گزشتہ ہفتے ہونڈا سِوک 2016ء کی باضابطہ رونمائی نے گاڑیوں کے شوقین افراد میں بہت سے مباحث کو جنم دیا جس میں حسب توقع ٹویوٹا کرولا سے اس کا تقابل بھی شامل ہے۔ ہونڈا سِوک سے متعلق مکمل تفصیلات ابھی پوری طرح سامنے نہیں آئیں لیکن ہمارا وعدہ ہے کہ جیسے جیسے ہمیں اس سے متعلق مزید خبریں ملتی رہیں گی ویسے ویسے ہم اپنے قارئین کو بھی آگاہ کرتے رہیں گے۔
البتہ یہاں ہم ہونڈا سِوک 2016ء اور ٹویوٹا کرولا 2015ء کا مختلف انداز سے تصویری جائزہ لے رہے ہیں۔
ٹویوٹا کرولا 2015ء کی دستیابی اگلے سال بھی جاری رہنے کی توقع ہے۔ گوکہ نئی ٹویوٹا کرولا 2016ء امریکہ اور دیگر بہت سے ممالک میں دستیاب ہے تاہم اسے پاکستان میں پیش کیے جانے کے امکانات بہت کم ہیں۔
یہاں کیے گئے موازنے میں ایک طرف سِوک سیڈان کو شامل کیا گیا ہے (کیوں کہ آئندہ سال ستمبر میں پاکستان آنے کی توقع ہے) اور دوسری طرف 1800 سی سی انجن والی ٹویوٹا کرولا کو رکھا گیا ہے جو رفتار کے اعتبار سے اول الذکر کی ہم پلہ ہے۔ چونکہ کرولا کی تمام گاڑیاں پیمائش کے اعتبار سے ایک سی ہیں اس لیے کرولا CVT ٹرانسمیشن کا تقابل سِوک CVT ٹرانسمیشن سے کرنا زیادہ مناسب ہے۔
