کچھ عرصے سے پاکستان میں سوشل میڈیا پر ایک کراس اوور SUV پروٹون X50 کی ممکنہ لانچ کے حوالے سے خبریں کافی پھیلی رہی ہیں۔ ہو سکتا ہے کئی قارئین بھی ان سے واقف ہوں لیکن ایک بین الاقوامی آٹوموٹو ویب سائٹ پر ایک تحریر آنے کے بعد حال ہی میں ایسی باتوں میں مزید اضافہ ہو گیا ہے۔
پروٹون کا نام اب پاکستان میں نیا نہیں ہے۔ پروٹون نے ملک میں گاڑیوں کی CKD پروڈکشن کی خاطر کراچی میں ایک اسمبلی لائن بنانے کے لیے الحاج فا کے ساتھ ایک جوائنٹ وینچر پر دستخط کررکھے ہیں۔ ہمیں X70 کراس اوور اور حال ہی میں ساگا کی صورت میں ظاہر کی گئی چھوٹی سیڈان کے بارے میں پہلے سے بہت کچھ معلوم ہے۔
پروٹون ملائیشیا کی قومی کار کمپنی ہے۔ ماضی میں یہ سوزوکی یہاں تک کہ ہونڈا کے ماڈلز کو بھی rebadge کر کے بناتی تھی اور اس سے پہلے مٹسوبشی کے کچھ ماڈلز پروٹون کے نام سے فروخت ہوتے تھے۔ درحقیقت پروٹون نے تقریباً 36 سال پہلے مٹسوبشی لانسر پر مبنی اپنی پہلی کار کے ساتھ پیداوار کا آغاز کیا تھا۔ پروٹون ہولڈنگ کمپنی کبھی لوٹس کارز کی ملکیت تھی۔
اس وقت چین کی گیلی کار کمپنی، جو سوئیڈن کی وولوو کی مالک بھی ہے، پروٹون میں 49 فیصد شیئرز رکھتی ہے۔ گو کہ X70 اور ساگا ہماری مارکیٹ کے لیے طے شدہ ہیں لیکن دیگر پروڈکٹس بھی لائن میں ہیں۔
اگر آپ سیڈانز پسند کرتے ہیں تو آپ کے لیے یہ اچھی خبر نہیں کیونکہ پروٹون پاکستان کی جانب سے ممکنہ ماڈل ایک اور کراس اوور ممکنہ طور پر X50 آ رہا ہے۔
پروٹون X50:
گنتی میں 50 دراصل 70 سے کم ہوتا ہے اور حقیقت بھی یہی ہے کہ X50 چھوٹی B-سیگمنٹ کراس اوور ہے اور پروٹون کی لائن اپ میں X70 سے نیچے آتی ہے۔ کیونکہ گیلی پروٹون میں بڑی شراکت داری رکھتا ہے اس لیے X70 کے علاوہ X50 بھی جوائنٹ وینچر کی ایک مثال ہے۔
X70 کی طرح جو ایک C-سیگمنٹ SUV ہے اور بنیادی طور پر گیلی برانڈ کی rebadged گاڑی “گیلی Boyue” ہے، جبکہ X50 اصل میں rebadged “گیلی Binyue” یا “گیلی Coolray” ہے۔ گیلی سے ظاہری فرق سے ہٹ کر X50 بالکل ویسی ہی ہے۔ البتہ Coolray چین میں 2018ء سے پروڈکشن میں ہے، اس کی رونمائی 2020ء کے موسمِ خزاں میں ملائیشیا میں پروٹون X50 کی حیثیت سے کی گئی اور تب سے پیداوار میں ہے۔
X70 پروٹون کے لیے پہلے سے ایک کامیاب گاڑی تھی اور X50 نے اس تاثر کو مزید مضبوط کیا، کیونکہ اس نے مقامی ملائیشیا مارکیٹ کو ہلا کر رکھ دیا اور پروٹون کو اس گاڑی کے اتنے آرڈرز ملے کہ اس کے لیے پورے کرنا مشکل ہو گیا۔ ماڈل اکتوبر 2020ء میں لانچ کیا گیا تھا، اور مارچ 2021ء تک پروٹون 11,000 یونٹس ڈلیور کر چکا تھا۔
