ٹویوٹا کیمری کو اوسط سائز کی سیڈان گاڑیوں میں ایک طویل عرصے سے بہترین فروخت کا اعزاز حاصل رہا ہے۔ ماضی میں کیمری بہت زیادہ پرکشش اور پرآسائش گاڑی نہیں تھی تاہم ٹویوٹا نے اس تاثر کو یکسر تبدیل کرنے کا فیصلہ کیا۔ اب چونکہ جاپان میں تیار شدہ ٹویوٹا کیمری 2018ء کو پاکستان میں عنقریب پیش کیا جانے والا ہے، آئیے اس گاڑی کے بارے میں چند قابل ذکر باتیں بیان کرتے ہیں۔
ظاہری انداز
اگر کسی نے کیمری کا پرانا ماڈل دیکھا ہو تو اسے ضرور یاد ہو گا کہ یہ گاڑی دلکش یا اسپورٹی انداز کی حامل نہ تھی۔ لیکن اس کا تازہ ترین ماڈل صرف کار نہیں بلکہ ایک شاہکار ہے۔ کیمری کے نئے ماڈل کو ٹویوٹا کے ‘کین ڈیزائن’ طرز پر تیار کیا گیا ہے جس کے بعد یہ آگے سے پیچھے تک انتہائی جاذب نظر ہو گئی ہے۔ نوکیلی ہیڈ لائٹس، بڑی گرل اور چوڑے ایئر انٹیکس، جو اگلے بمپر کے ایک کونے سے دوسرے کونے تک پھیلے ہوئے ہیں، اسے دیگر گاڑیوں سے منفرد انداز فراہم کرتے ہیں۔ بونٹ پر متعدد ہلکی گہری سطور موجود ہیں جو اسے پرانے ماڈلز سے مختلف روپ دیتی ہیں۔ 4820 ملی میٹر لمبائی، 1820 ملی میٹر چوڑائی اور 1470 ملی میٹر اونچائی کے ساتھ نئی کیمری اب پہلے سے زیادہ بڑی ہو چکی ہے۔ یہ خصوصیت بھی ہمارے شہریوں کی ضروریات کے لیے بالکل مناسب لگتی ہے۔ پچھلے ماڈل سے موازنہ کریں تو نئی کیمری کے فرش کا زمین سے فاصلہ بھی کم ہے جس سے یہ گاڑی خاصی پھرتیلی ظاہر ہوتی ہے۔
نئی ٹویوٹا کیمری 2018ء کو درج ذیل رنگوں میں فروخت کیا جاتا ہے؛
- نقرئی
- سفید
- نیلا
- سیاہ
- سنہری
- سرخ
اندرونی حصہ
اگر ماضی میں آپ کیمری کے اندرونی حصے سے متاثر نہیں ہوئے اور آج تک اسے ناقابل تعریف خیال کرتے ہیں تو آپ کا اپنا خیال بدل لینا چاہیے کیوں کہ نئی ٹویوٹا کیمری کے اندرونی حصے میں استعمال ہونے والا ساز و سامان اور مجموعی انداز آپ کو حیران کرے بغیر نہ چھوڑے گا۔ گو کہ اس کا معیار جرمن گاڑیوں جتنا اعلی نہیں لیکن یقین جانیے، یہ جاپانی ساختہ گاڑیوں میں میسر سب سے بہترین اور پرکشش خوبیوں کا حامل ہے۔ آپ کو گاڑی کے اندر بیٹھ کر سستی اور غیر معیاری چیز استعمال کرنے کا گمان تک نہ ہو گا اور یہی پینارومک چھت والی کیمری 2018ء کے مہنگے ترین ماڈل کی سب سے خاص خوبی ہے
انجن
بین الاقوامی مارکیٹ میں کیمری کو متعدد انجن کے ساتھ پیش کیا جاتا ہے۔ لیکن چونکہ پاکستان میں ہائبرڈ ماڈل کی پیشکش متوقع ہے اس لیے آپ کو بتاتے چلیں کہ ہائبرڈ کیمری میں 2500cc پیٹرول انجن کے ساتھ برقی موٹر بھی شامل ہوتی ہے۔ یہ دونوں مشینیں مل کر 203 بریک ہارس پاور کی قابل ذکر قوت فراہم کرتے ہیں۔ یہ ٹویوٹا انڈس کی جانب سے پیش کی جانے والی پیٹرول گاڑی کے مقابلے میں 25 بریک ہارس بھی زیادہ ہے۔ ٹویوٹا کے انتہائی ذہین ہائبرڈ نظام کی بدولت گاڑی میں ایندھن کی زبردست بچت اور بہترین کارکردگی کی امید رکھ سکتے ہیں جو آپ کی روزمرہ ضروریات کو بہترین انداز سے پورا کر سکتی ہے۔ اور ہاں، پرائیس اور نئی ٹویوٹا وٹز 2017 ہائبرڈ کی طرح کیمری میں بھی e-CVT گیئر باکس پیش کیا جاتا ہے۔
