گاڑیوں کے شوقین افراد میں ایسے لوگ بھی شامل ہیں کہ جنہیں جدید ٹیکنالوجی اور تیز ترین لامبورگینی، فراری یا نئی مرسڈیز S کلاس کے بجائے پرانے وقتوں کی نایاب سواریاں پسند ہیں۔ اگر آپ ایسے لوگوں سے دریافت کریں کہ بھلا آپ کو 1973 کی W114 میں کیا خاص بات نظر آتی ہے تو ان کا جواب ہوگا کہ مجھے پرانی گاڑیوں کی خوشبو بہت پسند ہے۔ درحقیقت پرانی گاڑیوں کا شوق ایک ایسا احساس ہے کہ جسے لفظوں میں بیان نہیں کیا جاسکتا۔ میں خود جب پرانے وقتوں کی کوئی گاڑی دیکھتا ہوں تو سوچتا ہوں کہ اب سے 40 سال پہلے پیش کی جانے والی اس گاڑی کو کتنا منفرد سمجھا جاتا ہوگا۔ میں اکثر سوچتا ہوں کہ ان قدیم گاڑیوں کے ساتھ کیا کچھ بیت گیا۔ کتنا اچھا ہو کہ ان گاڑیوں کو زبان لگ جائے اور یہ اپنی زندگی کی کہانی ہمیں خود سنا سکیں۔ بہرحال، قدیم نادر و نایاب گاڑیوں کے شوق نے مجھے مجبور کیا کہ دنیا بھر میں مشہور 10 بہترین گاڑیوں سے متعلق جاننے کی کوشش کروں۔ اس دوران جن گاڑیوں کو میں نے سب سے زیادہ مقبول پایا ان کی فہرست اور تعارف ذیل میں موجود ہے:
1955-1963 مرسڈیز بینز 300SL گلونگ
جرمن کار ساز ادارے مرسڈیز کی پہلی SL-کلاس گراں ٹوؤرر فہرست میں یہ پہلی گاڑی رہی۔ اس کا شمار اپنے وقتوں میں بہت تیزی سے تیار اور فروخت ہونے والی گاڑیوں میں کیا جاتا ہے۔پرندوں کے پروں جیسے دروازوں والی اس گاڑی میں 2996cc انجن شامل تھا جو 212 ہارس پاور فراہم کرنے کی سکت رکھتا تھا۔ مرسڈیز 300SL کی کہانی اس لیے بھی دلچسپ ہے کہ اسے گراں پری میں استعمال ہونے والی گاڑی کی طرز پر بنایا گیا تھا۔ پروں جیسے دروازوں اور کئی منفرد خصوصیات کے باعث اس گاڑی نے بہت جلد مشہوری حاصل کرلی۔اسے کثیر تعداد میں تیار کی جانے والی فیول انجکشن کی حامل پہلی گاڑی ہونے کا بھی اعزاز حاصل ہے۔ اس کے علاوہ یہ اپنے وقت کی تیز ترین گاڑی بھی قرار دی گئی تھی۔ اس کا کوپے انداز 1955 سے 1957 تک جبکہ روڈسٹر ماڈل 1957 سے 1963 تک بنایا جاتا رہا۔ مرسڈیز بینز 300SL نے 1952 میں 24 آورز آف لی مینز اور ایفلرینن مقابلوں میں بھی کامیابی حاصل کی۔
1955-1957 سیٹریون DS
یہ ایک ایسی گاڑی ہے کہ جسے ہر شوقین فرد اپنے گیراج میں رکھنا چاہے گا۔ سیٹرون DS کو تین مختلف انداز سے متعارف کروایا گیا تھا جس میں 4 دروازوں والی سیڈان، 5 دروازوں والی اسٹیشن ویگن اور 2 دروازوں والی کنورٹ ایبل شامل تھی۔ ان تین ماڈلز کو 1900cc اور 2340cc کے ساتھ پیش کیا جاتا رہا۔
سیٹریون DS کی وجہ مشہوری اس کا جدید انداز رہا جسے ایروائنامکس اصولوں کے مطابق بنایا گیا تھا۔ اس گاڑی نے معیار سفر، بہترین گرفت اور بہترین بریکنگ میں ایک نیا معیار متعارف کروایا۔ اسے ڈسک بریکس کی حامل پہلی گاڑی ہونے کا بھی اعزاز حاصل ہے۔سیٹریون DS کی بدقسمتی رہی کہ اسے دوسری جنگ عظیم کے فوری بعد پیش کیا گیا اور اسی لیے ابتدا میں بہت کم گاڑیاں فروخت ہوسکیں۔
یہ بھی پڑھیں: بالی ووڈ ستاروں کی پر تعیش اور مہنگی گاڑیاں
1950-1981 شیورلیٹ بیل ایئر
امریکی ادارے شیورلیٹ کی یہ گاڑی 1950 سے 1981 تک تیار اور فروخت کی جاتی رہی۔ ابتدا میں اسے 2 دروازوں والی سیڈان کے طور پر پیش کیا گیا۔ شیورلیٹ بیل ایئر کی دوسری جنریشن کو سب سے زیادہ مقبولیت حاصل ہوئی۔ اسے اپنے وقت کی بہترین پرتعیش گاڑی سمجھا جاتا تھا جو سائز میں دیگر گاڑیوں سے زیادہ لمبی تھی۔ آرامدے سفر اور بہترین معیار کے علاوہ اس میں برق رفتار انجن بھی شامل تھا جس کی مدد سے یہ گاڑی صرف 12 سیکنڈ میں 0 سے 100 کلومیٹر کی رفتار حاصل کرسکتی تھی۔ شاید آج یہ رفتار آپ کو اتنی تیز معلوم نہ ہو لیکن ساٹھ یا پینسٹھ سال قبل یہ ناقابل یقین رفتار سمجھی جاتی تھی۔
