گزشتہ چند سالوں کے دوران مہنگی اور پرتعیش گاڑیاں بنانے والے اداروں نے ایسی گاڑیاں متعارف کروانا بھی شروع کردی ہیں جو معیار اور انداز میں بہترین لیکن قیمت میں نسبتاً سستی ہیں۔ مثال کے لیے مرسڈیز – بینز کی پیش کردہ A کلاس سیڈان CLA اور آوڈی کی A3 سیڈان دیکھی جاسکتی ہے۔ یہ دونوں ہی گاڑیاں پہلے صرف ہیچ بیک انداز میں پیش کی جاتی تھیں تاہم بعد ازاں انہیں سیڈان طرز میں بھی متعارف کروایا گیا۔ اس کا مقصد ایسے لوگوں کو متوجہ کرنا تھا کہ جو ہیچ بیک خریدتے ہوئے شرماتے ہیں یا پھر سیڈان کو ترجیح دیتے ہیں۔ چونکہ یہ گاڑیاں چھوٹی ہونے کے باوجود خصوصیات اور ٹیکنالوجی میں اتنی ہی ممتاز ہیں جتنی کے دیگر مرسڈیز یا آوڈی گاڑیاں، اسی لیے ان کی آمد ہاتھوں ہاتھ قبول کی گئی۔ ان کی مقبولیت دیکھتے ہوئے اب بی ایم ڈبلیو نے بھی اس میدان میں قدم رکھنے کا فیصلہ کیا ہے اور وہ بھی اسی طرز کی 1 سیریز سیڈان پیش کرنے کے لیے کام کر رہا ہے۔
سال 2013 میں بین الاقوامی مارکیٹ میں متعارف ہونے والی آوڈی A3 کو آوڈی پاکستان کی جانب سے گزشتہ سال پیش کیا گیا تھا۔ 1800cc انجن اور بے شمار خصوصیات کی حامل یہ گاڑی صرف 44.5 لاکھ روپے میں خریدی جاسکتی ہے۔ اس کے علاوہ 1200cc ٹربوچارجڈ انجن والی آوڈی A3 سیڈان بھی پاکستان میں دستیاب ہے۔ دنیا کے دیگر ممالک کی طرح پاکستان میں بھی آوڈی A3 کافی پسند کی گئی اور آج مختلف شاہراہوں پر رواں دواں نظر آتی ہے۔
یہ بھی پڑھیں: جنیوا موٹر شو 2016 میں دکھائی جانے والی 10 بہترین سُپر کارز
آوڈی نے اپنی بہترین اور سب سے زیادہ فروخت ہونے والی سیڈان اور ہیچ بیک کا نیا انداز (فیس لفٹ) متعارف کروایا ہے۔ اس بار نہ صرف گاڑی کے بیرونی حصے بلکہ اندرونی حصوں میں بھی قابل ذکر تبدیلیاں کی گئیں ہیں۔ ظاہری حصے میں اگلی جانب آوڈی کی مشہور ایل ای ڈی میٹرکس سیکوئنشل لائٹس اور عقب میں ٹیل لائٹس میں تبدیلی محسوس کی جاسکتی ہے۔ اگلے حصے میں گِرل کو بھی تبدیل کیا گیا ہے جو نئی آوڈی A4 سیڈان سے ملتی جلتی ہے۔ گاڑی کے اندر نظر ڈالیں تو یہاں 12.3 انچ کا نیا ڈیجیٹل ڈسپلے نظر آئے گا۔ آوڈی نے اندرونی حصے کو “ورچوئل کاکپٹ” کا نام دیا ہے جس میں ڈرائیور صاحبان اپنی پسند کے مطابق تبدیلیاں کرسکتے ہیں۔ یہ سہولت گاڑی کے بہترین ماڈلز (upper and standard) میں دستیاب ہوگی جبکہ عام (base) ماڈل میں اختیاری ہوگی۔ ڈیش بورڈ میں آوڈی کا مشہور ملٹی میڈیا انٹرفیس MMI بھی 7 انچ اسکرین کے ساتھ دستیاب ہے۔ اس کے ساتھ ایپل کار پلے اور اینڈرائیڈ آٹو دونوں ہی استعمال کیے جاسکتے ہیں۔
