بھارت کے دارالحکومت نئی دہلی میں آٹو ایکسپو 2016 پورے زور و شور سے جاری ہے۔ یہ دنیا کا دوسرا اور ایشیا کا سب سے بڑا گاڑیوں کا میلہ ہے۔ دنیا کے کئی ممالک سے تعلق رکھنے والے کار ساز ادارے میلے میں شرکت کے لیے بھارت آتے ہیں۔ یہ ادارے اپنے ہمراہ نت نئی گاڑیاں اور موٹر سائیکلوں کے ماڈل بھی لاتے ہیں جن سے ایکسپو کے دوران پردہ اٹھایا جاتا ہے۔ 3 فروری سے شروع ہونے والی آٹو ایکسپو 2016 کا اختتام 9 فروری ہوگا۔
آٹو ایکسپو 2016 کے پہلے دن جہاں ٹویوٹا اور ماروتی کی نئی گاڑیاں پیش کی گئیں وہیں موٹر سائیکلوں کے میدان میں سوزوکی حیاتے EP کی آمد کا بھی اعلان ہوا۔ یہ موجودہ سوزوکی حیاتے کا بہتر ماڈل ہے۔ اسے عوام کے سامنے پیش کردیا گیا ہے تاہم قیمت نہیں بتائی گئی۔ امید ہے کہ اس حوالے سے جلد معلومات سامنے آجائیں گی۔
سوزوکی انڈیا اس موٹر سائیکل کو سرخ، سیاہ اور بھورے رنگ میں پیش کرنے کا ارادہ رکھتی ہے۔ اس بائیک میں سیٹ اور ویل بیس کو زیادہ طول دیا گیا ہے۔ یہ موٹر سائیکل بغیر ٹیوب والے ٹائر اور قابل ترتیب ریئرشاکس کے ساتھ پیش کی جائے گی۔
یہ بھی پڑھیں: ایٹلس ہونڈا 100 ملین ڈالر سرمایہ کاری: کیا جدید بائیک کا خواب پورا ہوگا؟
اس میں سوزوکی نے اپنی بہترین ٹیکنالوجی کا حامل انجن سوزوکی ایکو پرفارمنس استعمال کیا ہے۔ اس بائیک کی خاص بات کم ایندھن میں زیادہ سفر کی قابلیت ہے۔ کارکردگی میں اضافے کے لیے انجن کے پسٹن اور سلینڈر کو بھی بہتر بنایا گیا ہے۔ گو کہ یہ موٹر موجودہ سوزوکی حیاتے میں بھی استعمال کی گئی ہے تاہم EP کے لیے اسے مزید طاقتور بنایا گیا ہے۔ یہ 113 سی سی سنگل پسٹن انجن ہے جو 8.8 بریک ہارس پاور اور 9.3 نیوٹن میٹر ٹارک فراہم کرتا ہے۔
گو کہ پاکستان میں سوزوکی GD110 نسبتاً نئی موٹر سائیکل ہے تاہم GS150 کو یہاں آئے ایک عرصہ گزرچکا ہوگا۔ اب وقت ہے کہ پاک سوزوکی موٹر سائیکل کی رینج کو وسعت دیتے ہوئے حیاتے جیسی بائیکس کو بھی یہاں متعارف کروائے۔
