گاڑی کی بیٹری کمزور ہوجانے یا بالکل ہی ختم ہوجانے کی بہت سی وجوہات ہوسکتی ہیں جن میں سے ایک اس کی معیاد ختم ہوجانا بھی ہے۔ اس سے فرق نہیں پڑتا کہ یہ گیلی (wet) بیٹری ہے یا خشک (dry) سیل والی، ہر بیٹری کی ایک معیاد ہوتی ہے۔ آپ بیٹری کی معیاد صرف ایک صورت میں بڑھا سکتے ہیں اور وہ ہے اس کی بروقت دیکھ بھال۔لیکن اس صورت میں بھی بیٹری کے کمزور ہوجانے کے امکانات موجود رہتے ہیں بالخصوص سرد موسم میں کہ جب انجن کو اسٹارٹ ہونے کے لیے زیادہ توانائی کی ضرورت ہوتی ہے۔ اور اگر آپ کے پاس کوئی دس بیس سال پرانی گاڑی ہے تو یہ جاننا آپ کے لیے ضروری ہے کہ پرانی گاڑیوں میں انجن اسٹارٹ کرتے وقت بیٹری پر اور بھی دباؤ ہوتا ہے۔ اگر گاڑی کی بیٹری کمزور ہے تو یہ اس کی معیاد ختم ہونے کا اشارہ ہے اور ممکن ہے کہ بیٹری جلد ہی ختم ہوجائے۔ اس کے علاوہ خراب تاروں کے درمیان سے بجلی باہر نکلنا بھی بیٹری کمزور ہونے کی وجہ بن سکتی ہے۔ چاہے آپ کے پاس نئی بیٹری ہی کیوں نہ ہو، اگر آپ رات بھر اسے سے کوئی چیز چلا کر چھوڑ دیں تو مجھے یقین ہے کہ صبح آپ کی گاڑی اسٹارٹ نہیں ہوگی۔ اگر آپ نےزیادہ طاقتور ایمپلی فائر لگایا ہوا ہے اور اس کے تاروں کی ترتیب درست نہیں تو بھی آپ کو بیٹری سے ہاتھ دھونا پڑ سکتے ہیں۔ اس کے علاوہ اگر بیٹری گیلی ہو اور تیزاب خشک ہوجائے تو بھی بیٹری کے کفن دفن کا انتظام کرنا پڑسکتا ہے۔
یہ وہ چندوجوہات ہیں جن سے بیٹری کی معیاد جلد ختم ہوجاتی ہے۔ ایسا زیادہ تر موسم سرما میں ہوتا ہے جو پاکستان میں آئندہ چند ماہ میں آیا چاہتا ہے اس لیے ضروری ہے کہ آپ گاڑی کے دیگر حصوں کی طرح بیٹری کو بھی چیک کرتے رہا کریں۔ اور اگر پھر بھی آپ کی گاڑی کی بیٹری جواب دے تو ذیل میں موجود تجاویز پر عمل کریں۔
سب سے پہلے آپ یہ جان لیں کہ آیا آپ کی بیٹری پرانی ہے یا نئی؟ ہوسکتا ہے یہ اتنی پرانی ہو کہ اب نئی لینے کے علاوہ کوئی دوسرا راستہ نہ ہو۔ مثال کے طور پر آپ کی بیٹری تین سال پرانی ہے اور آپ کو پچھلے چند ماہ سے گاڑی اسٹارٹ کرتے ہوئے مشکل پیش آ رہی ہے تو سمجھ جائیے کہ اب بیٹری کی ہمت جواب دے گئی۔ پرانی بیٹری نکالیئے اور کسی اچھی سی دکان پر اسے دے کر نئی بیٹری خرید لایئے۔
اگر نئی بیٹری خریدنا فوراً ممکن نہ ہو تو کوئی بات نہیں، ہم آپ کو گاڑی کی بیٹری کو دوبارہ زندہ کرنے کے لیے چند مشورے دے رہے ہیں۔ یاد رہے کہ یہ مشورے ان بیٹریوں کے لیے کارآمد ہیں جن کی معیاد ختم نہیں ہوئی اور وہ کسی وجہ سے (مثلاً تاروں کی غلط ترتیب یا تیزاب کم ہونے کی وجہ سے) کام نہ کر رہی ہوں۔
ایک طریقہ دوسری گاڑی سے کرنٹ مستعار لینے کاہے خاص طور پر اگر آپ کی گاڑی آٹومیٹک ہے۔ اپنے آس پاس موجود کسی دوسری گاڑی کے مالک یا پھر کسی ٹیکسی والے کی مدد سے آپ یہ کام کرسکتے ہیں۔ لیکن اس کے لیے مخصوص تاروں کا ہونا بہت ضروری ہے۔ بعض افراد یہ کام عام گھریلو بجلی کے تاروں سے کرتے ہیں جو بہت زیادہ خطرناک ہے۔ اس لیے بہتر ہے کہ اپنی گاڑی میں اچھے معیار کے تاروں کا جوڑا ہر وقت رکھیں تاکہ بوقت ضرورت ان سے کام لیا جاسکے۔ ان تارون کے دونوں طرف چٹکیاں موجود ہوتی ہیں جن کا رنگ سرخ اور نیلا ہوتا ہے۔ ان دونوں چٹکیوں کو احتیاط کے ساتھ بیٹری سے منسلک کریں۔ کوشش کریں کہ جس گاڑی سے کرنٹ مستعار لیا جارہا ہے وہ اسٹارٹ رہے۔