پاکستان کے لیے خبریں ہیں کہ پروٹون X50 کو ابتدائی تجربات اور ڈیولپمنٹ کے لیے CBU کی حیثیت سے امپورٹ کیا جائے گا اور بعد ازاں CKD/PK ڈومیسٹک ماڈل کی حیثیت سے تیار کیا جائے کا۔
فُٹ پرنٹ:
X50 گیلی کے BMA پلیٹ فارم پر بنی ہوئی ہے، جسے B-سیگمنٹ ماڈیولر آرکی ٹیکچر کہا جاتا ہے۔ X70 کے مقابلے میں جو CMA/کامپیکٹ ماڈیولر آرکی ٹیکچر پر مبنی ہے، BMA پر مکمل تحقیق اور ڈیولپمنٹ گیلی نے کی ہے۔ کسی بھی دوسرے عالمی پلیٹ فارم کی طرح یہ لچکدار ماڈیولر پلیٹ فارم سیڈانز اور چھوٹی کراس اوورز بنانے کے کام آئے گا۔
پیمائش:
پیمائش کے لحاظ سے X50 کی لمبائی 4330mm، چوڑائی 1800mm اور اونچائی 1609mm ہے اور اس کا ویل بَیس 2600mm ہے۔ اس کے مقابلے میں دیکھیں تو X70 کی لمبائی 4519mm، چوڑائی 1831mm اور اونچائی 1694mm ہے جبکہ ویل بَیس 2670mm کا ہے۔ یوں X70 لمبائی میں چھوٹی لگ بھگ 7.5 انچ چھوٹی ہے۔
کیونکہ X50 بی-سیگمنٹ میں آتی ہے اس لیے ہماری مارکیٹ می اس شعبے میں آنے والی دیگر معلوم گاڑیاں معروف ویزل، CHR اور MG ZS اور پوژو 2008 ہیں۔ X70 کی طرح X50 بھی 2 قطاریں، پانچ نشستیں رکھنے والی گاڑی ہے۔ X50 کے فیول ٹینک کی گنجائش 45 لیٹرز ہے۔
ایکسٹیریئر:
پہلی نظر میں یہ X70 کی چھوٹی ساتھی لگتی ہے اور واقعی ایسا ہے بھی۔ کئی ڈیزائن عناصر جو آپ X70 میں دیکھتے ہیں، وہ چھوٹی صورت میں X50 میں نظر آتے ہیں۔ فرنٹ پر آپ کو وہی پروٹون برانڈ گرِل نظر آئے گی جسے “infinite weave grille” کہتے ہیں، جو بنیادی طور پر ملائیشیا کے روایتی لکڑی کے کام اور کندہ کاری سے متاثر ہو کر بنائی گئی ہے۔ فرنٹ پر LED پروجیکٹر ہیڈ لائٹس + LED DRLs اسٹینڈرڈ کے طور پر ملائیشیا میں پیش کردہ تمام چاروں ٹرِمز میں موجود ہیں۔ فوگ لیمپس بَیس ماڈل میں نہیں ہے جبکہ آپ کو باقی سب کچھ ملتا ہے۔
X50 ایک اسپورٹی بمپر رکھتی ہے جس کے نیچے ایک چوڑی سیاہ رنگ کی اوپننگ ہے، جو اسے ایک جارحانہ اور چوڑی چکلی صورت دیتی ہے۔ اگر آپ سائیڈ پروفائل دیکھیں تو آپ کو X70 پر نظر آنے والی روایتی کریکٹر لائن اور C-پلر کے وہی ڈیزائن اثرات دکھائی دیں گے۔ سائیڈ ونڈوز کے بالائی اور نچلے حصوں میں کروم اسٹرپس جاری رہتی ہیں اور ٹیل گیٹ پر جا کر مل جاتی ہے جبکہ ذرا ڈھلوان چھت کو دیکھتے ہوئے آپ کو X70 کے اثرات بھی نظر آئیں گے۔
