یونائیٹڈ موٹرز نے پاکستان میں نئی 800cc اور 1000cc گاڑیاں پیش کرنے کی تیاریاں مکمل کرلی ہیں۔ فی الوقت ادارے کی وجہ مقبولیت موٹر سائیکلیں ہیں اور اس کا شمار پاکستان میں بائیکس بنانے والے اداروں میں دوسرے نمبر پر کیا جاتا ہے۔ لیکن اب یونائیٹڈ موٹرز نے گاڑیوں کے شعبے میں بھی قدم رکھنے کا فیصلہ کیا ہے جو نہ صرف صارفین بلکہ مجموعی طور پر مارکیٹ کے لیے انتہائی دلچسپ خبر ہے۔
ذرائع کے مطابق یونائیٹڈ آٹو انڈسٹریز اپنی نئی گاڑی کی پہلی جھلک آئندہ سال 2018ء کی پہلی ششماہی میں دکھائے گا۔ ذرائع سے یہ بھی پتہ چلا ہے کہ یونائیٹڈ موٹرز پرائیوٹ لمیٹڈ نے چینی ادارے کے ساتھ شراکت داری میں دو نئی گاڑیاں پاکستان میں تیار اور فروخت کرنے کا منصوبہ بنایا ہے۔ اس کے لیے لاہور میں ایک کارخانے کا قیام بھی کیا جاچکا ہے جس کی تعمیر تکمیل کے مراحل میں ہے۔ ادارے کی جانب سے پیش کی جانے والی گاڑیاں “یونائیٹڈ” کے نام سے منظرعام پر آئیں گی۔
یونائیٹڈ آٹو انڈسٹریز اپنی نئی ہیچ بیک سے 800cc گاڑیوں مثلاً سوزوکی مہران کے خریداروں کو متوجہ کرنے کا ہدف رکھتا ہے۔ دوسری جانب یونائیٹڈ پک اپ بھی سامان کی نقل و حمل والے چھوٹے 1000cc ٹرکس کی فہرست میں زبردست اضافہ ہوگا۔ یونائیٹڈ موٹرز اپنی گاڑیوں کی فروخت اور بعد از فروخت صارفین کو خدمات فراہم کرنے کے لیے 3S ڈٰیلرشپ قائم کرنے میں بھی دلچسپی رکھتا ہے اور اس ضمن میں اپنے ساتھ کاروبار کے خواہشمند افراد سے بھی رابطہ کا خواہاں ہے۔
میرے نزدیک ملک میں تیار شدہ گاڑی کی پیشکش سے مقامی مارکیٹ پر مثبت اثرات مرتب ہوں گے۔ خریداروں کو پہلے سے زیادہ گاڑیاں دستیاب ہوں گی جن میں سے وہ اپنی پسند اور ترجیحات کے مطابق انتخاب کرسکیں گے۔
موٹر سائیکلوں کی تیاری اور فروخت کے حوالے سے دیکھا جائے تو یونائیٹڈ موٹرز کی پیش رفت کافی نمایاں ہے۔ لہٰذا یہ کہنا بھی غلط نہ ہوگا کہ ادارہ گاڑیوں کے شعبے میں بھی اپنی دھاک بٹھانے کی اہلیت رکھتا ہے۔ اب دیکھنا یہ ہے کہ گاڑیوں کے خریدار یونائیٹڈ کی نئی گاڑی اور پک اپ ٹرک پیش کیے جانے پر کس طرح کا ردعمل دکھاتے ہیں۔
اس حوالے سے اپنی رائے دینے کے لیے ذیل میں موجود تبصرہ خانے کا بلاجھجک استعمال کیجیے۔