اگر آپ کو بیٹری کے ساتھ وقتاً فوقتاً اسی صورتحال کا سامنا رہتا ہے تو آپ کو ریسکیو بیٹری پیک خرید لینا چاہیے۔ اسے آپ بوقت ضرورت استعمال کرسکتے ہیں اور اسےجب چاہیں دوبارہ چارج کرلیں۔
اس کے علاوہ ایک اور طریقہ جو ہمارے یہاں کافی مقبول ہے وہ “دھکا اسٹارٹ” ہے۔ یہ طریقہ آٹومیٹک گاڑیوں میں کارگر نہیں لیکن دیگر گاڑیوں کے لیے بہت مفید ہے۔ آپ اپنی گاڑی کو آگے یا پیچھے کی طرف دھکیل سکتے ہیں لیکن اس کے لیے گیئر کا خاص خیال رکھنا چاہیے۔ آگے کی طرف دھکیلتے ہوئی گاڑی کو دوسرے گیئر میں رکھیں، اگنیشن کو آن رکھیں اور کلچ دبا کر رکھیں اور پھر کسی کی مدد سے گاڑی کو پیچھے سے دھکا دیں یا اگر آپ کسی ڈھیلان والی جگہ پر ہیں تو گاڑی خود بخود اس طرف جا سکتی ہے۔ جب گاڑی رواں ہوجائے تو کلچ چھوڑ دیں، گاڑی ایک جھٹکا لے کر اسٹارٹ ہوجائے گی۔ البتہ اس تمام عمل کا انحصار آپ کی گاڑی کی حالت زار پر ہے۔ اگر گاڑی اس طریقہ کار سے اسٹارٹ نہیں ہو رہی تو اس کا مطلب ہے کہ گاڑی میں بیٹری کے علاوہ بھی کوئی چیز مسئلہ کر رہی ہے لہٰذا آپ کو فوری طور پرکسی اچھے مکینک سے رجوع کرنا چاہیے۔
اگر آپ کے پاس کوئی بڑی گاڑی ہے تو اسے دھکا لگا کر اسٹارٹ کرنا شاید ممکن نہ ہو۔ تو اس کے لیے آپ کو پھر کسی دوسری گاڑی کی مدد درکار ہوگی۔ اپنی گاڑی کو اگلی گاڑی سے باندھنے کے لیے آپ کو رسی یا لوہے کی چین چاہیے جسے گاڑی کے اگلی جانب دائیں اور بائیں دونوں طرف باندھ سکیں تو اچھی بات ہے ورنہ درمیان سے باندھ لیں۔ اگلی گاڑی کے چلنے سے پہلے یقین کرلیں کہ رسی اچھی طرح سے باندھی جا چکی یا نہیں۔ اس کے علاوہ گاڑی کے درمیان کچھ گز کا فاصلہ رکھیں تاکہ آپ کی گاڑی اسٹارٹ ہونے کی صورت میں اگلی گاڑی سے نہ ٹکرا جائے۔ گاڑی کو دوسرے گیئر میں رکھیں، کلچ دبا کر اور اگنیشن آن کرنا بھی یاد رکھیں اور جب دونوں گاڑیاں یکساں رفتار سے چلنے لگیں تو کلچ چھوڑ کر گاڑی اسٹارٹ کریں۔ جیسے ہی گاڑی اسٹارٹ ہو فوراً کلچ دبا دیں تا کہ اگلی گاڑی کو نوئی نقصان نہ پہنچے۔ گاڑی کی رفتار کم کریں اور گاڑی کے انجن کو کچھ دیر تک گرم ہونے دیں خاص طور پر اگر آپ کو یہ صورتحال موسم سرما میں پیش آ رہی ہو۔
تو جب بھی لمبے سفر پر روانہ ہوں تو دیگر ضروری چیزوں کے ساتھ بیٹری سے منسلک ہونے والی تاروں کی جوڑی اور رسی بھی رکھ لیں۔ یا پھر یہ طریقہ استعمال کرلیں لیکن نتائج کے ہم بالکل ذمہ دار نہیں ہوں گے!
اگر آپ کو یہ طریقے پہلے سے پتہ ہیں یا اس کے علاوہ بھی کسی طریقے سے آپ نے یہ کام انجام دیا ہوتو نیچے موجود تبصرہ خانے میں ضرور بتائیں تاکہ ہمارے نئے قارئین بھی ہنگامی صورتحال سے نمٹنے کا طریقہ جان سکیں۔
