نیشنل یونیورسٹی آف سائنس اینڈ ٹیکنالوجی (NUST) میں منعقدہ دوسری آٹو موٹیو کانفرنس سے خطاب کرتے ہوئے جناب صدر ممنون حسین نے کہا ہے کہ تخلیقی صلاحیتوں اور جدید ٹیکنالوجی کا استعمال صنعتوں کی ترقی اور استحکام کے لیے کلیدی حیثیت رکھتا ہے۔ انہوں نے مزید کہا کہ پاکستان میں گاڑیوں کے شعبے میں ترقی کی بھرپور صلاحیت موجود ہے اور ہم اس شعبے پر توجہ دے کر آئندہ سالوں میں نہ صرف لاکھوں افراد کو روزگار فراہم کرسکتے ہیں بلکہ پاکستان کی مجموعی ترقی میں اس کی افادیت کو بڑھا سکتے ہیں۔
صدرِ پاکستان نے اس حقیقت کو تسلیم کیا کہ گاڑیوں کا شعبہ نہ صرف معیشت کے لیے ایک اہم ستون کا کام کر رہا ہے بلکہ دیگر شعبوں جیسے معدنیات، کپڑے اور فولاد کے شعبوں کا بھی معاون ہے۔ انہوں نے تمام اسٹیک ہولڈرز اور پالیسی سازوں کو مخاطب کرتے ہوئے شعبے کی ترقی کے لیے جامع حکمت عملی ترتیب دینے پر زور دیا۔
یہ بھی پڑھیں: نئی آٹو پالیسی پر جاپانی اور یورپی اداروں کے درمیان رسہ کشی کا آغاز
صدر مملکت نے آلودگی کے مسئلے سے بچنے کے لیے ماحول دوست گاڑیوں کے فروغ پر بھی زور دیا۔ انہوں نے نوجوانوں کی حوصلہ افزائی کرتے ہوئے کہا کہ پاکستان کا مستقبل مضبوط اور قابل ہاتھوں میں ہے البتہ ضرورت اس امر کی ہے کہ ان کی صلاحیتیں درست سمت میں استعمال کی جائیں۔ تقریب میں موجود طالب علموں کو مخاطب کرتے ہوئے انہوں نے کہا کہ اپنی تعلیم پر مکمل توجہ دیں اور مستقبل میں ملک کی باگ ڈور سنبھالنے کی ذمہ داری اٹھانے کے لیے خود کو تیار کریں۔
اس موقع پر صدر مملکت نے نسٹ-ڈائس آٹو موٹیو انویشن سینٹر کا افتتاح کیا اور نمائش کا بھی دورہ کیا۔ ڈائس آٹو موٹیو پاکستان کے چیئرمین جناب ڈاکٹر عبدالغفور، نسٹ کے ناظم ڈاکٹر خورشید قریشی اور پاکستان ایسوسی ایشن آف آٹوموٹیو پارٹس اینڈ ایکسسریز مینوفیکچررز (پاپام) نے بھی تقریب سے خطاب کیا۔
