نیشنل ہائی وے اتھارٹی (NHA) نے مسافروں کو سہولت کی فراہمی اور اپنے جاری منصوبوں کی تکمیل میں شفافیت کو یقینی بنانے کے لیے موبائل ایپلی کیشن لانچ کردی ہے۔
موبائل ایپلی کیشن کی افتتاحی تقریب اسلام آباد میں NHA دفاتر میں منعقد ہوئی جہاں وزیر مملکت برائے مواصلات مراد سعید نے باضابطہ طور پر ایپلی کیشن متعارف کروائی۔ چیئرمین NHA جواد بشیر ملک بھی افتتاحی تقریب میں موجود تھے کہ جس میں NHA کے سینیئر عہدیدار ان کے ساستھ تھے۔ تقریب سے خطاب کرتے ہوئے انہوں نے کہا کہ موبائل ایپلی کیشن کا جراء مسافروں کو سہولت دینے اور اطلاعات کی فراہمی کے قانون کے حقیقی نفاذ کی جانب ایک بڑا قدم ہے۔ یہ نیشنل ہائی وے اتھارٹی کو جاری منصوبوں اور مستقبل کے نئے میگا پروجیکٹس کی تکمیل میں شفافیت کو برقرار رکھنے میں مدد دے گی۔ پی ٹی آئی کی حکومت کے 100 روزہ ایجنڈے پر بات کرتے ہوئے انہوں نے کہا کہ انہوں نے اپنے اہداف کی 70 دن میں تکمیل کا ہدف رکھتا تھا اور محکمے کے عہدیداروں کے زبردست ٹیم ورک کے نتیجے میں انہوں نے تقریباً تمام اہداف حاصل کرلیے ہیں۔ مسافروں کے لیے اس موبائل ایپلی کیشن کا اجراء 70 روزہ منصوبے کا ایک اہم حصہ تھا جسے کامیابی سے حاصل کرلیا گیا۔
NHA موبائل ایپلی کیشن مینجمنٹ انفارمیشن سسٹم (MIS) کی جانب سے تیار کی گئی ہے جو اس وقت اینڈرائیڈ صارفین کے لیے پلے اسٹور میں NHA-IS کے عنوان کے ساتھ موجود ہے، البتہ آئی او ایس صارفین کے لیے یہ ایپلی کیشن 27 نومبر سے دستیاب ہوگی۔
چیئرمین NHA جواد بشیر ملک نے افتتاحی تقریب میں موبائل ایپلی کیشن کی اہم خصوصیات پیش کیں جو مسافروں کو بڑی سہولت دیں گی۔ اس ایپلی کیشنز کی اہم خصوصیات یہ ہیں:
1۔ یہ مسافروں کو Journey Planning اور Interactive Maps فیچرز کے ذریعے اپنے سفر کی منصوبہ بندی کی سہولت دے گی، جس میں مخصوص مقام تک پہنچنے کے لیے تمام دستیاب راستوں تک باآسانی رسائی حاصل کی جا سکتی ہے۔
2۔ یہ ہر زمرے کی گاڑی اور اختیار کیے گئے راستے میں موجود موٹرویز اور نیشنل ہائی ویز پر تمام ٹول ریٹس کی الگ الگ تفصیلات فراہم کرتی ہے۔
3۔ خطے میں جاری تمام منصوبوں کی تفصیلات اور جاری اور تکمیل شدہ منصوبوں کی مالی کیفیت تک رسائی فراہم کرتی ہے۔
4۔ کسی بھی مخصوص پروجیکٹ کے آئیکون پر کلک کرکے آپ جاری منصوبوں کے عنوان، ٹھیکہ پانے والی کمپنیوں کی تفصیلات اور منصوبے کی مادّی اور مالی پیشرفت دیکھ سکتے ہیں۔
5۔ موبائل ایپلی کیشن کے ذریعے ایک کلک پر تمام روڈ سیفٹی گائیڈلائنز اور ہنگامی ٹیلی فون نمبرز تک رسائی حاصل کی جا سکتی ہے۔
6۔ موبائل ایپلی کیشن کے ذریعے ٹریفک قوانین کی مخصوص خلاف ورزیوں اور اُن پر عائد جرمانے بھی باآسانی دیکھے جا سکتے ہیں اور ان کی تصدیق کی جا سکتی ہے۔
وزیر مملکت برائے مواصلات نے افتتاحی تقریب کے آخر میں اس موبائل ایپلی کیشن کے ڈیولپرز میں تعریفی اسناد تقسیم کیں۔ NHA پاکستان میں 39 سے زیادہ نیشنل ہائی ویز اور موٹر ویز کے ساتھ 12000 کلومیٹر سے زیادہ کا روڈ نیٹ ورک رکھتی ہے۔ اس ایپلی کیشن کی تیاری کا مقصد ان سڑکوں کو استعمال کرنے والوں کی متعلقہ معلومات تک رسائی اور تعمیری فیڈبیک کے میکانزم بنانا ہے۔ مزید برآں، یہ اطلاعات کی فراہمی کے حق کو ایک نئی سطح پر لے جانے کی جانب ایک بڑا قدم ہے۔ عوام جاری منصوبوں کی نگرانی اور ان پر ہونے والی پیشرفت اور معلومات پر نظر رکھ سکے گی۔ ایک جگہ سے دوسری جگہ جانے کے لیے بہترین دستیاب راستوں کا انتخاب کرکے یہ آپ کے سفری منصوبے کا بہترین طریقہ ہے۔ حکومت کی جانب سے اٹھائے گئے اس قدم کو سراہا جانا چاہیے کہ جس نے اپنے کام کے طریقے میں شفافیت لانے کا نیا سلسلہ شروع کیا ہے۔
اس بارے میں اپنی رائے نیچے پیش کیجیے۔
