پاک سوزوکی نے مسلسل آٹھویں سہ ماہی میں خسارہ ظاہر کیا ہے۔ ڈیٹا کے مطابق آلٹو کی کم فروخت اور مہران کی عدم موجودگی اس زوال کی دو بنیادی وجوہات ہیں۔
کمپنی نے 2020 کی تیسری سہ ماہی میں ریونیو میں 12 فیصد کمی ظاہر کی ہے۔ ڈیٹا کے مطابق سوزوکی نے 22.60 ارب روپے کا ریونیو حاصل کیا، جو پچھلے سال کے اسی عرصے میں 25.63 ارب روپے تھا۔ یہ بڑی کمی گاڑیوں، خاص طور پر آلٹو، کی سیلز میں آنے والی کمی کی وجہ سے ہے۔
پاک سوزوکی سیلز:
کمپنی نے جولائی سے ستمبر 2020 کے دوران 17,845 یونٹس فروخت کیے، جبکہ پچھلے سال کے اس عرصے میں 23,147 یونٹس فروخت ہوئے تھے۔ کمپنی 1000cc اور 800cc کیٹیگری میں کو کِیا پکانٹو، یونائیٹڈ براوو اور پرنس پرل کی جانب سے سخت مقابلے کا سامنا ہے۔
اس کے علاوہ اپنے مالی نتائج میں کمپنی نے سہ ماہی کے دوران 136.38 ملین روپے کا خسارہ رپورٹ کیا ہے، جو 88.30 فیصد کی بحالی ہے۔ پچھلے سال کار مینوفیکچرنگ کمپنی نے 1.16 ارب روپے کا خسارہ ظاہر کیا تھا۔
اگر ہم کمپنی کے 9 مہینوں کے خسارے کو دیکھیں تو یہ 2020 میں 2.59 ارب روپے ہے، جو 2019 میں 2.68 ارب روپے تھا، جو سالانہ بنیادوں پر 3.40 فیصد کی کمی ہے۔
| ماڈلز | تیسری سہ ماہی 2019 (جولائی-ستمبر) | تیسری سہ ماہی 2020 (جولائی-ستمبر) | فرق |
| آلٹو | 12,943 | 7,651 | -41% |
| مہران | 1,249 | – | 0 |
| راوی | 1,559 | 1,723 | -10.52% |
| کلٹس | 3,589 | 3,263 | -9.31% |
| سوئفٹ | 524 | 630 | 20.23% |
| ویگن آر | 2,168 | 2,460 | 13.47% |
| بولان | 1,106 | 1,758 | 59% |
قیمتوں میں اضافہ:
اس مہینے کے شروع میں پاک سوزوکی نے اپنی گاڑیوں کی قیمتوں میں 42,000 روپے کا اضافہ کیا تھا۔ کمپنی نے آلٹو، ویگن آر اور سوئفٹ کی قیمتوں میں تبدیلیاں کی تھیں۔ یہ بات قابلِ ذکر ہے کہ لوکل مینوفیکچررز قیمتوں میں اضافے کی وجہ ڈالر کی قیمت کو قرار دیتے ہیں، لیکن دلچسپ بات یہ ہے کہ پچھلے چند ہفتوں میں ڈالر کی قیمت نیچے آئی ہے۔
کمپنی کے نوٹیفکیشن کے مطابق آلٹو VXR اور آلٹو AGS کی قیمت میں 35,000 کا اضافہ ہوا ہے اور اب یہ بالترتیب 14,33,000 اور 16,33,000 روپے کی ہو گئی ہیں۔ اس کے علاوہ ویگن آر VXR کی نئی قیمت 42,000روپے کے اضافے کے بعد 15,98,000 روپے سے بڑھ کر 16,40,000 روپے تک پہنچ گئی ہے۔ ویگن آر VXL اب 16,95,000 روپے کے بجائے 17,30,000 روپے کی ہے۔
اس کے علاوہ سوئفٹ MT کی قیمت 35,000 روپے کے اضافے کے بعد اب 20,30,000 روپے کی ہو گئي ہے، جبکہ سوئفٹ AT کی نئی قیمت 35,000 روپے کے اضافے کے بعد 21,40,000 روپے ہے۔
