ٹویوٹا اِنڈس کرولا 2000ء اپنے مالک کی نظر سے: خصوصیات و تفصیلات

ٹویوٹا انڈس کرولا پاکستان میں بہت زیادہ مقبول رہی ہے اور ہاتھوں ہاتھ فروخت ہوئی ہے۔ یہ آج بھی ایک  ہردِل عزیز فیملی سیڈان ہے جس میں باآسانی پانچ افراد بیٹھ سکتے ہیں اور آرام دہ انداز میں سفر کر سکتے ہیں۔ جس گاڑی کا آج جائزہ لیا جا رہا ہے وہ ٹویوٹا اِنڈس کرولا کا 2000ء ماڈل ہے۔ انڈس کرولا کی پیداوار 1993ء سے 2001ء تک جاری رہی۔ 

انڈس کرولا کے بہت سے ویرینٹس تھے۔ 1300cc  کے زمرے میں اس کے دو ویرینٹس تھے – GL اور XE۔ GLi ویرینٹ 1600cc انجن اور 2.0D  میں 2000cc انجن کے ساتھ آیا۔ 2.0D اسپیشل ایڈیشن، XEG اور 2.0DG ویرینٹس بھی تھے۔ 1993ء میں یہ گاڑی 4,40,000 روپے میں متعارف کروائي گئی تھی اور 20001ء میں خاتمے کے وقت اس کی قیمت 8,00,000 روپے تھی۔ یہ گاڑی بجٹ کار کی کیٹیگری میں آتی ہے اور ایک اچھی کنڈیشن کی انڈس کرولا آج بھی 6,50,000 روپے سے 8,50,000 روپے کی پڑے گی۔ جس گاڑی کا یہاں جائزہ لیا جا رہا ہے وہ موڈیفائیڈ ہے اور اسٹینڈرڈ کنڈيشن میں نہیں ہے۔ 1993ء سے 2001ء تک مقامی اور جاپان سے درآمد شدہ دونوں ماڈلز پاکستان میں دستیاب رہے۔ پاکستان میں کرولا  بہت مقبول ہے اور یہی وجہ ہے کہ اب بھی انڈس کرولا پاکستان میں بڑی ڈیمانڈ رکھتی ہے۔ 

ایکسٹیریئر اور انٹیریئر: 

انڈس کرولا کا بیرونی ڈیزائن انداز سادہ لیکن دلکش ہے۔ یہ گول کناروں کے ساتھ آتی ہے اور عام سیڈان کی شکل و صورت رکھتی ہے۔ ہیڈ لائٹس اور ٹیل لائٹس بھی گول ہیں اور سادہ قسم کی ہیں۔ ہیڈ لائٹس اور ٹیل لائٹس دونوں ہیلوجن ہیں۔ انڈس کرولا کی گراؤنڈ کلیئرنس پاکستان کی سڑکوں کے لحاظ سے کافی ہے۔ 

انٹیریئر کی خصوصیات میں پاور اسٹیئرنگ، پاور وِنڈوز، پاور مررز اور ایئر کنڈیشننگ شامل ہیں۔ پاور وِنڈوز اور پاور مررز کی خصوصیات نہ رکھنے والے ویرینٹس بھی موجود ہیں۔ انڈس کرولا انسٹرومنٹ کلسٹر میں rpm میٹر کے ساتھ بھی آتی ہے۔ اس کے اسپیکرز دروازوں میں لگے ہوئے ہیں۔ 

آگے بیٹھے مسافروں کے لیے درمیان میں کپ ہولڈرز بھی ہیں جبکہ ڈرائیور کے لیے آرم ریسٹ بھی ہے۔ ڈيش بورڈ میں کلائمٹ کنٹرول وینٹ کے ساتھ ایک چھوٹی سی ڈجیٹل گھڑی بھی لگی ہوئی ہے۔ ڈيش بورڈ کا ڈیزائن گول مول سا اور سادہ ہے، بالکل ایکسٹیریئر ڈیزائن کی طرح۔ ڈيش بورڈ ایک ہی رنگت کا ہے۔ گاڑی میں اسٹوریج کمپارٹمنٹس بھی کافی ہیں۔ ایک اوسط قد رکھنے والے شخص کے لیے آگے اور پیچھے دونوں جگہ کافی ہیڈ رُوم موجود ہے۔ انڈس کرولا ایک فیملی سیڈان ہے جو بڑی ڈِگی اور مسافروں کے لیے کافی لیگ رُوم رکھتی ہے۔ 

وڈیو جائزہ نیچے دیکھیں:

انجن اور کارکردگی:

یہ گاڑی 2000cc کا ڈیزل انجن رکھتی ہے جو کافی ٹارک کا حامل ہے اور فوری اور رواں رفتار فراہم کرتا ہے۔ انجن کے دیگر آپشنز میں 1300cc اور 1600cc ہیں جو پٹرول ہی سے چلتے ہیں۔ اس کار کا فیول ایوریج شہر کے اندر ایئر کنڈیشننگ کے ساتھ 11 کلومیٹرز اور شاہراہ پر 18 کلومیٹرز فی لیٹر ہے۔ یہ کار فرنٹ ڈِسک بریکس اور ریئر ڈرم بریکس کے ساتھ آتی ہے، جو کار کی بریکنگ کو بہتر بناتے ہیں۔ انڈس کرولا ABS بریکس نہیں رکھتی۔ انڈس کرولا مینوئل اور آٹومیٹک دونوں ویرینٹس میں آتی ہے۔ جس کار کا جائزہ لیا جا رہا ہے وہ مینوئل ٹرانسمیشن رکھتی ہے۔ کیونکہ یہ ایک پرانی کار ہے اس لیے آپ  مناسب نرخ پر مارکیٹ سے پرانے انجن کی جگہ نیا انجن لگوا سکتے ہیں۔

فیصلہ: 

انڈس کرولا کے اسپیئر پارٹس مناسب نرخوں پر مارکیٹ میں فوری اور باآسانی دستیاب ہیں۔ اس لیے اس گاڑی کی دیکھ بھال اور مرمت آسان اور سستی ہے۔ پھر مکینیکس اس گاڑی کو ملک بھر میں اچھی طرح سمجھتے اور جانتے ہیں؛ اس لیے اس گاڑی کو کہیں سے بھی ٹھیک کروایا جا سکتا ہے۔ موڈیفائی کرنے کے لیے بھی پارٹس مارکیٹ میں فوراً دستیاب ہوتے ہیں۔ پھر اس کی ری سَیل بھی بہت اچھی ہے اور آپ انڈس کرولا  کی خرید و فروخت باآسانی کر سکتے ہیں۔ البتہ ڈیزل ویرینٹس کو لمبے عرصے تک چلانے کے قابل رکھنا مہنگا پڑ سکتا ہے۔ 6,00,000 سے 8,00,000 روپے کے بجٹ میں یہ ایک بہترین فیملی سیڈان ہے۔ 

مزید ایسے ہی جائزوں کے لیے پاک ویلز پر آتے رہیے۔ اپنے خیالات نیچے تبصروں میں پیش کیجیے۔