کم عمری میں ڈرائیونگ کا معاملہ ہمارے لیے نیا نہیں ہے۔ ہم تقریباً روزانہ ہی نو عمر لڑکوں کو موٹر سائیکل اور گاڑیاں دوڑاتے دیکھتے ہیں اور اس وجہ سے ہونے والے حادثات کی خبریں بھی پڑھتے رہتے ہیں۔ لیکن بہت کم لوگ ہیں کہ جو اس مسئلے کی سنگینی کا ادراک کرتے ہوئے اس کی روک تھام کے لیے سنجیدہ ہیں۔
حال ہی میں پاک ویلز کی جانب سے آٹو انڈسٹری سروے 2015 کے نتائج جاری کیے گئے ہیں۔اس تیسرے سالانہ سروے میں 11 ہزار سے زائد شرکاء سے مختلف سوالات کیے گئے۔ 24 فیصد شرکاء نے تسلیم کیا کہ وہ گاڑی چلانے کا اجازت نامہ (ڈرائیونگ لائسنس) نہ رکھنے کے باوجود ڈرائیونگ کر رہے ہیں۔ اس سے بھی زیادہ حیرت انگیز امر یہ ہے کہ ڈرائیونگ لائسنس نہ رکھنے والے 41 فیصد ڈرائیور کی عمریں 21 سال سے بھی کم ہیں۔
مزید پڑھیں: گاڑیاں کے شعبے سے متعلق دلچسپ اور حیرت انگیز حقائق
آج بھی پاکستان کے تمام بڑے شہروں میں کم عمر لڑکوں کو بلا خوف گاڑی چلاتے اور موٹر سائیکل پر مختلف کرتب دکھاتے دیکھا جاسکتا ہے۔ آخر کیوں؟ اگر قانونی اعتبار سے بات کی جائے ڈرائیونگ لائسنس نہ رکھنے پر کیے جانے والے جرمانے کی رقم اتنی کم ہے کہ کوئی اسے خاطر ہی میں نہیں لاتا۔ بغیر اجازت نامہ موٹر سائیکل، گاڑی یا کوئی بس وغیرہ چلانے پر محض 100، 500 یا 1000 روپے جرمانہ بذات خود مضحکہ خیز بات ہے۔ اس کے علاوہ بغیر کسی شرم رشوت دینے اور لینے کی وجہ سے جرمانوں کی نوبت ہی نہیں آتی اور یوں قانون شکنی کرنے والے افراد باآسانی خلاصی حاصل کرلیتے ہیں۔ کیا کبھی آپ نے سوچا کہ یہ صورتحال ہمیں کس جانب لے جارہی ہے؟
میرے خیال سے اس مسئلہ کی ذمہ داری نوعمر ڈرائیوروں پر ڈالنا موزوں نہیں ہے کیوں کہ ان میں سے اکثر متعلقہ قوانین اور اس کے نفاذ سے نابلد ہیں۔ پھر بدقسمتی سے دنیا کے ترقی یافتہ ملک کے برعکس ہمارے یہاں نوعمر ڈرائیورز کرتوتوں کا تعریف کی نظر سے دیکھا جاتا ہے۔ یہ معاملہ ہماری معاشرتی لاپرواہی کا منہ بولتا ثبوت ہے جس کی وجہ سے کم عمر ڈرائیوروں کی حوصلہ افزائی ہورہی ہے۔ حکومت وقت کو اس بگڑتی ہوئی صورتحال سے نمٹنے سخت اقدامات اٹھانے چاہئیں۔ نیز والدین کو بھی اس مسئلے کا سدباب کرنے کے لیے اپنی ذمہ داریوں کا احساس کرنا ہوگا۔ بغیر ڈرائیونگ لائسنس گاڑی چلانے والوں بالخصوص مقررہ حد سے کم عمر ڈرائیوروں کی حوصلہ شکنی کرنے کی ضروری ہے۔
پاک ویلز آٹو سروے کے مکمل نتائج دیکھنے کے لیے یہاں کلک کریں!
کیا آپ سمجھتے ہیں کہ ذمہ دارانہ ڈرائیونگ کے رجحان کو فروغ دینے کے لیے فوری اقدامات اٹھانے کی ضرورت ہے؟ اس بڑھتے ہوئے مسئلے سے نمٹنے کے لیے مزید کیا حکومت عملی بروائے کار لائی جاسکتی ہے، ہمیں اپنی رائے سے ضرور آگاہ کیجیے گا۔
