پی ایس او نے پہلا الیکٹرک وہیکل چارجنگ اسٹیشن لانچ کر دیا

پاکستان اسٹیٹ آئل (PSO) نے اسلام آباد میں پہلا الیکٹرک وہیکل چارجنگ اسٹیشن لانچ کر دیا ہے۔ ایک پریس ریلیز میں کمپنی کا کہنا ہے کہ ‏PSO پاکستان کے ماحول دوست مستقبل کے لیے راستے ہموار کرتا رہے گا۔

اس سرکاری کمپنی نے یہ اسٹیشن PSO کیپری گیس اسٹیشن، F-7 اسلام آباد میں “PSO الیکٹرو” کے برانڈ نیم سے لگایا  ہے۔

تقریب میں وزیر اعظم کے خصوصی مشیر برائے پٹرولیم ندیم بابر اور وفاقی وزیر بجلی و پٹرولیم عمر ایوب خان نے مہمانِ خصوصی کی حیثیت سے شرکت کی۔

وفاقی وزیر عمر ایوب:

PSO کی خدمات کو سراہتے ہوئے وفاقی وزیر نے کہا کہ پاکستان کو ماحول کو بچانے کے لیے بڑےچیلنجز سے نمٹنے کی ضرورت ہے۔ انہوں نے کہا کہ “الیکٹرک گاڑیاں ماحول پر اچھے اثرات ڈالیں گی کیونکہ ان سے کوئی دھواں نہیں نکلتا۔” انہوں نے مزید کہا کہ حکومت نیشنل الیکٹرک وہیکل پالیسی کے تحت ملک بھر میں EV مینوفیکچرنگ فیکٹریاں لگائے گی۔

انہوں نے مزید کہا کہ “یہ وینچر روزگار کے مواقع پیدا کرے گا، جس سے پاکستان کی معیشت پر اچھا اثر پڑےگا۔”

وزیر نے یہ بھی کہا کہ اس وقت ایسے EV اسٹیشنز لگانے کے لیے امپورٹڈ ساز و سامان لگایا جا رہا ہے۔ “لیکن مجھے امید ہے کہ پاکستان کے نوجوان انجینئرز جلد ہی یہ سامان مقامی سطح پر بھی تیار کرنا شروع کر دیں گے۔”

ندیم بابر کا بیان:

تقریب سے خطاب کرتے ہوئے ندیم بابر نے کہا کہ پاکستان فضائی آلودگی میں کمی اور ماحولیاتی تبدیلی کے اثرات سے نمٹنےکے لیے آگے کی جانب بڑھ رہا ہے۔ “حکومت 30 فیصد بجلی کی پیداوار ہائیڈل پاور سے کرنے کے ساتھ ساتھ 30 فیصد بجلی حاصل کرنے کے لیے قابلِ تجدید توانائی (renewable energy) کا رخ کرنے کا بھی منصوبہ بنار ہی ہے۔” انہوں نے یہ بھی کہا کہ یہ کوششیں اور الیکٹرک وہیکل پالیسی صاف اور سبز پاکستان کی منزل حاصل کرنے میں بھرپور مدد دیں گے۔

PSO کے CEO کا بیان:

ان خیالات سے اتفاق کرتے ہوئے PSO کے MD اور CEO سید محمد طٰحہ نے کہا کہ یہ ماحولیاتی پالیسی کے حوالے سے PSO کی کوششوں میں ایک اور قدم ہے۔ انہوں نے کہا کہ “وفاقی حکومت کی رہنمائی اور مدد کے ساتھ PSO پاکستان میں ای-موبلٹی کے مستقبل کو حرکت دے رہے گا۔”

CEO نے مزید کہا کہ PSO کے لیے اگلا ہدف ماحول دوست انقلاب کے تحت اپنے اسٹیشنوں پر یورو5 فیول لانچ کرنا ہے۔