ایم جی زیڈ ایس بمقابلہ کِیا اسپورٹیج الفا – ایک کمپیریزن

ZS کے پاکستانی مارکیٹ میں داخل ہوتے ہی ہم اس کا کِیا اسپورٹیج الفا کے ساتھ کمپیریزن یعنی تقابل کرنے جا رہے ہیں۔ ہم یہ تقابل اس لیے کر رہے ہیں کیونکہ الفا قیمت کے لحاظ سے ZS کی قریب ترین SUV ہے۔

یہ بات قابلِ ذکر ہے کہ اس تحریر میں جس ZS کا تقابل کیا جا رہا ہے وہ الیکٹرک نہیں ہے، بلکہ کمپنی کی جانب سے پیش کیا گیا پٹرول ویرینٹ ہے۔ یہ تحریر ان دو کراس اوور کومپیکٹ SUVs کے نمایاں فیچرز، تفصیلات اور آپشنز کا تقابل کرے گی۔

انجن اور ٹرانسمیشن:

‏MG ZS 1490cc کے انجن کے ساتھ آتی ہے جو 113hp اور 150Nm ٹارک پیدا کرتا ہے۔ جبکہ کِیا نے الفا میں 1999cc کا انجن لگا رکھا ہے جو 155hp اور 196Nm ٹارک پیدا کرتا ہے۔ تو یہاں اسپورٹیج الفا کو واضح برتری حاصل ہے۔

اس کے علاوہ کِیا کی SUV 6-اسپیڈ آٹومیٹک کے ساتھ آتی ہے جبکہ ZS 4-اسپیڈ آٹومیٹک ٹرانسمیشن رکھتی ہے، یہاں بھی الفا کو برتری حاصل ہے۔ دونوں گاڑیاں فرنٹ وِیل ڈرائیو (FWD) ہیں۔

ایکسٹیریئر:

دونوں SUVs ہیلوجن فرنٹ لیمپس کے ساتھ آتی ہیں، جو دونوں گاڑیوں کو اس لحاظ سے برابر کا بناتا ہے۔ اس کے علاوہ دونوں گاڑیاں 17 انچ کے الائے رِمز رکھتی ہیں۔

پارکنگ سینسرز اور ریئر کیمرا:

‏MG کی SUV پارکنگ سینسرز اور ریئر کیمرا دونوں کے ساتھ آتی ہے، جبکہ اسپورٹیج الفا میں ریئر کیمرا ہے لیکن پارکنگ سینسرز نہیں ہیں۔ اس کا مطلب ہے کہ ZS کو پارک اور ریورس کرنا زیادہ آسان ہے، اسپورٹیج الفا کے مقابلے میں۔

ایئر بیگز:

ایک طرف MG ZS میں 6 ایئر بیگز ہیں جبکہ دوسری جانب الفا میں صرف 2 ہیں، یعنی MG نے اپنی SUV کو کِیا سے کہیں زيادہ محفوظ بنایا ہے۔

انٹیریئر:

اگر انٹیریئر کی طرف آئیں تو ہمیں پتہ چلے گا کہ MG ZS ایک 8 انچ کی انفوٹینمنٹ اسکرین کے ساتھ آتی ہے، جبکہ الفا میں 7 انچ کی اسکرین ہے۔ یوں ZS میں بڑی اسکرین ہے جو کہ ڈرائیونگ کے تجربے کو زیادہ پُر لطف اور باسہولت بناتی ہے۔

اس کے علاوہ MG کی SUV میں چمڑے کی سیٹیں ہیں، جبکہ الفا میں کپڑے کی ہیں، یوں MG کی SUV کو واضح برتری ملتی ہے کہ جس کی سیٹیں زیادہ اچھی ہیں اور انٹیریئر کو ایگزیکٹو لُک دیتی ہیں۔

الیکٹرانک اسٹیبلٹی پروگرام:

‏MG ZS ایک الیکٹرانک اسٹیبلٹی پروگرام (ESP) رکھتی ہیں، جبکہ الفا یہ فیچر نہیں دیتی۔ اس کا مطلب ہے کہ MG کی گاڑی زیادہ محفوظ اور اسٹیبل ہے کیونکہ ایمرجنسی کی صورت میں اس گاڑي کے بریک چاروں پہیوں کو روک سکتے ہیں، جبکہ گاڑی کا توازن بھی برقرار رہے گا۔ یہ فیچر خاص طور پر پھسلن والی سڑکوں بہت کارآمد ہے۔

قیمت:

اب کمپیریزن میں سب سے اہم بات، MG نے اپنی SUV کی قیمت 40,99,000 روپے مقرر کی ہے، جبکہ اسپورٹیج الفا کی قیمت 43,99,000 روپے ہے۔ اس کا مطلب ہے کہ ZS الفا سے 3 لاکھ روپے سستی ہے، جو اس گاڑی کے لیے بہت مثبت بات ہے۔