ہیونڈائی پاکستان انٹرنیشنل آٹو شو میں ممکنہ طور ان گاڑیوں کی نمائش کرے گا

ہیونڈائی نشاط موٹرز رواں سال لاہور میں ہونے والے پاکستان آٹو شو (PAPS) میں اپنی آنے والی چند گاڑیاں نمائش کے لیے پیش کرے گا۔

تفصیلات کے مطابق پاکستان انٹرنیشنل آٹو شو 2020ء ایک سہ روزہ ایونٹ ہے کہ  21 سے 23 فروری 2020ء تک منعقد ہوگا۔ اس کا اہتمام پاکستان ایسوسی ایشن آف آٹوموٹو پارٹس اینڈ ایکسیسریز مینوفیکچررز (PAAPAM) نے کیا ہے۔ پاکستان کے بڑے آٹو شوز میں سے ایک PAPS لاہور انٹرنیشنل ایکسپو سینٹر میں منعقد ہوگا اور اس میں مختلف آٹو مینوفیکچررز، آٹو پارٹس مینوفیکچررز، سپلائرز اور آٹو سروس پرووائیڈرز حصہ لیں گے۔ 

یہ آٹو شو مارکیٹ میں موجود تمام مشہور برانڈز کو زبردست موقع دیتا ہے کہ وہ اپنی جدید ترین ٹیکنالوجی متعارف کروائیں اور اپنے آنے والے ماڈلز نمائش کے لیے پیش کریں۔ ہیونڈائی نشاط بھی اس ایونٹ کے شرکاء میں سے ایک ہے جہاں وہ مبینہ طور پر ٹکسن، ایلانٹرا اور سوناٹا جیسے ماڈلز پیش کرے گا۔ یہ ماڈلز پاکستان کی مقامی مارکیٹ میں جلد ہی اپنی جگہ پائیں گے۔

واضح رہے کہ ہیونڈائی ٹکسن مقامی مارکیٹ میں کمپنی کی لائن اَپ میں پانچویں گاڑی ہوگی۔ اس سے پہلے ہیونڈائی نشاط یہ ماڈلز لانچ کر چکا ہے: 

• سانتا فی 
• گرینڈ اسٹاریکس 
• آیونک ہائبرڈ 
• پورٹر H-100 

یہ بات قابلِ ذکر ہے کہ ہیونڈائی پورٹر H-100 مقامی طور پر اسمبل ہونے والی کمرشل پک اَپ ہے۔ ہیونڈائی کی کراس اوور ٹکسن پہلے ہی متعدد بار لاہور کی سڑکوں پر چلتی دیکھی گئی ہے۔ SUV کی پہلی بار رونمائی دسمبر 2017ء میں سنگِ بنیاد کی تقریب کے دوران کی گئی تھی۔ 

آٹومینوفیکچرر پاکستان میں اپنے ٹکسن ماڈل میں ممکنہ طور پر 2.0 لیٹر انجن متعارف کروائے گا۔ البتہ یہ کراس اوور SUV فرنٹ ویل ڈرائیو (FWD) اور آل ویل ڈرائیو (AWD) دونوں آپشنز میں دستیاب ہوگی۔ یہ پاکستان میں ہیونڈائی کی لائن اَپ میں شامل ہونے والی ایک اور ہائی-اینڈ گاڑی ہوگی۔ کمپنی نے پاکستان میں ایک مرتبہ پھر واپسی کے بعد اب تک یہاں کوئی اکانمی گاڑی متعارف نہیں کروائی۔

دوسری جانب ہیونڈائی ایلانٹرا اِس جنوبی کوریائی آٹو مینوفیکچرر کی ایک اور کومپیکٹ سیڈان کار ہے، جس کی نمائش مڈ-سائزڈ کار ہیونڈائی سوناٹا کے ساتھ اِس آٹو شو میں متوقع ہے۔ یہ ماڈلز سیڈانز میں غیر معمولی جدّت کا نتیجہ ہیں جو پہلے ہی دنیا کو حیران کر چکے ہیں۔ واضح رہے کہ ہیونڈائی سوناٹا بھی لاہور کی سڑکوں پر تجرباتی مراحل سے گزرتے دیکھی جا چکی ہے۔ 

لیکن یہ دیکھنا دلچسپ ہوگا کہ جنوبی کوریائی آٹومیکر ان گاڑیوں کو پاکستان کی مقامی مارکیٹ میں پیش کرنے کا فیصلہ کب کرتا ہے۔ بہرحال، ان گاڑیوں کی قیمتیں بھی پاکستانی آٹو مارکیٹ میں ان کی کامیابی میں فیصلہ کن کردار ادا کریں گی۔

کمپنی کی نظریں ہر چھ مہینے میں ایک گاڑی لانچ کرنے پر ہیں۔ کیا ہیونڈائی نشاط پاکستانی صارفین کے لیے اِس سال کوئی بجٹ کار لائے گا؟ اپنے خیالات نیچے تبصروں میں پیش کیجیے اور آٹوموبائل انڈسٹری کی مزید خبروں کے لیے پاک ویلز کے ساتھ رہیے۔