اگر آپ کو لگتا ہے کہ پیٹرول کی قیمت 145.38 روپے فی لیٹر تک پہنچ جانا ایک بری خبر تھی تو ایسے میں ایک اور بری خبر یہ ہے کہ پاکستان پیٹرولیم ڈیلرز ایسوسی ایشن (PPDA) نے ملک گیر ہڑتال کا اعلان کیا ہے۔ جس کے باعث 25 نومبر بروز جمعرات کو ملک بھر کے پٹرول پمپس بند رہیں گے۔
پی پی ڈی اے کے ملک گیر احتجاج کی وجہ یہ ہے کہ وہ کم منافع کے ساتھ پیٹرول فروخت کرنے میں دلچسپی نہیں رکھتے۔
ہڑتال کی وجہ
پیٹرول ڈیلرز ایسوسی ایشن پیٹرولیم مصنوعات کی فروخت پر منافع کی شرح پر حکومت کے ساتھ برسرپیکار تھی۔ اس سے قبل ایسوسی ایشن نے 5 نومبر کو ہڑتال کی کال دی تھی لیکن حکومت کی جانب سے 17 نومبر تک ان کے مطالبات پورے نہیں کیے گئے جس کے بعد ایسوسی ایشن نے ملک گیر ہڑتال کا اعلان کیا ہے۔
ایسوسی ایشن کے ترجمان کے مطابق، حکومت ایسوسی ایشن کے مطالبات کو اسی طرح نظر انداز کرتی رہی اور جھوٹی تسلیاں دیتی رہی تو ہڑتال غیر متعینہ مدت تک بڑھ سکتی ہے۔
پٹرولیم کی فروخت میں ڈیلرز کا مارجن
حکومت نے فی الحال پٹرولیم مصنوعات کی فروخت پر صرف 2 فیصد ڈیلر مارجن کی اجازت دی ہے۔ پٹرول کی موجودہ قیمت 145.8 روپے پر ڈیلر کا مارجن 3.9 روپے ہے جو پیٹرولیم ڈیلرز کے لیے بہت کم ہے۔
پاکستان پیٹرولیم ڈیلرز ایسوسی ایشن (PPDA) چاہتی ہے کہ حکومت ڈیلرز کے منافع کے مارجن کو 6 فیصد تک بڑھائے۔ اگر یہ مطالبہ نہیں مانا جاتا تو وہ فیول اسٹیشن بند رکھیں گے اور حکومت سے ان کے پیٹرول پمپ کے لائسنس منسوخ کرنے کا مطالبہ بھی کریں گے۔ لائسنس کی منسوخی کے ساتھ تقریباً 50% پٹرول پمپ مستقل طور پر بند ہو جائیں گے کیونکہ کوئی بھی لائسنس کے حصول کے لیے دوبارہ درخواست نہیں دے گا۔
اگر حکومت ڈیلرز ایسوسی ایشن کے مطالبات کو پورا نہیں کرتی ہے، تو وہ پیٹرول اسٹیشن بند کر دیں گے جس کے بعد عوام کے لیے پیٹرول کی دستیابی ممکن نہیں ہوگی۔ اس طرح ممکن ہے کہ پٹرول کی قیمتیں مزید بڑھ جائیں جس سےعوام کو نقصان پہنچے گا۔