سہولیات اور خصوصیات
آپ یقیناً ٹویوٹا کیمری 2018 ہائبرڈ کی تکنیکی صلاحیتوں کے بارے میں جان کر حیران ہوں گے۔ چونکہ ہم پاکستان میں کیمری کو تیار کرنے کی اہلیت نہیں رکھتے اس لیے ٹویوٹا انڈس موٹرز کو یہ گاڑیاں جاپان سے تیار شدہ حالت میں درآمد کر کے فروخت کرنا ہوں گی۔ اس کا فائدہ یہ ہو گا کہ پاکستانی صارفین بھی اس گاڑی کی چند بہترین خصوصیات سے فیضیاب ہو سکیں گے؛
- خودکار ہیڈ لائٹس
- LED ہیڈ اور اسٹاپ لائٹس
- ایڈاپٹیو کروز کنٹرول
- VSC اور ٹریکشن کنٹرول
- دائیں بائی اور آگے پیچھے ایئر بیگز
- 4-ویل اے بی ایس
- برقی پاور اسٹیئرنگ
- برقی سیٹس
- سامنے و پشت پر کیمرے
- چابی کے بغیر اسٹارٹ کی سہولت
- پانورامک چھت
کون سی خصوصیات نہیں ملیں گی؟
گو کہ اس گاڑی کو جاپان سے بالکل تیار شدہ حالت میں درآمد کیا جا رہا ہے تاہم اس پر آنے والی لاگت کم کرنے کے لیے اس میں متعدد سہولیات حذف کیے جانے کا امکان ہے۔ ان سہولیات میں بلائنڈ اسپاٹ مانیٹرنگ، اسٹیئرنگ اسسٹ، خود کار بریکنگ، لین کی خلاف ورزی پر انتباہی نظام کے علاوہ 19 انچ الائے ویلز بھی شامل ہوں گے۔ ایک اور خصوصیت، جس کی ٹویوٹا کیمری میں شدید کمی محسوس کی جارہی ہے، وہ انفوٹینمنٹ سسٹم ہے۔ ایک جانب ٹویوٹا کا روایتی حریف و دیگر کار ساز ادارے اینڈروئیڈ آٹو اور ایپل کار پلے سے استفادہ حاصل کر رہے ہیں لیکن ٹویوٹا اب بھی بدستور سادے سے ملٹی میڈیا سسٹم کو ترجیح دے رہا ہے اور ناقدین کو یہ بات بالکل پسند نہیں۔ بہرحال، یہ واحد کمی ہے جو خصوصیات سے پُر گاڑی میں پائی گئی ہے۔ اس کے علاوہ یہ گاڑی قیمت کے اعتبار سے بہترین ہے۔
قیمت:
پاکستان میں نئی گاڑی کی خریداری کی بات ہو تو اچھی گاڑی کے لیے اچھی خاصی قیمت بھی ادا کرنا پڑتی ہے۔ یوں تو کیمری بہت زیادہ مہنگی گاڑی نہیں لیکن پاکستان میں درآمد شدہ نئی گاڑیوں پر بھاری بھرکم ٹیکس کی وجہ سے اس کی قیمت میں اضافہ یقینی ہے۔ اگر ٹیکس کی مد میں تھوڑی بہت رعایت بھی حاصل ہوئی تو بھی یہ 80 سے 90 لاکھ روپے کے بجٹ میں پیش کی جائے گی۔ گو کہ ٹویوٹا نے اب تک اس کی قیمت کا اعلان نہیں کیا لیکن اڑتی اڑتی خبروں سے پتہ چلا ہے کہ یہاں دو ماڈل متعارف کروائے جائیں گے جن کی قیمت یہ ہو گی:
- ٹویوٹا کیمری ہائبرڈ (بہترین ماڈل): 84,99,000 روپے
- ٹویوٹا کیمری ہائبرڈ (سادہ ماڈل): 82,99,000 روپے
انڈس موٹرز کی جانب سے بہت جلد پاکستان میں ٹویوٹا کیمری 2018ء کی پیشکش کا باضابطہ اعلان کیا جائے گا۔ اس سے قبل اس گاڑی سے متعلق ایک تعارفی تقریب منعقد کی جاچکی ہے جس میں متعلقہ ڈیلر صاحبان نے شرکت کی اور انہیں اس کی تفصیلات سے آگاہ کیا گیا۔ جیسے ہی یہ گاڑی برائے فروخت ہو گی، ہم پاک ویلز کے قارئین کو مزید تفصیلات سے آگاہ کریں گے۔ اس لیے، ہمارے ساتھ رہیے!
Image Credits: RRD
