2021ء آٹوموٹو انڈسٹری کے لیے ایک خوشگوار سال رہا ہے۔ اپریل تک تمام ہی اداروں کی گاڑیوں کی فروخت آگے ہی گئی ہے۔ البتہ رمضان کی آمد کے ساتھ ہی معاملات ذرا مختلف رخ پر چلے گئے اور گاڑیوں کی طلب میں کمی کی وجہ سے ان کی فروخت متاثر ہوئی ہے۔ PAMA کی رپورٹ کے مطابق تمام ہی گاڑیاں بنانے والے اداروں نے اپریل 2021 میں فروخت میں کمی ریکارڈ کی ہے۔ جس کی تفصیلات یہ ہیں۔
یاد رہے کہ گزشتہ سال کے اسی مہینے یعنی اپریل میں گاڑیوں کی فروخت صفر ہوئی تھی۔ وفاقی اور صوبائی حکومتوں نے کرونا وائرس کی وجہ سے مارچ سے اپریل 2020 کے دوران ملک گیر لاک ڈاؤن لگا رکھا تھا۔ اس وقت عوام خوفزدہ تھے اور سب ہی گھروں پر رہنے کو ترجیح دے رہے تھے۔ کیونکہ اپریل 2020 میں سرے سے کوئی گاڑی ہی فروخت نہیں ہوئی تھی، اس لیے سالانہ بنیادوں پر فروخت کا تقابل نہیں ہو سکتا۔
اپریل 2021 میں گاڑیوں کی ماہ بہ ماہ فروخت
PAMA کی رپورٹ کے مطابق پاکستان کی آٹو انڈسٹری نے اپریل 2021 میں کُل 17,144 یونٹس فروخت کیے۔ مارچ 2021 کے مقابلے میں ماہ بہ ماہ فروخت میں 17 فیصد کی کمی نظر آئی۔
پاک سوزوکی موٹرز نے مارچ 2021 میں 10,161 یونٹس کی فروخت کے مقابلے میں اپریل میں 8,606 یونٹس فروخت کیے اور یوں 15 فیصد کی کمی ظاہر کی۔
ٹویوٹا انڈس موٹرز نے اپریل 2021 میں 5,355 یونٹس بیچے جبکہ مارچ 2021ء میں 6,695 یونٹس فروخت کیے تھے یعنی 20 فیصد کمی کا سامنا کیا۔
ہونڈا اٹلس نے سب سے زیادہ 27 فیصد کمی کا سامنا کیا ہے، کیونکہ کمپنی اپریل 2021 میں صرف 2,287 یونٹس ہی فروخت کر پائی۔ گزشتہ ماہ ان کی فروخت 3,153 یونٹس رہی تھی۔
کِیا موٹرز (جو PAMA کا رکن نہیں ہے) نے ماہ بہ ماہ فروخت میں 16 فیصد کمی کا سامنا کیا ہے۔
لیکن حیران کن طور پر ہیونڈائی نشاط کی فروخت اپریل میں 24 فیصد اضافے کے ساتھ 896 یونٹس تک پہنچی، لیکن کیسے؟ ایلانٹرا کی بدولت۔
مسافر گاڑیوں کی فروخت
مسافر گاڑیوں کے شعبے میں ہیونڈائی ایلانٹرا کے سوا تمام ہی گاڑیوں کی فروخت میں کمی آئی ہے۔ ٹویوٹا نے اپریل 2021 میں یارِس کے 2,600 اور کرولا کے 1,724 یونٹس فروخت کیے۔ یہ مارچ کے مقابلے میں بالترتیب 22 اور 19 فیصد کی کمی ہے۔ ہونڈا نے اپریل میں سٹی اور سوِک کے 2,053 یونٹس بیچے جو مارچ میں فروخت ہونے والے 2,603 یونٹس سے 21 فیصد کم ہے۔ سوزکی نے بھی اپنی گاڑیوں کی فروخت میں کمی دیکھی ہے جس کی سوئفٹ کے اپریل میں 181 یونٹس، کلٹس کے 1,312 یونٹس، بولان کے 747 یونٹس اور آلٹو کے 4,091 یونٹس فروخت ہوئے ہیں۔ حیران کن طور پر ویگن آر کی فروخت میں 20 فیصد اضافہ ہوا ہے۔
ہیونڈائی اپنی ایلانٹرا کی لانچ کے دوسرے مہینے میں 280 یونٹس کی فروخت کے ساتھ آگے بڑھا ہے۔ مارچ میں اس کے 46 یونٹس فروخت ہوئے تھے یعنی کہ فروخت میں 509 فیصد کا اضافہ ہوا۔
SUVs اور جیپیں
SUVs میں ہیونڈائی ٹوسان نے اپریل 2021 میں اپنی فروخت میں کمی دیکھی لیکن پھر بھی 503 یونٹس کے ساتھ ٹویوٹا فورچیونر سے بہتر کارکردگی دکھائی ہے۔ فورچیونر کی فروخت 364 پر کھڑی رہی جبکہ ہونڈا BR-V اپریل میں صرف 234 یونٹس ہی فروخت کر پائی۔
2 اور 3 ویلرز
اپریل 2021 میں مجموعی طور پر 1,49,368 موٹر سائیکلیں اور تین پہیوں والی گاڑیاں فروخت ہوئیں، جبکہ مارچ 2021 میں یہ تعداد 1,70,350 تھی۔ یعنی کہ 21 فیصد کی کمی آئی ہے۔
| مارچ 2021 | اپریل 2021 | فرق | |
| پاک سوزوکی | 10,161 | 8,606 | -15% |
| ٹویوٹا انڈس | 6,695 | 5,355 | -20% |
| ہونڈا اٹلس | 3,153 | 2,287 | -27% |
| ہیونڈائی نشاط | 723 | 896 | 24% |
| ٹویوٹا یارِس | 3,317 | 2,600 | -22% |
| ٹویوٹا کرولا | 2,126 | 1,724 | -19% |
| ہونڈا سوِک/سٹی | 2,603 | 2,053 | -21% |
| ہیونڈائی ایلانٹرا | 46 | 280 | 509% |
| سوزوکی کلٹس | 1,637 | 1,312 | -20% |
| سوزوکی ویگن آر | 1,259 | 1,447 | 15% |
| سوزوکی سوئفٹ | 355 | 181 | -49% |
| سوزوکی آلٹو | 4,745 | 4,091 | -14% |
| پک اپس | 2,037 | 1,697 | -17% |
| 2 اور 3 ویلرز | 170,350 | 149,368 | -12% |
| ٹرک اور بسیں | 575 | 333 | -42% |
| جیپیں اور SUVs | 1,671 | 1,101 | -34% |
| ٹریکٹرز | 5,531 | 4,501 | -19% |
