیڈلائٹس دیکھ سکتے ہیں جو بالکل ویسی ہی ہیں جیسی مرسڈیز میں ہوتی ہیں، ساتھ ہی فرنٹ گرِل کے جس کے درمیان میں مرسڈیز کے بجائے سوزوکی کا لوگو ہے۔ یہ لوگو بھی جی-ویگن سے متاثر ہوکر کچھ تبدیل کرکے بنایا گیا ہے۔ اس کو ذرا بڑے ویل آرچز بھی ملیں گے جو اس ننھی سی جمنی کو بڑی جاندار صورت دیتے ہیں۔ پھر بڑے چمکدار الائز اسے ‘بدمعاشوں’ والی شکل دیتے ہیں جبکہ کالے رنگ کے اگلے میٹل گارڈز اور سائیڈ پر ربڑ اسٹرپس جیسی چھوٹی موٹی چیزی بھی اسے ایک چھوٹی پریمیم SUV جیسی فیل دیتی ہیں۔ ان سب سے بڑھ کر سائیڈوں پر لگے ہوئے ایگزاسٹ پائپس نے تو حیران ہی کردیا ہے۔ ان میں سے ویسی آگ اگلتی آواز تو نہیں جو V8 یا جی-ویگن میں ہوتی ہے لیکن پھر بھی جمنی کی مجموعی شکل کو بہتر بنانے کے لیے یہ خوبصورت اضافہ ضرور ہیں۔
کارکردگی کی بات کریں تو اس بارے میں ہمارے پاس کچھ معلومات تو نہیں ہیں لیکن کیونکہ اصل میں یہ ظاہری شکل و صورت کو بہتر بنانے کے لیے کیا گیا ہے اس لیے 1.5L کے چھوٹے سے انجن سے کوئی بڑی کارکردگی نہ مانگیں۔ یعنی جمنی کا مالک اسے اصلی جی-ویگن کی طرح بہت تیز نہیں چلا پائے گا کہ جو 4.0L کے انجن کے ساتھ آتی ہے اور صرف 6 سیکنڈوں میں 0 سے 100 کلومیٹر فی گھنٹے کی رفتار پا لیتی ہے جو ہر لحاظ سے بہت تیز ہے۔ ویسے یہ پہلا موقع نہیں ہے کہ ہم نے جمنی کو جی-ویگن کا روپ دھارتے ہوئے دیکھا ہو۔ پچھلے سال سوزوکی جمنی کے لیے ایک کِٹ دستیاب تھی کہ جو اسے نئی جنریشن کی جی-ویگن سے ملتی جلتی شکل و صورت دیتی ہے۔ آپ تصویریں دیکھ کر اندازہ کرلیں۔
