کنفرم ہو گیا – 5,000 سے زیادہ ایم جی کارز پاکستان آ رہی ہیں!
آپ نے سوشل میڈیا پر کراچی پورٹ میں پھنسی MG کارز کی تصویریں تو ضرور دیکھی ہوں گی۔ بالآخر ہمیں ان گاڑیوں کے خریداروں کے لیے ایک اچھی خبر مل ہی گئی ہے۔ ہمارے ذرائع کے مطابق ایک عدالت نے سیکشن 81 کے تحت ان MG گاڑیوں کو ریلیز کرنے کا حکم دے دیا ہے۔
تو یہ سیکشن 81 ہے کیا؟ آئیے آپ کو سادہ الفاظ میں بتاتے ہیں۔ یہ سیکشن دو پارٹیوں کے درمیان کسی پروڈکٹ کی ویلیو پر پیدا ہونے والے تنازع کے حوالے سے ہے، جس میں اس حوالے سے پاکستان کسٹمز اور MG موٹرز پاکستان فریق ہیں۔
کسٹمز نے یہ گاڑیاں ویلیویشن پر اختلاف کی وجہ سے روک دی تھیں۔ جواب میں MG موٹرز پاکستان نے عدالت کا رُخ کیا اور سیکشن 81 کے تحت گاڑیوں کی کلیئرنس کا حکم حاصل کیا۔ عدالت نے MG کو ضمانت کے طور پر ایک پے آرڈر جمع کروانے کا حکم دیا ہے۔ اگر کسٹمز یہ مقدمہ جیت جاتا ہے تو وہ پے آرڈر کیش کروا لے گا، ورنہ MG کو یہ پے آرڈر واپس مل جائے گا۔
صارفین کے لیے اچھی خبر کیا ہے؟
عدالت کے فیصلے کا مطلب ہے کہ کراچی پورٹ پر موجود MG کی گاڑیاں ریلیز کر دی جائیں گی اور جن لوگوں نے یہ گاڑیاں بُک کروا رکھی ہیں، انہیں جلد ہی مل جائیں گی، جو خریداروں کے لیے ایک زبردست خبر ہے۔
پھر اس کا مطلب یہ بھی ہے کہ قیمت کا جو فرق آئے گا وہ کار کمپنی ادا کرے گی اور ان گاڑیوں کا کوئی بوجھ خریداروں پر نہیں آئے گا، یعنی صارفین کی کوئی ذمہ داری نہیں ہوگی۔
اس سے پہلے ہم نے ان منظرناموں کا حوالہ دیا تھا کہ جن میں ان ممکنات کا ذکر تھا جن میں یہ فرق صارفین کو ادا کرنا پڑے گا۔ لیکن ایسا لگتا ہے کہ اب ایسا نہیں ہوگا کیونکہ ذمہ داری کمپنی نے لے لی ہے۔
البتہ ہم اب بھی صارفین کو احتیاط کا مشورہ ہی دیں گے۔ کئی کیسز میں کمپنیاں اپنے ڈلیوری فارمز کے آخر میں ایسی شرائط شامل کرتی ہیں۔ اور ہم میں سے بیشتر لوگ کانٹریکٹ/فارمز کو اتنا تفصیل سے نہیں پڑھتے۔ اس لیے ان فارمز پر دستخط کرنے سے پہلے انہیں بغور پڑھیں، فُٹ نوٹس دیکھیں کیونکہ اس سے آپ مستقبل میں کسی بھی پریشانی سے بچ پائیں گے۔
دوسری زبردست خبر – 5,000 سے زیادہ MG گاڑیاں پاکستان آ رہی ہیں:
ایسا لگتا ہے کہ MG موٹرز پاکستان کے لیے صرف اچھی خبریں ہی ہیں۔ ہمارے ذرائع کے مطابق تین بینکوں نے MG کی 5,200 گاڑیوں کے لیے لیٹر آف کریڈٹ (LC) جاری کیے ہیں۔ ذرائع کا دعویٰ ہے کہ میزان بینک نے 2,600 گاڑیوں کے لیے LC جاری کیے ہیں، جبکہ بینک الحبیب اور الفلاح بینک نے 2,600 گاڑیوں کے لیے LC دیے ہیں۔
تو یہ LC ہے کیا؟ آسان زبان میں LC بینک کی جانب سے دوسری پارٹی کو گارنٹی ہوتی ہے۔ تو اس صورت میں یہ بینک چین میں SAIC کو گارنٹی دے چکے ہیں کہ وہ ان کی گاڑیوں کے لیے ادائیگی کریں گے؛ یوں وہ یہ یونٹس پاکستان بھیج سکتے ہیں۔ یعنی یہ گاڑیاں جلد پاکستان آ رہی ہیں۔
ہمارے ذرائع کا مزید کہنا ہے کہ JSW گروپ نے LCs کے لیے ان بینکوں کو نقد ادائیگی کی ہے، جو یقینی بنا رہی ہے کہ نئے MG یونٹس پاکستان میں آئیں گے۔
بہت سے لوگ MG گاڑیوں کی ڈلیوری کے حوالے سے پریشان تھے کیونکہ اس میں تاخیر ہو رہی تھی۔ البتہ ان اپڈیٹس نے ظاہر کیا ہے کہ MG یہاں طویل قیام کے لیے آیا ہے، جو ایک زبردست خبر ہے۔