پچھلے حصے میں پروٹون دھاتی ٹرِم پر badging نظر آتی ہے جبکہ باڈی پینلز پر ٹیل لائٹس X70 کی طرح اوپر ہیں۔ ایک اسٹاپ لیمپ کے ساتھ ریئر اسپوائلر اور وائپر بھی موجود ہے۔ ایک سیاہ بمپر ڈفیوزر کے ساتھ ایگزاسٹ کی کویڈ کروم ٹپس اسے اسپورٹی، پرفارمنس کی طرف مائل گاڑی کی صورت دیں گی۔ X50 کا ٹاپ ویریئنٹ بطور اسٹینڈرڈ سیاہ رنگ کی چھت کے ساتھ آئے گا۔ ٹاپ ویریئنٹ 215/55/18 انچ الائے ویلز کے ساتھ آتا ہے بھی آتا ہے جبکہ باقی کو 215/60/17 انچ الائیز ملتے ہیں۔ روڈ ریلز اسٹینڈرڈ کے طور پر نہیں ہیں اور ٹاپ دو ورژنز میں بھی آتے ہیں۔
انجن اور مکینیکلز:
ملائیشیا میں X50 ایک 1477cc کے 1.5L تھری سلنڈر ٹربو انجن کے ساتھ آتی ہے۔ گو کہ پوری ماڈل لائن اپ میں انجن ایک ہی ہے، لیکن یہ دو پاور آؤٹ پُٹس میں پیش کیا جاتا ہے اور اس کی وجہ ہے دو مختلف فیول سسٹمز کا استعمال ہونا۔ ٹاپ آف دی لائن ویریئنٹ DI/ڈائریکٹ انجیکشن کے ساتھ آتا ہے اور یہ تقریباً 174HP اور 255NM ٹارک پیدا کرتا ہے۔
باقی تین ویریئنٹس MPI/ملٹی پوائنٹ انجیکشن سسٹم کے ساتھ آتے ہیں اور پاور کم ہوتے ہوئے 148HP اور ٹارک 226NM ہو جاتا ہے۔ X50 کے تمام ویریئنٹس 7-اسپیڈ ڈوئل کلچ ٹرانسمیشن کے ساتھ مینوئل موڈ سے لیس ہیں بالکل X70 کی طرح۔ X50 کے تمام ورژنز ایکو، نارمل اور اسپورٹ ڈرائیو موڈز کے ساتھ آتے ہیں۔ X50 صرف فرنٹ ویل ڈرائیو گاڑی ہے۔ ملائیشین خبروں کے مطابق X50 کی فیول اکانمی 100 کلومیٹرز کے لیے 6.5 لیٹرز ہے۔
X50 کے ٹاپ ویریئنٹ کا 1.5L تھری سلنڈر مع ڈائریکٹ انجیکشن، جیسا کہ ملائیشیا میں، وہی انجن ہے جو پاکستان میں X70 میں موجود ہے۔ ذہن میں رکھیں کہ ملائیشیا کی X70 دراصل 1.5L انجن کے ساتھ نہیں آتی؛ اس کے بجائے یہ 1.8L ٹربو GDI کے ساتھ پیش کی گئی ہے۔
X50 بطور اسٹینڈرڈ الیکٹرک پاور اسٹیئرنگ، تمام 4 ویلز پر ڈسک بریکس اور ایک اسٹینڈرڈ بٹن سے ایکٹیویٹ ہونے والے الیکٹرک پارکنگ بریک کے ساتھ آتی ہے۔ فرنٹ سسپنشن میک فرسن اسٹرٹ ہے اور گو کہ X70 ملٹی لنک ریئر سسپنشن رکھتی ہے، X50 میں ٹورشن بیم ہے۔ اس سے یہ بھی پتہ چلتا ہے کہ X50 کے لیے کم قیمت کا ہدف مقرر کیا گیا ہے اور اسے مقابلے میں زیادہ مؤثر بناتا ہے۔
میں ذاتی طور پر مانتا ہوں کہ اگر پروٹون پاکستان میں X50 لا رہا ہے تو یہ اس کو GDI کے بجائے MPI سسٹم (148HP ویریئنٹ) کے ساتھ لا سکتا ہے اور ایک مرتبہ پھر اس کی وجہ ہوگی X70 کو فلیگ شپ پیشکش کے طور پر رکھنا اور اس کی قیمت کم کرنا اور موجودہ یا آنے والی گاڑیوں کا مقابلہ کرنا۔
انٹیریئر اور فیچرز:
