چار پہیوں والی سواری میں ABS کو موثر طور پر استعمال کیا جائے تو یہ بہت زیادہ مفید ثابت ہوتا ہے۔ یہ بیک وقت کئی کام کرتا ہے جس سے ڈرائیور کو ہنگامی صورتحال سے نمٹنے میں مدد ملتی ہے۔ اچانک بریک لگانے پر ABS نہ صرف گاڑی کے پہیوں کو فوراً روکتا ہے بلکہ اسٹیئرنگ اور گاڑی پر ڈرائیور کی گرفت کو یقینی بناتا ہے۔ اس سہولت سے بھرپور فائدہ اٹھانے کے لیے ضروری ہے کہ ڈرائیور صاحبان ABS کے درست طریقہ استعمال سے بخوبی واقف ہوں۔ نیشنل سیفٹی کونسل نے اس حوالے سے چند تجاویز پیش کی ہیں جنہیں ABS ایجوکیشن الائنس سے اخذ کیا گیا ہے۔
کرنے والے کام
بریک لگاتے ہوئے اپنا پیر مستقل بریک پر ہی رکھیں۔ بریک پر پورا اور مستقل دباؤ ڈالے رکھیں تب ہی چاروں پہیوں کے ABS درست طریقے سے فعال ہوں گے۔ بریک کو دبانے اور پھر چھوڑنے سے پرہیز کریں چاہے وہ خود ہی اوپر نیچے کیوں نہ ہورہا ہو۔ ہلکے ٹرکس میں پچھلے پہیوں پر ABS لگایا جاتا ہے جبکہ اگلے پہیوں پر عام بریک ہی موجود ہے۔ ایسی صورت میں ڈرائیور کو چاہیے کہ وہ بریک پر قدرے کم دباؤ رکھے تاکہ اگلے پہیے آہستہ آہستہ گھومتے ہوئے ساکت ہوجائیں۔
مناسب فاصلے پر بریک لگائیے۔ عام حالات میں تین سیکنڈ کا اصول استعمال کیجیے اور اگلی گاڑی سے مناسب فاصلہ رکھیے۔ برسات یا دیگر غیر معمولی صورتحال درپیش ہو تو گاڑیوں کے درمیان زیادہ فاصلہ رکھیے تاکہ ضرورت پڑنے پر بریک لگانا ممکن ہو۔
مسلسل مشق انسان کو ماہر بناتی ہے اس لیے ABS کے بہترین استعمال کے لیے مشق کیجیے۔ اس طرح آپ ABS سے مانوس ہوجائیں گے اور اسے لگانے پر آنے والے ردعمل کا بھی اندازہ لگا سکیں گے۔ پارکنگ کی خالی جگہیں یا دیگر کھلے میدانوں میں یہ مشق باآسانی کی جاسکتی ہے۔
گاڑی کے ساتھ دیا جانے والا ہدایت نامہ بغور پڑھیے۔ خاص کر اس میں ABS کے استعمال سے متعلق ہدایات کو ازبر کرلینا بہت اہم ہے۔
چار پہیوں اور پچھلے پہیوں پر نصب ABS میں فرق ہوتا ہے، اسے جاننا بہت ضروری ہے۔ عام طور پر مسافر گاڑیوں کے چاروں پہیوں پر ABS لگایا جاتا ہے تاکہ ہنگامی صورتحال میں جلد از جلد بریک کام دکھائے۔ جبکہ پچھلے پہیوں پر ABS کا استعمال زیادہ تر کم وزنی ٹرکس ہی میں دیکھا گیا ہے جس کا مقصد ہنگامی بریک کی صورت میں گاڑی کے پھسلنے یا الٹ جانے سے محفوظ رکھنا ہے۔
نہ کرنے والے کام
جس گاڑی میں ABS لگا ہو، اسے بہت زیادہ تیز رفتاری سے چلانا اتنا ہی خطرناک ہے کہ جتنا ABS کے بغیر چلنے والی گاڑی میں ہوتا ہے۔ خطرناک موڑ کاٹنا، غیر ضروری اور تیزی سے لین تبدیل کرنا یا پھر گاڑی کو تیز رفتاری کے ساتھ اِدھر اُدھر لڑھکانا کسی بھی گاڑی میں محفوظ قرار نہیں دیا جاسکتا۔
بریک کو دبانے اور چھوڑنے کا عمل جلدی جلدی دہرانے سے پرہیز کریں۔ اس سے گاڑی میں موجود ABS کی سہولت فعال اور غیر فعال ہوتی رہتی ہے۔ اگر آپ بریک پر مستقبل دباؤ دیتے رہیں تو ABS زیادہ جلدی فعال ہوتا ہے اور گاڑی سنبھالنا بھی آسان ہوجاتا ہے۔
گاڑی کو سنبھالنا مت بھولیے۔ ہنگامی صورتحال میں ABS ڈرائیور کو گاڑی سنبھالنے میں مدد ضرور کرتا ہے لیکن بذات خود گاڑی کو نہیں سنبھالتا۔ اس بات کو ہمیشہ یاد رکھیے۔
نامانوس آواز یا / اور بریک پیڈل کے اٹکنے سے نہ گھبرائیں۔ ABS کی حامل گاڑیوں میں بریک لگانے پر ایسی آوازیں سنائی دے سکتی ہیں جو عام طور پر بریک لگانے پر نہیں آتیں۔ ان آوازوں سے پریشان ہونے کے بجائے اطمینان ہونا چاہیے کہ ABS درست کام کر رہا ہے۔
