وفاقی وزیر خزانہ کی جانب پیش کیے جانے والے سالانہ بجٹ 2021-2022 میں کچھ چیزیں ایسی ہیں جو کہ الیکٹرک وہیکلز کے شوقین افراد کیلئے کسی خوشخبری سے کم نہیں ہیں۔ قومی اسمبلی سے خطاب کرتے ہوئے وفاقی وزیر خزانہ شوکت ترین نے 850 سی سی تک کاروں اور الیکٹرک گاڑیوں پر بڑے پیمانے پر ٹیکس میں کمی کا اعلان کیا۔انہوں نے کہا کہ حکومت الیکٹرک گاڑیوں کی تیاری کو فروغ دے رہی ہے۔ اسی لئے ہم الیکٹرک وہیکلز کیلئے بڑے پیمانے پر ٹیکس میں کمی کی پیش کش کر رہے ہیں۔
انہوں نے کہا کہ حکومت نے الیکٹرک گاڑیوں کی مقامی تیاری کے لئے CKD یونٹس کی درآمد پر لگا ہوا ٹیکس ختم کردیا ہے۔ انھوں نے مزید کہا کہ مقامی طور پر تیار ہونے والی الیکٹرک گاڑیوں پر سیلز ٹیکس کو 17 فیصد سے کم کرکے 1 فیصد کردیا جائے گا، اس دوران الیکٹرک وہیکلز اور CKD کٹس کی درآمد پر ویلیو ایڈڈ ٹیکس 0٪ ہوگا۔
وفاقی وزیر نے مزید کہا کہ 4 وہیلر الیکٹرک گاڑیوں پر فیڈرل ایکسائز ڈیوٹی (FED) بھی ہٹا دی گئی ہے۔ واضح رہے کہ یہ فوائد اکتوبر 2020 میں بننے والی الیکٹرک وہیکل پالیسی میں پیش کیے گئے تھے
850 سی سی تک کاروں پر ٹیکس میں کمی
حکومت نے مقامی طور پر تیار کی جانے والی 850 سی سی گاڑیوں پر فیڈرل ایکسائز ڈیوٹی (ایف ای ڈی) کو بھی ہٹا دیا ہے۔ جو کہ پہلے 2.5٪ تھا۔
وفاقی وزیر خزانہ شوکت ترین نے قومی اسمبلی میں اظہار خیال کرتے ہوئے کہا کہ ان کاروں پر سیلز ٹیکس بھی 17 فیصد سے کم کرکے 12.5 فیصد کردیا گیا ہے یعنی کہ سیلز ٹیکس میں 4.5 فیصد تک کی کمی کی گئی ہے۔ جس کے بعد سوزوکی آلٹو ، پرنس پرل اور یونائیٹڈ براوو کی قیمتوں میں 1،13،000 روپے تک کمی ہوگی۔
بجٹ سے قبل یہ افواہیں گردش کر رہی تھیں کہ تھیں کہ وفاقی حکومت مقامی طور پر تیار ہونے والی کاروں کی قیمتوں میں کمی کرے گی۔ یہ بھی اطلاعات تھیں کہ امپورٹڈ کاروں پر بھی ٹیکس میں چھوٹ کی پیش کش کی جائے گی لیکن ایسا کچھ نہیں ہوا۔ تاہم مقامی طور پر تیار ہونے والی گاڑیوں کے لئے ٹیکس میں نرمی مڈل کلاس جو کہ چھوٹی گاڑیاں خریدتے ہیں، کیلئے یقینا بہت بڑا ریلیف ہے۔
اس کے بارے آپ کا کیا خیال ہے؟ کیا آپ کو لگتا ہے کہ اس سے مقامی کار مارکیٹ پر دیرپا اثر پڑے گا؟ نیچے دئیے گئے کمنٹ سیکشن میں ہمیں ضرور آگاہ کریں۔