ایکسٹیریئر کی طرح انٹیریئر بھی X70 کے اثرات ظاہر کرتا ہے۔ ڈیش بورڈ کی پوری چوڑائی پر میٹالک ٹرِم پینلز نظر آتے ہیں۔ X70 کے مقابلے میں کہ جس میں ایئر وینٹس ذرا سلِم ہیں، X50 میں میٹل ٹرِمز کے ساتھ بڑے ذرا چوکور صورت کے سائیڈ ایئر وینٹس ہیں۔ ڈرائیور انسٹرومنٹ پینل ویسا ہی جو آپ نے X70 میں دیکھا ہے، لیکن یہاں 7 انچ کا فُل LED ڈجیٹل کلسٹر صرف ٹاپ دو ویریئنٹس میں ہے جبکہ بیسک ورژنز میں روایتی گیجز ٹائپ کا انسٹرومنٹ پینل ہے۔
اس میں ایک فلوٹنگ سینٹرل کونسول ہے جو ڈیش بورڈ سے سینٹرل آرم ریسٹ تک چلتا ہے، جس کے نیچے اسٹوریج ہے۔ آپ کو آگے بیٹھنے والے مسافر ک لیے ایک گریب ہینڈل بھی ملے گا۔ گیئر لیور X70 جیسا ہے۔ اس کے ساتھ ہی ڈرائیونگ موڈز کے لیے ایکو اور اسپورٹ بٹنز ہیں۔ ہل ڈیسنٹ کنٹرول، 360 ویو کیمرا اور پارکنگ سینسر کے بٹن بھی سینٹرل کونسول میں دستیاب ہیں۔
انفوٹینمنٹ سسٹم:
بنیادی انفوٹینمنٹ سسٹم ایک 8 انچ کی ٹچ اسکرین ہے، جبکہ ٹاپ ویریئنٹس میں 10.25 انچ دستیاب ہے۔ سافٹ ویئر X70 میں موجودہ کے مقابلے میں ذرا نیا ورژن ہے۔ بلوٹوتھ کنیکٹیوٹی اور اسمارٹ فون انٹیگریشن بھی اسٹینڈرڈ کے طور پر دستیاب ہے۔ اسٹینڈرڈ اسپیکرز 4 ہیں؛ ٹاپ ویریئنٹس میں 6 ملتے ہیں۔ X50 میں سب ووفرز نہیں ہیں جیسا کہ X70 میں ملتے ہیں۔ ٹائپ ویریئنٹس میں کلائمٹ ڈوئل زون آٹومیٹک ہے جبکہ دیگر ورژنز میں سنگل مینوئل زون ہے۔ ریئر وینٹس اور ساتھ ساتھ N95 کیبن فلٹریشن سسٹم تمام ویریئنٹس میں آتے ہیں۔
پُش اسٹارٹ بٹن مع ریموٹ انجن اسٹارٹ بھی دستیاب ہے۔ بنیادی ماڈل میں فیبرک جبکہ باقی میں لیدر سیٹس ہیں۔ 6-وے پاور ڈرائیور سیٹ ایڈجسٹمنٹ بھی موجود ہے۔ آٹومیٹک ڈے اینڈ نائٹ ریئر ویو مرر بھی ٹاپ ورژن میں دستیاب ہے۔
پینورامک سن رُوف:
اور اب سب سے اعلیٰ چیز، ایک پینورامک سن رُوف بھی دستیاب ہے لیکن صرف ٹاپ آف دی لائن ورژن میں۔ اسے ہماری مارکیٹ میں اس سیگمنٹ میں پہلی گاڑی سمجھا جا سکتا ہے۔ X50 کا ٹاپ ویریئنٹ پروٹون لنک ایپ کے ساتھ بھی آتا ہے جس سے گاڑی کے اسٹیٹس اور دیگر فیچرز تک ریموٹ رسائی ملتی ہے۔
اب سوال یہ ہے کہ اگر پروٹون مقامی سطح پر لانچ کی جاتی ہے تو کیا اس میں یہ تمام فیچرز ہوں گے؟ ہو سکتا ہے کچھ ہوں اور کچھ نہ ہوں۔
سیفٹی:
