انڈس موٹر کمپنی نے پاکستان میں نئی ٹویوٹا فورچیونر کو صرف 52,80,500 روپے قیمت پر متعارف کروا کر سب کو حیران کردیا۔ پاکستان میں ٹویوٹا فورچیونر کی دوسری جنریشن پہلی مرتبہ دسمبر 2016ء میں دکھائی گئی تھی۔ تاہم لاہور میں ہونے والے اس خصوصی تقریب رونمائی میں زیادہ توجہ ٹویوٹا فورچیونر کی ہمراہی ٹویوٹا ریوُو کو حاصل رہی۔ ٹویوٹا پاکستان کی زبردست گرم جوشی دیکھتے ہوئے امید کی جارہی تھی کہ فورچیونر کو نظر انداز کیے جانے کا ازالہ ضرور کیا جائے گا اور اس شاہکار کے لیے علیحدہ پروگرام منعقد کیا جائے گا۔ گو کہ اس حوالے سے انڈس موٹرز نے فی الحال کوئی تصدیق یا تردید نہیں کی تاہم نئی ٹویوٹا فورچیونر کی پیشگی بُکنگ کا آغاز کردیا ہے۔
ٹویوٹا انڈس موٹرز کی جانب سے نئی ٹویوٹا فورچیونر کی قیمت 52,80,500 رکھی گئی ہے جس میں نقل و حمل اور دیگر اخراجات شامل نہیں ہے۔ اس قیمت پر لاگو ہونے والے انکم ٹیکس کی تفصیلات کچھ یوں ہیں:
ٹیکس نادہندگان کے لیے: 4,00,000 روپے
ٹیکس دہندگان کے لیے: 2,00,000 روپے
ادارے سے منسلک ڈیلرشپ کے مطابق جنوری میں فورچیونر بُک کروانے والے صارفین کو مارچ کے پہلے ہفتے میں فراہم کردی جائیں گی۔ گاڑی بُک کروانے کے لیے مجموعی قیمت کا 10 فیصد بذریعہ پےآرڈر ادا کرنا ہوگا جبکہ باقی کی رقم 15 سے 20 روز بعد ادا کی جاسکتی ہے۔
