گاڑیوں کے معروف انگریزی بلاگ jalopnik اور نامور ڈیزائنر اسکاٹ پارک نے گزشتہ 50 سالوں کی 50 مشہور ترین گاڑیوں سے متعلق ایک شاندار ویڈیو پیش کی ہے۔ یہ اینی میشن ویڈیو دراصل ان گاڑیوں کو خراج تحسین پیش کرنے کے لیے بنائی گئی ہے جنہیں ٹیلی ویژن سیریز اور فلموں میں استعمال کیا گیا۔ مجھے امید ہے کہ گاڑیوں کے شوقین افراد اس ویڈیو کو ضرور پسند کریں گے۔
1966 سے 2016 تک چھوٹی اور بڑی اسکرین پر نظر آنے والی ان گاڑیوں میں سے کئی ایک کو پاکستان میں بھی کافی مقبولیت حاصل ہوئی۔ ان میں سب سے مشہور نائٹ رائیڈر ٹیلی ویژن سیریز میں دکھائی جانے والی KITT کو قرار دیا جائے تو غلط نہ ہوگا۔ اس کے علاوہ گون اِن 60 سیکنڈز میں استعمال ہونے والی ایلینور (Eleanor ) بھی پسندیدہ ترین گاڑیوں میں سے ایک رہی۔ جی ٹی 500 فورڈ مستنگ جیسی ایلینور کو فلم کے مرکزی کردار نیکولس کیج استعمال کرتے رہے اور یہی اس کی وجہ شہرت بنی۔ اس فہرست میں شامل سب سے نئی گاڑی میڈ میکس کی فلم فیوری روڈ میں استعمال ہونے والی گیگا ہارس ہے۔ گیگا ہارس ایک دیوقامت مشین کی طرح دکھائی گئی ہے۔ اسے فلم کا وِلن امورٹن جوائے دوسرے کردار میکس کا پیچھا کرنے کے لیے استعمال کرتا ہے۔
تو ابھی اس دلچسپ اور مختصر سی ویڈیو کو دیکھیں اور بتائیں کہ آپ کتنی گاڑیوں کو پہچان پائے۔ ان میں سے ذاتی طور پر مجھے 70 کی ڈوج چیلنجر پسند آئی جو1971 میں فلم ونیشنگ پوائنٹ میں استعمال کی گئی تھی۔ ویڈیو کے آخر میں مشہور ترین 50 گاڑیوں کے علاوہ بھی چند منفرد گاڑیوں سے متعلق بھی بتایا گیا ہے جو اپنے وقتوں میں کافی زیر بحث رہیں۔