X70 کی طرح X50 بھی اس حوالے سے پیچھے نہیں ہے۔ فرنٹ اور سائیڈ سیٹ ایئر بیگز تمام ورژنز میں اسٹینڈرڈ کے طور پر موجود ہیں۔ کرٹین ایئر بیگز بھی بَیس ورژن کے علاوہ دیگر گاڑیوں میں موجود ہیں۔ ABS + EBD، بریک اسسٹ، آٹو بریک ہولڈ، ٹریکشن کنٹرول، ہِل ہولڈ اسسٹ، ہِل ڈیسنٹ کنٹرول یہ سب X50 کے تمام ویریئنٹس میں اسٹینڈرڈ کے طور پر آتے ہیں۔ ٹائر پریشر مانیٹرنگ سسٹم صرف ٹاپ ویریئنٹ میں ہے۔
تمام ماڈلز میں 4 ریئر پارکنگ سینسرز ہیں، جبکہ بَیس ماڈل میں فرنٹ سینسر نہیں ہیں، گو کہ ٹاپ ویریئنٹ میں فرنٹ پر 4 سینسرز موجود ہیں۔ 360 کیمرا ٹاپ کے دونوں ویریئنٹس میں موجود ہے، ریئر کیمرا اسٹینڈرڈ ہے۔
ایڈوانسڈ ڈرائیور اسسٹنٹس سسٹم یعنی ADAS نامی ایکٹو سیفٹی فیچر صرف ٹاپ ویریئنٹ میں دستیاب ہے۔ اس میں لَین ڈپارچر وارننگ، ایڈاپٹِو کروز کنٹرول، لَین کیپ اسسٹنٹ، بلائنڈ اسپاٹ مانیٹرنگ، انٹیلی جنٹ ہائی بِیم کنٹرول اور آٹو پارک اسِسٹ شامل ہیں۔
کیا پاکستان میں اسمبل ہونے والی x50 کو یہ تمام سیفٹی فیچرز ملیں گے؟ میرے خیال میں ہمیں ADAS تو نہیں ملیں گے۔ پھر بھی انتظار کرنا زیادہ بہتر ہے۔
پاکستان میں لانچ:
X50 بلاشبہ پاکستان میں ایک ہدف کے لیے لانچ پیڈ پر موجود ہے لیکن کم از کم ایک سے ڈیڑھ سال کے لیے اسے بھول جائیں۔ اس وقت پروٹون ملائیشیا مقامی طلب کو پورا کرنے کے لیے کام کر رہا ہے اور خبروں کے مطابق X50 کے لیے کم از کم چھ ماہ کا انتظار کا وقت ہے۔
ملائیشیا کے حکام کے ایک انٹرویو کے مطابق ان کی اس وقت ترجیح مقامی صارفین ہیں، جو مزید تصدیق کرتی ہے کہ ہو سکتا ہے ہمیں جلد X50 نظر نہ آئے۔ X50 کی آمد اور کامیابی کا انحصار حال ہی میں جاری کی گئی پروڈکٹس X70 اور ساگا کے حوالے سے پروٹون کی کسٹمر سروس اور اپروچ پر ہوگا۔
اب ایک CKD ساگا اور X70 کی ڈلیوری تقریباً ایک سال کے انتظار پر ہے۔ میرا ماننا ہے کہ ایک مرتبہ موجودہ پروڈکٹس (ساگا اور X70) کی اسمبلی اور ڈلیوری کا معاملہ ہموار ہو جائے تو آپریشنل لحاظ سے X50 کی پاکستان میں لانچ بُرا خیال نہیں ہے۔ اس سے صارفین کو کافی اعتماد ملے گا جبکہ پروٹون کو PK ڈومیسٹک مارکیٹ کے لیے تیسری پروڈکٹ بنانے کا حوصلہ بھی حاصل ہوگا۔ اگر کمپنی ایک وقت میں ایک ماڈل کو ڈلیور نہ کر سکے تو متعدد پروڈکٹس پیش کرنے کا کوئی فائدہ نہیں۔
خبروں کے مطابق موجودہ پروٹون ڈیلرشپ نیٹ ورک اب بھی ڈیولپمنٹ فیز میں ہے اور ان کی آفٹر سیلز سروس پر ابھی کافی سوالات موجود ہیں۔ ہمیں نہیں معلوم کہ مقامی طور پر اسمبل شدہ گاڑی ہماری دیکھی گئی CBU کے مقابلے میں کتنی اچھی ہوگی۔ ہمارا تجربہ ہے کہ CKD عموماً CBU جیسی نہیں ہوتی۔ مجھے امید ہے کہ یہ رائے CKD پروٹون ماڈل کے حوالے سے تبدیل ہوگی۔