ABS کے ساتھ ڈرائیونگ کے لیے تجاویز
چاروں پہیوں پر اینٹی لاک بریکس استعمال کرتے ہوئے ہمیشہ “بریک اور اسٹیئر” کا کلیہ ذہن میں رکھیں۔ ABS کے ساتھ آپ کو بس اتنا ہی کرنا ہے اور باقی کا کام یہ سسٹم خود کرے گا۔ بس آپ نے بریک پیڈل پر دباؤ ڈالنا ہے اور اسٹیئرنگ ویل کو تھامے رکھنا ہے جب تک کہ گاڑی مکمل طور پر رک نہیں جاتی۔ اپنا پیر بریک پیڈل سے بالکل مت ہٹائیں اور نہ ہی بریک پر دباؤ کم کریں کیوں کہ اس صورت میں ABS غیر فعال ہوسکتا ہے۔
یاد رکھیں کہ بریک لگاتے ہوئے اسٹیئرنگ ویل کو قابو رکھنا بھی اہم ہے۔ یہ بات بھی مدنظر رکھیں کہ آپ تصادم سے بچنے کے لیے گاڑی کا اسٹیئرنگ کس جانب گھما سکتے ہیں۔ لیکن اس دوران بھی بریک پیڈل سے پاؤں ہٹنے نہ پائے۔ خیال رہے کہ گیلے اور نمی والے رستوں پر گاڑی رکنے میں زیادہ وقت لیتی ہے بنسبت خشک اور ریتیلی جگہ کے۔
ہمیشہ احتیاط سے گاڑی چلائیں کیوں کہ ABS صرف اسی وقت موزوں ہے کہ جب اس کا درست استعمال کیا جائے۔ یہ ڈرائیور کو برق رفتاری اور جارحانہ انداز سے گاڑی چلانے سے نہیں روکتا اور نہ ہی اگلی گاڑی سے مناسب فاصلہ رکھنے کی تنبیہ کرتا ہے۔ اس کے علاوہ یہ ہنگامی صورتحال میں بریک لگانے پر گاڑی کو پھسلنے یا لڑھکنے سے محفوظ رکھنے کی ضمانت بھی نہیں دیتا۔ لہٰذا اینٹی لاک سسٹم کے ساتھ بہت تیزی سے اسٹیئرنگ گھمانے سے پرہیز کرنا بھی ضروری ہے۔
اینٹی لاک بریک استعمال ہوتے ہوئے گاڑی میں مختلف آواز اور تھوڑی بہت لرزش کا احساس ہوتا ہے۔ یہ دونوں چیزیں بیان کرتی ہیں کہ ABS اپنا کام کر رہا ہے اس لیے ایسی صورتحال کی توقع رکھیے۔
اینٹی لاک بریک سسٹم کی حامل گاڑی ریتیلی، خشک اور برف سے ڈھکی ہوئی شاہراہ پر عام بریک کی نسبت زیادہ جلدی گاڑی روک دیتا ہے۔ لیکن نمی والے، گیلے یا تازہ تازہ برسات یا برف باری سے متاثرہ علاقوں میں بریک استعمال کرنے پر گاڑی کچھ وقفے کے بعد تھوڑا آگے جا کر رکتی ہے۔ چونکہ ایسے رستوں پر پہیوں کے جامن ہوجانے کا امکان کم ہوتا ہے اس لیے ڈرائیور باآسانی اپنے آس پاس بالخصوص سامنے کی طرف موجود مثلاً کسی گاڑی وغیرہ کو بخوبی دیکھ سکتا ہے۔
یہ بات بھی ذہن نشین رکھنی چاہیے کہ چاروں پہیوں پر ABS اور صرف پچھلے پہیوں پر ABS میں فرق ہے۔ چاروں پہیوں پر اس نظام کی صورت میں ڈرائیور کو گاڑی پر بہتر گرفت ملتی ہے۔ یہ نظام رکھنے والے ڈرائیور صاحبان کو جلد از جلد گاڑی رکنے کی توقع رکھنی چاہیے او اس کے لیے صرف پیڈل پر مستقل دباؤ برقرار رکھنا ہے۔
ہلکے وزن والے ٹرکس میں صرف پچھلے پہیوں پر اینٹی لاک بریکنگ کا نظام لگایا جاتا ہے۔ جبکہ اگلے پہیوں پر روایتی بریکس ہی نصب کیے جاتے ہیں۔ ایسی صورت میں ڈرائیور کو بریک پیڈل پر بہت زیادہ دباؤ برقرار رکھنے کی ضرورت نہیں بلکہ اطمینان سے لگایا جانے والا تھوڑا دباؤ بھی گاڑی پر گرفت رکھنے کے لیے کافی ہوتا ہے۔
یہ جاننا بھی بہت آسان ہے کہ آیا آپ کی گاڑی میں اینٹی لاک بریکس ہیں یا نہیں۔ اپنی گاڑی میں ABS کی موجودگی کے بارے میں جاننے کے لیے ڈیش بورڈ پر ABS کا نشان دیکھیے جو کہ انجن اسٹارٹ کرنے والی جگہ کے نزدیک ہی موجود ہوتا ہے۔ اس کے علاوہ آپ گاڑی کے ساتھ ملنے والا ہدایت نامہ بھی دیکھ سکتے ہیں یا پھر گاڑیوں کی معلومات رکھنے والے فرد سے بھی معلوم کرسکتے ہیں۔
