فراری F12 برلنیتا کے جدید انجن اور ریس ٹریک کے لیے بنائے گئے انجن F12tdf پر بہت پرجوش نظر آ رہا ہے۔ اس کی تازہ مثال انجن کے مکینکی خدوخال اور تکنیک کو بیان کرنے والی ویڈیو ہے جو فراری کی جانب سے پیش کی گئی ہے۔ یہ انجن عام F12 سے لیا گیا ہے لیکن فراری کی گاڑیوں میں بہتری کے لیے بنائے گئے خصوصی شعبے نے اس کی کارکردگی کو مزید بڑھا دیا ہے۔ اس ویڈیو میں انہی چیزوں پر خصوصی روشنی ڈالی گئی ہے۔
یہ 6300 سی سی (حقیقت میں 6262 سی سی) V12 موٹر انجن ہے جو 770 براک ہارس پاور فراہم کرتا ہے۔ اس انجن کی حامل گاڑی صرف 3 سیکنڈز میں 0 سے 100 کلومیٹر کی رفتار حاصل کرسکتی ہے جبکہ اس کی زیادہ سے زیادہ رفتار 211 میل فی گھنٹہ ہے۔ فراری F12tdf میں دہرا کلچ بھی لگایا گیا ہے جو عام ٹرانسمیشن سے زیادہ تیزی ہے۔
اس انجن میں شامل تمام اجزا کے وزن پر خصوصی توجہ دی گئی ہے اور انہیں ہلکا رکھا گیا ہے۔ انجن کے وزن میں کمی کا براہ راست اثر گاڑی کے وزن میں کمی اور رفتار میں اضافے پر پڑتا ہے۔ انجن کے اوپری حصے میں شامل ایئرباکس زیادہ چوڑا لیکن وزن میں کم ہے۔ دلچسپ بات یہ ہے کہ اس انجن میں ہوا کھیچنے کا نظام گاڑی اور انجن کی رفتار و دباؤ سے منسلک کردیا گیا ہے۔ ذیل میں موجود ویڈیو دیکھ کر بھی آپ مزید بہتر ہونے والی چیزوں سے متعلق جان سکتے ہیں۔