ADP اور پروٹون:
ہمیں ذہن میں رکھنا چاہیے کہ موجودہ آٹو پالیسی جون 2021ء میں ختم ہو جائے گی (اِلّا یہ کہ اسے توسیع دے دی جائے جیسا کہ افواہیں پھیلی ہوئی ہیں)؛ اس پالیسی کے تحت 50 فیصد کم ڈیوٹی کے ساتھ CBU کے 100 یونٹس/ٹرِم مقامی لانچ کے لیے درآمد کی جا سکتے ہیں۔ اگر پالیسی ختم ہو گئی تو پروٹون X50 کے CBUs ڈیوٹی پر رعایت کے ساتھ فروخت کے لیے درآمد نہیں کر سکے گا۔ بلاشبہ وہ اپنی ریسرچ اینڈ ڈیولپمنٹ کے لیے امپورٹ کر سکتے ہیں، لیکن کمرشل فروخت کے لیے انہیں FBR ٹیکس اور کسٹمز ادا کرنا ہوگا اور یہ ان کی جیب پر ہلکا نہیں پڑے گا۔ میرے خیال میں ہو سکتا ہے خریداروں کی حیثیت سے ہمیں صرف CKD/مقامی طور پر اسمبل شدہ X50 ہی دیکھنے کو ملے اگر یہ کبھی لانچ ہوئی بھی تو۔ میرے خیال میں موجودہ صورت حال میں یہ پروٹون ملائیشیا اور الحاج پاکستان کے لیے انتظار کا مناسب وقت ہے۔
ہمیں معلوم ہے کہ C اور B-سیگمنٹ کراس اوور ہماری مارکیٹ میں آتے جا رہے ہیں جس طرح بین الاقوامی مارکیٹ میں ہو رہا ہے اور صارفین یوٹیلٹی وہیکلز کی طرف زیادہ توجہ کر رہے ہیں۔ لکی موٹرز پوژو 2008 لانے کا منصوبہ بنا رہا ہے، جبکہ اسی سیگمنٹ میں ایک کِیا برانڈ کی گاڑی کی افواہ بھی ہے (جس کی ابھی تک تصدیق نہیں ہوئی۔) X50 کی آمد بلاشبہ مارکیٹ کو بہتر بنائے گی اور صارفین کو مزید آپشنز ملیں گے اور ایک بھرپور مقابلہ شروع ہوگا، بشرطیکہ تمام ادارے اسی سمت میں قدم اٹھائیں، قیمت اور ماڈلز میں موجود سہولیات بھی یکساں ہوں، جبکہ بہترین آفٹر سیلز سروسز کے ساتھ بلٹ کوالٹی بھی بہتر ہے، اور سب سے بڑھ کر یہ کہ پریمیم/بلیک مارکیٹ/ اور جان بوجھ کر ڈیمانڈ-سپلائی کا گیپ ختم ہو۔
متوقع قیمت:
میری ذاتی رائے میں پروٹون (اگر اس نے ایک سال کے عرصے میں X50 لانچ کی تھی) اس کی قیمت 40 لاکھ کے لگ بھگ رکھے گا، اور اس سے سیڈان مارکیٹ کو مزید نقصان پہنچے گا جو پہلے ہی اسپورٹیج، ٹوسان، X70 اور MG HS جیسی گاڑیوں سے نقصان کھا رہی ہے۔ پروٹون نے اگر X50 لانچ کی تو اسے CKD X70 کی قیمت کے قریب نہیں لائے گا۔ یاد رکھیں کہ بنیادی لیول کے ایگزیکٹو ورژن کی CKD X70 کی قیمت اِس وقت 46,90,000 روپے ہے۔ مجھے امید ہے کہ جب صارفین کو ڈلیوریز کا آغاز ہوگا تب تک قیمتوں میں اضافہ نہیں ہوگا۔
سیلز اور مارکیٹنگ کی اسٹریٹجی، آفٹر سیلز سروسز، سپورٹ، صارفین کا اطمینان اور دوستانہ اور آؤ بھگت کرنے والا ڈیلر نیٹ ورک پروٹون کو کامیاب ہونے میں مدد دے گا۔