آوڈی نے پہلے سے موجود حفاظتی سہولیات میں مزید نئی خصوصیات شامل کی ہیں۔ ان میں مخصوص لین پر گاڑی چلانے میں مدد، کسی شخص یا چیز سے ٹکراؤ سے بچانے کے لیے ایمرجنسی بریکس اور کروز کنٹرول جیسی خصوصیات شامل ہیں۔ دستیاب انجن کی فہرست میں بھی اضافہ کیا گیا ہے اور اب خریدار پیٹرول اور ڈیزل پر چلنے والے تین مختلف ٹربو چارجڈ انجن میں سے کوئی بھی ایک منتخب کرسکیں گے۔ سب سے دلچسپ بات تو یہ ہے کہ اب آوڈی A3 کو 1000cc ٹربوچارجڈ 3 سلینڈر انجن کے ساتھ بھی پیش کیا جائے گا۔ یہ انجن 115 ہارس پاور اور 200 نیوٹن میٹر ٹارک فراہم کرسکے گا۔ یہ بات ابھی واضح نہیں کہ آیا اس انجن کو سیڈان اور ہیچ بیک دونوں یا کسی ایک انداز میں پیش کیا جائے گا۔ آوڈی کا دعوی ہے کہ چھوٹے انجن کے ساتھ بھی آپ ڈرائیونگ کا بھرپور لطف اٹھاسکیں گے۔
اس کے علاوہ 1400cc ٹی ایس ایف آئی 4 سلینڈر انجن بھی دستیاب ہے۔ اس کی رفتار 150 ہارس پاور اور ٹارک 250 نیوٹن میٹر ہوگا۔ اسے سلینڈر آن ڈیمانڈ تکنیک سے آراستہ کیا گیا ہے جس کی مدد سے 2 سلینڈر صرف ضرورت کے وقت ہی کام کریں گے۔ اس فہرست میں شامل تیسرا پیٹرول انجن 2000c ٹی ایس ایف آئی ہے۔ یہ 190 ہارس پاور اور 320 نیوٹن میٹر ٹارک فراہم کرے گا۔ ڈیزل پر چلنے والی انجن 1600cc ،1800cc اور 2000cc دستیاب ہوں گے۔ 1600cc انجن 6 اسپیڈ مینوئل یا آوڈی کے نئے 7 اسپیڈ ڈیول کلچ ٹرانسمیشن (DSG) کے ساتھ منسلک ہو کر 110 ہارس پاور فراہم کرے گا۔
یہ بھی پڑھیں: جیلی GC9: چین میں سال 2016 کی بہترین گاڑی قرار
آوڈی نے S3 سیڈان کے اسپورٹس ورژن کو بھی جدت سے ہم آہنگ کیا ہے۔ اس میں 2000cc پیٹرول انجن شامل ہے جو 310 ہارس پاور (جو کہ پہلے صرف 300 ہارس پاور تھی) فراہم کرسکے گا۔ صرف یہی نہیں بلکہ آوڈی A3 ہائبرڈ ورژن میں بھی دستیاب ہے جسے “A3 اسپورٹ بیک ای-ٹرون” کا نام دیا گیا ہے۔ اس میں 1400cc ٹی ایس ایف آئی انجن کو برقی موٹر کے ساتھ لگایا گیا ہے۔ یہ دونوں مجموعی طور پر 204 ہارس پاور فراہم کرسکیں گے۔ اس میں 8.8 کلوواٹ فی گھنٹہ بیٹری استعمال کی جائے گی جسے 110 یا 220 وولٹ سے چارج کیا جاسکے گا۔
آوڈی A3 کے تمام ماڈلز میں ٹرانسمیشن بھی بہتر کیا گیا ہے۔ آوڈی نے 6-اسپیڈ ڈیول کلچ ٹرانسمیشن (DSG) کی جگہ نیا 7-اسپیڈ DSG لگایا ہے۔ چند ماڈلز کے ساتھ نیا 6-اسپیڈ مینوئل گیئر بھی دستیاب ہوگا۔
مجموعی طور پر A3 کے نئے انداز کو آوڈی کی دیگر گاڑیوں سے ہم آہنگ رکھا گیا ہے۔ آوڈی نے ثابت کردیا ہے کہ کم بجٹ میں بھی عمدہ چیزیں پیش کی جاسکتی ہیں۔ یہی وجہ ہے کہ A3 سیڈان دنیا کی بہترین گاڑی برائے سال 2015 کا تاج اپنے سر پر سجانے میں کامیاب ہوئی۔ اسے چند ماہ بعد یورپی مارکیٹ میں فروخت کے لیے پیش کردیا جائے گا۔ آوڈی A3 کا عام (base) ماڈل 1000cc ٹی ایف ایس آئی انجن کے ساتھ جرمنی میں 23,300 یوروز میں دستیاب ہوگا۔
پاکستان میں جرمن کار ساز کمپنی آوڈی روایتی حریف مرسڈیز کو پیچھے چھوڑتے ہوئے صارفین کی توجہ حاصل کرنے میں کامیاب رہی ہے۔ آوڈی پاکستان کی عمدہ حکمت عملی کا نتیجہ ہے کہ اب پاکستان میں اسے ایک معتبر اور قابل بھروسہ کار ساز ادارے کے طور پر پہچانا جاتا ہے۔ اب دیکھنا ہوگا کہ آوڈی A3 کا نیا انداز کب یہاں پیش کیا جاتا ہے اور اسے مارکیٹ میں کس قدر پزیرائی حاصل ہوتی ہے۔
