ہنڈا نے ایک  بارپھر گاڑیوں کی پروڈکشن بند کر دی

ہنڈا موٹرز لیمیٹڈ، جاپان کے ذیلی ادارے ہنڈا اٹلس نے حال ہی میں سپلائی چین میں جاری رکاوٹوں کے پیش نظر اپنے مینوفیکچرنگ پلانٹ کو ایک بار پھر  عارضی طور پر بند کرنے کا اعلان کیا ہے۔ کمپنی نے پاکستان سٹاک ایکسچینج (PSX) کو ایک بھیجے گئے نوٹس میں بتایا ہے کہ 8 نومبر سے 9 نومبر 2023 تک گاڑیوں کی پیداوار بند رہے گی۔

اس سے قبل یکم نومبر کو کمپنی نے اعلان کیا تھا کہ گاڑیوں کی پروڈکشن 7 نومبر تک غیر فعال رہے گی۔ کمپنی نے پروڈکشن شٹ ڈاؤن کی وجہ سپلائی چین میں نمایاں رکاوٹیں بتائی ہیں جس سے بنیادی طور پر انوینٹری کی سطح اور پیداوار کے لیے ضروری پارٹس کی دستیابی متاثر ہوئی ہے۔

کمپنی کا بیان

ہنڈا اٹلس کارز نے کہا ہے کہ سپلائی چین چیلنجز کے منفی اثرات کی وجہ سے پیداوار کو برقرار رکھنا مشکل ہو چکا ہے۔ کمپنی نے صورتحال کی شدت پر زور دیتے ہوئے کہا ہے کہ سپلائی چین کے معمول پر آنے تک پلانٹ کو عارضی طور پر بند کر دیا گیا ہے۔ اس پلان میں کسی قسم کی تبدیلی کے بارے میں سٹیک ہولڈرز کو فوری طور پر مطلع کیا جائے گا۔

خیال رہے کہ یہ پہلا موقع نہیں ہے جب ہنڈا اٹلس کاروں کو اس سال پیداوار میں رکاوٹ کا سامنا کرنا پڑا ہو۔ اس سے قبل، کمپنی نے ملک کے بگڑتے ہوئے معاشی حالات اور لیٹرز آف کریڈٹ (LCs) کے اجراء سے متعلق حکومتی پابندیوں کا حوالہ دیتے ہوئے 09 مارچ سے 15 مئی تک پیداوار روک دی تھی۔

سوزوکی کا شٹ ڈاؤن

ہنڈا اٹلس واحد کھلاڑی نہیں ہے جسے ناکافی انوینٹری کے اثرات کا سامنا ہے، پاکستان سوزوکی کو بھی انہی مسائل کا سامنا ہے۔ پاک سوزوکی نے یکم نومبر سے 7 نومبر 2023 تک پیداواری کارروائیوں کو معطل کرنے کے ساتھ اپنے پلانٹ کی بندش میں توسیع کا بھی اعلان کیا ہے۔

پاک سوزوکی کی جانب سے پیداوار میں رکاوٹ کی وجہ بھی ناکافی انوینٹری ہے جس سے اس کے پروڈکشن آپریشنز پر برا اثر پڑ رہا ہے۔ آٹوموبائل پلانٹ میں درپیش چیلنجز کے باوجود پاک سوزوکی نے اپنے موٹرسائیکل پلانٹ میں دوبارہ پیداوار شروع کردی ہے۔

اس شٹ ڈاؤن کے بارے میں آپ کا کیا خیال ہے؟ کمنٹس سیکشن میں اپنے خیالات چھوڑیں۔