1974-1989 لامبورگینی کاؤنٹیچ
اپنے منفرد اور جارحانہ انداز کی وجہ سے دنیا بھر میں شہرت کی بلندیوں کو چھونے والی لامبورگینی کاؤنٹیچ 1974 سے 1990 تک تیار کی جاتی رہی۔ اس میں اوسط سائز کا V12 انجن شامل تھا اور یہی وجہ ہے کہ اسے اسپورٹس کار شمار کیا جاتا ہے۔ یہ صرف اپنے وقت کی تیز ترین ہی نہیں بلکہ خوبصورت ترین گاڑیوں میں بھی سرفہرست رہی۔ اسپورٹس کار انٹرنیشنل نے لامبورگینی کاؤنٹیچ کو 1970 کے عشرے کی بہترین اسپورٹس کار کا اعزاز بھی دیا۔
یہ بھی پڑھیں: کراچی میں لامبورگینی کاؤنٹیچ کی ہوبہو نقل تیار
1961-1969 لنکولن کونٹی نینٹل
پرتعیش گاڑیاں بنانے والے امریکی ادارے لنکولن کی اس گاڑی کو اب تک پیش کی جانے والی بہترین پرتعیش گاڑیوں میں شمار کیا جاتا ہے۔ لنکولن کونٹی نینٹل کو 7000cc، 7500cc کے علاوہ 7600cc وی8 انجن کے ساتھ بھی پیش کیا جاتا رہا۔ اپنے دلچسپ انداز کی وجہ سے اس گاڑی نے بہت سے شائقین کو متوجہ کیا۔ صرف یہی نہیں بلکہ اس گاڑی کو ہالی ووڈ کی متعدد فلموں میں جلوہ گر ہونے کا بھی اعزاز حاص ہوا جن میں انسپکٹرگیجٹ، دی میٹرکس، گولڈ فنگر اور اسپائڈر مین 2 شامل ہیں۔
1949 کیڈیلاک سیریز 62
امریکی ادارے کیڈیلاک میں شامل 5400cc انجن 160 ہارس پاور فراہم کرنے کی صلاحیت رکھتا تھا۔ یہ وہ پہلی گاڑی تھی کہ جس میں ہیٹر بھی شامل کیا گیا تاکہ یخ بستہ علاقوں میں بھی مسافروں کو بہترین سفری تجربہ فراہم کیا جاسکے۔ اس منفرد خصوصیت نے کیڈیلاک سیریز 62 کو اپنے وقت کی سب سے زیادہ فروخت ہونے والی کیڈیلاک کا اعزاز دلوایا۔
1963-1965 بویک رائیویرا
گاڑیاں بنانے والی امریکی کمپنی جنرل موٹرز کے ذیلی ادارے بویک کی یہ گاڑی دیگر روایتی گاڑیوں سے کافی مختلف قرار دی جاتی تھی۔ اس میں 6600cc اور 7000cc نیل ہیڈ V8 انجن شامل تھا۔ موٹر ٹرینڈ کے مطابق یہ گاڑی صرف 8 سیکنڈ میں 0سے 100 کلومیٹر کی رفتار حاصل کرسکتی تھی۔
1957 کیڈیلاک ایلڈوراڈو بروگھم
امریکی ادارے کیڈیلاک کی یہ گاڑی 1950 کی دہائی میں سب سے زیادہ فروخت ہونے والی گاڑیوں میں سے ایک رہی۔ 6000cc وی6 انجن کی حامل اس گاڑی کو بہترین پرتعیش گاڑی شمار کیاجاتا تھا۔ اس کا اندازہ کیڈیلاک ایلڈوراڈو بروگھم کی قیمت سے بھی لگایا جاسکتا ہے کہ جو اب سے تقریباً 60 سال پہلے 13 ہزار ڈالر مقرر کی گئی تھی۔
1953-1964 آسٹن ہیلے 3000
یہ برطانیہ میں 1959 سے 1967 تک تیار کی جانے اسپورٹس کار ہے جسے “بگ ہیلے” بھی کہا جاتا ہے۔ آسٹن ہیلے 3000 میں 2900cc انجن شامل تھا۔ اسے 2 نشستوں اور 4 نشستوں والی گاڑی کے طور پر 2 مختلف انداز سے پیش کیا گیا۔ یہ اپنے وقت کی مشہور ترین گاڑیوں میں سے ایک رہی۔
یہ بھی پڑھیں: جیمز بونڈ 007 کی نئی فلم میں اربوں روپے کی گاڑیاں تباہ
1965-1966 شیلبی GT350
جی ٹی 350 ماڈلز میں 1965-66 کی گاڑیوں کو سب سے چھوٹا اور وزن میں ہلکا قرار دیا جاتا تھا۔ یہی وجہ ہے کہ ان گاڑیوں کو عام طور پر “کوبراز” کے نام سے بھی یاد کیا جاتا ہے۔ اور اسی اعتبار سے ان گاڑیوں میں شامل انجن کو “کوبرا ہائی-رائزر” کا نام دیا گیا۔ اس گاڑی میں 4700cc ونڈسور V8 انجن شامل تھا۔
