پاک سوزوکی نے گاڑیوں کی قیمتوں میں 1,00,000 روپے تک کا اضافہ کر دیا

پاک سوزوکی نے اپنی گاڑیوں کی قیمتوں میں 1,00,000 روپے تک کا اضافہ کر دیا ہے۔ کمپنی نے سوزوکی کلٹس VXL، AGS اور سوزوکی سوئفٹ آٹومیٹک نیوی گیشن کی قیمتیں بڑھائی ہیں۔

نوٹیفکیشن کے مطابق کلٹس VXL کی نئی قیمت 70,000 روپے کے اضافے کے بعد 19,70,000 روپے ہوگی، جو پہلے 19,00,000 روپے تھی۔ اس کے علاوہ کلٹس AGS کی قیمت میں 1,00,000 روپے کا اضافہ کیا گیا ہے جس کی قیمت 20,30,000 روپے کے بجائے اب 21,30,000 روپے ہوگی۔

اس کے علاوہ 1.3L سوزوکی سوئفٹ آٹومیٹک نیوی گیشن کی قیمت اب 21,75,000 روپے پر 35,000 روپے کے اضافے کے بعد 22,10,000 روپے ہوگی۔

نئی قیمتیں یکم دسمبر 2020 سے لاگو ہوں گی۔

پاک سوزوکی کی جانب سے گاڑیوں کی قیمتوں میں پچھلا اضافہ:

اکتوبر میں پاک سوزوکی نے اپنی گاڑیوں کی قیمتوں میں 42,000 روپے تک کا اضافہ کیا تھا۔

کمپنی نے آلٹو، ویگن آر اور سوئفٹ کی قیمتوں میں تبدیلیاں کی تھیں۔ یہ بات قابلِ ذکر ہے کہ لوکل مینوفیکچررز قیمتوں میں اضافے کی وجہ ڈالر کی قیمت کو قرار دیتے ہیں، لیکن دلچسپ بات یہ ہے کہ پچھلے چند ہفتوں میں ڈالر کی قیمت نیچے آئی ہے۔

کمپنی کے نوٹیفکیشن کے مطابق آلٹو VXR اور آلٹو AGS کی قیمت میں 35,000 کا اضافہ ہوا ہے اور اب یہ بالترتیب 14,33,000 اور 16,33,000 روپے کی ہو گئی ہیں۔ اس کے علاوہ ویگن آر VXR کی نئی قیمت 42,000روپے کے اضافے کے بعد 15,98,000 روپے سے بڑھ کر 16,40,000 روپے تک پہنچ گئی ہے۔

پھر ویگن آر VXL اب 16,95,000 روپے کے بجائے 17,30,000 روپے کی ہو گئی ہے۔ جبکہ سوئفٹ MT کی قیمت 35,000 روپے کے اضافے کے بعد اب 20,30,000 روپے کی ہو گئی ہے، جبکہ سوئفٹ AT کی نئی قیمت 35,000 روپے کے اضافے کے بعد 21,40,000 روپے ہے۔

کمپنی پاکستان میں امریکی ڈالر کی قیمت میں کمی کے باوجود اپنی گاڑیوں کی قیمتیں بڑھا رہی ہے۔ اس سے پہلے قیمت میں ہر اضافے پر کمپنی ڈالر کے ریٹ کو اضافے کی وجہ بتاتا تھا۔ جبکہ کمپنی کو سیلز میں بھی کمی کا سامنا ہے۔ ماہرین کے مطابق کمپنی اپنے خسارے کو کم کرنے کے لیے قیمتیں بڑھا رہی ہے۔

اس کے علاوہ کمپنی مہران کے خاتمے سے پیدا ہونے والے خلاء کو اب بھی پُر کرنے میں ناکام ہے۔ گو کہ آلٹو اور کلٹس نے شروع میں اچھی پرفارمنس دکھائی تھی، لیکن ان کے حوالے سے صارفین کا جوش و خروش اب کم ہو چکا ہے۔