عالمی سطح پر دسویں جنریشن ہونڈا سِوک کی آمد سے ہی ہم پاک ویلز کے قارئین کو سِوک 2016 سے متعلق اہم خبروں اور معلومات سے وقتاً فوقتاً آگاہ کرتے رہے ہیں۔ یہ سلسلہ پاکستان میں سِوک 2016 کی آمد کے بعد بھی جاری ہے جس کی بنیادی وجہ پاکستان میں ہونڈا سِوک کا شدت سے انتظار اور زبردست پزیرائی ہے۔ اس کا اندازہ صرف 10 روز میں 5000 سِوک بُک کیے جانے سے بخوبی لگایا جاسکتا ہے۔ یہ تعداد ہونڈا ایٹلس کی توقعات سے پانچ گنا زیادہ ہے اور اضافی بُکنگ کی وجہ سے سِوک کی صارفین کو دستیابی کا دورانیہ بھی چار ماہ ہوچکا ہے۔ علاوہ ازیں عوام کی بڑھتی ہوئی مقبولیت کے سبب گزشتہ سوموار کو سِوک ٹربو کی بُکنگ بھی بند کردی گئی تھی۔
مزید پڑھیں: صرف 10 روز میں 5000 ہونڈا سِوک بُک ہوگئیں!
ڈیلرشپس کی جانب سے نئی سِوک (Honda Civic 2016) کی بُکنگ شروع کیے جانے کے باوجود ہونڈا ایٹلس کی طرف سِوک 2016 کی پاکستان آمد سے متعلق تفصیلات فراہم کرنے سے گریز کیا جارہا تھا۔ لیکن اب ہونڈا ایٹلس نے چپ کا روزہ توڑتے ہوئے نہ صرف سِوک کی تعارفی قیمت کا اعلان کردیا ہے بلکہ ڈیلرشپس کو سِوک ٹربو کی بُکنگ دوبارہ شروع کرنے کے احکامات بھی جاری کردیئے ہیں۔ہونڈا ایٹلس کی جانب سے ڈیلرشپس کو بھیجے گئے خط کی نقل آپ ذیل میں ملاحظہ کرسکتے ہیں۔
ہونڈا ایٹلس (Honda) کے اعلان سے قبل سِوک کی قیمت کے حوالے سے مختلف افواہیں گردش کرتی رہی ہیں تاہم تازہ ترین اعلامیے میں حیرت انگیز طور پر سِوک کے دونوں ہی ماڈلز کی تعارفی قیمت کم رکھی گئی ہیں۔ ہونڈا ایٹلس نے نئی سِوک ٹربو کی قیمت 28 لاکھ 50 ہزار روپے جبکہ R18 انجن کی حامل سِوک اورئیل کی قیمت 26 لاکھ 50 ہزار روپے مقرر کی ہے۔ ڈیلرشپس کو بھیجے جانے والے خط میں نئے بجٹ کی آمد اور ٹیکسز میں ممکنہ ردو بدل کو قیمتوں کے اعلان میں تاخیر کی وجہ بتایا گیا ہے۔ اس کے علاوہ ہونڈا نے دونوں ہی ماڈلز کی بُکنگ پر وصول کی جانے والی پیشگی ادائیگی کی رقم بھی بڑھا دی ہے۔ اب سِوک اورئیل بُک کروانے کے لیے 12 لاکھ 50 ہزار روپے جبکہ سِوک ٹربو بُک کروانے کے لیے 15 لاکھ روپے ادا کرنا ہوں گے۔ نئی سِوک 2016 کے ماڈلز میں شامل خصوصیات کی فہرست ذیل میں موجود ہے۔
یہ بھی پڑھیں: پاکستان میں پیش کردہ ہونڈا سِوک 2016 سے متعلق تمام معلومات
علاوہ ازیں ٹربو انجن کی حامل سِوک میں صرف 91 ریسرچ آکٹین نمبر کا ایندھن استعمال کرنے کی تجویز دی گئی ہے۔ یاد رہے کہ پاکستان میں دستیاب پیٹرول 87 جبکہ ہائی آکٹین 95 نمبر پر شمار کیا جاتا ہے۔ ہونڈا سِٹی سیلز نامی ڈیلر شپ نے اس حوالے سے تحفظات کا اظہار کرتے ہوئے کہا ہے کہ مخصوص ایندھن کی طلب اور فراہمی کے وقت میں اضافے سے لوگوں میں عدم دلچسپی اور بُکنگ میں کمی کا امکان بڑھ گیا ہے۔
