پاکستان اسٹیٹ آئل (PSO) نے اس مہینے کے آغاز پر ملک میں یورو5 فیول لانچ کیا ہے۔ حکومت نے انجن پرفارمنس کو بہتر بنانے، پاکستان میں آلودگی اور گاڑیوں سے نکلنے والے دھوئیں میں کمی کے لیے ہائی گریڈ فیول متعارف کروایا تھا۔
پاکستان نے موجودہ حکومت کی کلائمٹ کنٹرول پالیسیوں کے تحت یورو2 سے یورو5 پر اپگریڈیشن کی ہے۔ 5 اگست کو PSO نے کراچی میں اپنا پہلا یورو5 فیول اسٹیشن قائم کیا ہے۔
یورو5 فیول کے بارے میں صارفین کا تجربہ:
اب جبکہ صارفین یہ فیول استعمال کر رہے ہیں، اس لیے ہم اپنے قارئین کا ردِعمل آپ کے ساتھ شیئر کرنا چاہیں گے۔
پاک ویلز آفیشل کمیونٹی گروپ کی ایک پوسٹ میں صارفین نے بڑی تعداد میں نئے فیول کے حوالے سے مثبت رائے کا اظہار کیا ہے۔ زیادہ تر صارفین کا کہنا ہے کہ انہوں نے گاڑی کی پرفارمنس میں اچھی تبدیلیاں دیکھی ہیں۔
خریداروں کا کہنا ہے کہ اس فیول کی وجہ سے ان کی گاڑی کی پرفارمنس اور فیول ایوریج بہتر ہوا ہے۔
اس پوسٹ پر یورو5 کے بارے میں تبصرہ کرتے ہوئے ایک یوزر نے کہا کہ ان کی وِٹز 2009 ماڈل کا فیول ایوریج AC کے ساتھ 9 کلومیٹرز فی لیٹر سے بڑھ کر 15 کلومیٹرز فی لیٹر ہو چکا ہے۔
ایک اور صارف نے تبصرہ کیا کہ ان کی کرولا GLi 2010 ماڈل کا فیول ایوریج لمبے روٹ پر AC کے ساتھ 14 کلومیٹرز فی لیٹر سے بڑھ کر 18.5 کلومیٹرز فی لیٹر ہو چکا ہے۔
ایک اور یوزر نے کہا کہ ان کی ہونڈاِ سوک کا ایوریج 8 سے 8.5 سے 9.5 کلومیٹرز فی لیٹر ہو چکا ہے اور ان کی کار کا پِک بھی بہتر ہوا ہے۔
ان سے اتفاق کرتے ہوئے ایک صارف نے کہا کہ جب سے انہوں نے یورو5 استعمال کرنا شروع کیا ہے ان کی کار اچھی پرفارمنس دے رہی ہے۔
البتہ ایک صارف نے کہا کہ انہیں پرفارمنس میں کوئی فرق نظر نہیں آیا اور انہوں نے یورو5 کو مؤثر نہیں پایا۔
یورو5 کہاں دستیاب ہے؟
پاک ویلز سے بات کرتے ہوئے PSO آفیشل نے کہا کہ یورو5 ملک بھر میں مخصوص پٹرول پمپوں پر 120 روپے فی لیٹر کی قیمت پر دستیاب ہے۔ انہوں نے کہا کہ “یہ فیول تقریباً تمام شہروں میں دستیاب ہے، لیکن صرف مخصوص اسٹیشنوں پر۔”
اس کے علاوہ صارفین کا کہنا ہے کہ یورو5 ان PSO پٹرول پمپس پر دستیاب ہے جہاں پہلے ہی ہائی-اوکٹین فروخت ہوتا ہے۔
خبروں کے مطابق یورو5 ٹوٹل اور GO کے پٹرول پمپوں پر بھی دستیاب ہے۔
اس کی فروخت کا رحجان کیسا ہے؟
آفیشل کے مطابق اس اپگریڈڈ فیول کی فروخت بہت اچھی جا رہی ہے، اور یہ صارفین میں مشہور ہوتا جا رہا ہے۔ ایک آفیشل نے کہا کہ “اس کی زیادہ فروخت کی ایک وجہ اس کی قیمت ہے، کیونکہ عام پٹرول اور یورو5 کی قیمت میں بہت زیادہ فرق نہیں ہے۔”
لیکن آفیشل کا کہنا ہے کہ وہ باقاعدہ ڈیٹا نہیں دے سکتے کیونکہ اس کے لیے PSO سے تحریری درخواست کرنا ہوتی ہے۔
تو آپ بھی یورو5 کے استعمال کے حوالے سے اپنی رائے نیچے کمنٹس میں پیش کریں۔
مزید نیوز، ویوز اور ریویوز کے لیے پاک ویلز بلاگ پر آتے رہیں۔
