یہ کہنا غلط نہ ہوگا کہ پاکستان میں ہونڈا سِوک 2016 کی آمد کا جشن بھرپور جوش و خروش سے منایا جارہا ہے۔ نہ صرف ہونڈا کے مداحوں بلکہ پاکستان بھر میں موجود گاڑیوں کے شوقین افراد دسویں جنریشن سِوک کا شدت سے انتظار کر رہے تھے۔ یہی وجہ ہے کہ آج آن لائن اور آف لائن اگر کسی گاڑی کا چرچہ ہے تو وہ صرف اور صرف ہونڈا سِوک ہی ہے۔ اس موقع پر خیال آیا کہ کیوں نہ پاکستان میں سِوک کی تاریخ سے متعلق قارئین کو بتایا جائے۔ تو آئیے سِوک کے ماضی، حال اور مستقبل پر پر ایک نظر ڈالتے ہیں۔
یہ بھی پڑھیں: پاکستان میں ہونڈا سِوک کے نئے عہد کی شروعات
ہونڈا سِوک کی پانچویں جنریشن (1994-1995)
گو کہ ہونڈا سِوک کی پانچویں جنریشن سال 1991 سے 1995 تک عالمی سطح پر پیش کی جاتی رہی تاہم پاکستان میں اس کی آمد 1994 میں ہوئی۔ اس وقت یہ 1500cc انجن اور مینوئل گیئر کے ساتھ ہی پیش کی جاتی تھی۔ مشہور ہالی ووڈ فلم سیریز فاسٹ اینڈ فیوریس کی پہلی فلم میں دکھائے جانے کے بعد دیگر ممالک کی طرح پاکستان میں بھی اس کی مقبولیت میں زبردست اضافہ دیکھا گیا۔
ہونڈا سِوک کی چھٹی جنریشن (1996-2000)
سال 1996 میں پہلی بار ہونڈا سِوک کو 3 مختلف ماڈلز LXi، EXi اور VTi کے ساتھ پیش کیا گیا۔ ان میں LXi سب سے سادہ ماڈل تھا اور اسی وجہ سے بہت تعداد میں فروخت ہوا۔ جبکہ سِوک VTi کی مقبولیت سب سے زیادہ رہی۔ اس زمانے میں سِوک کو اپنے روایتی حریف ٹویوٹا کرولا سے بہتر سمجھا جاتا تھا۔ چھٹی جنریشن ہونڈا سِوک میں دو انجن 1500cc اور 1600cc متعارف کروائے گئے تھے۔ دونوں ہی انجن کے ساتھ مینوئل اور آٹومیٹک گیئر منسلک کرنے کا انتخاب موجود تھا۔ ہونڈا سِوک 2000 آج بھی سب سے زیادہ پسند کی جانے والی گاڑیوں میں شمار کی جاتی ہے۔
ہونڈا سِوک کی ساتویں جنریشن (2001-2005)
پرانی جنریشنز کے مقابلے میں سِوک کی ساتویں جنریشن ڈیزائن کے اعتبار سے بہت زیادہ مختلف تھی۔ نہ صرف ظاہری انداز سے بلکہ اندرونی حصے کو بھی پہلے سے بہت زیادہ بہتر بنایا گیا تھا۔ اس جنریشن میں بھی 1500cc اور 1600cc انجن کے ساتھ مینوئل اور آٹومیٹک گیئر باکس فراہم کیے جاتے رہے۔ ساتویں جنریشن ہونڈا سِوک کو بہت جلد ایک فیملی سیڈان کے طور پر پسند کیا جانے لگا۔
نئی ہونڈا سِوک آسان اقساط پر حاصل کرنے کے لیے یہاں کلک کریں
ہونڈا سِوک کی آٹھویں جنریشن (2006-2012)
اس بار ہونڈا سِوک کو ایک نئی جہت سے متعارف کروایا گیا۔ گاڑی کے اگلے حصے کو مزید چوڑا کیا گیا جس سے ڈیش بورڈ کے سائز میں بھی واضح اضافہ ہوا۔ اس کا مقصد خطرناک حادثے کی صورت میں مسافروں کی حفاظت ممکن بنانا تھا۔ اس جنریشن میں ہونڈا سِوک R18 انجن کے ساتھ پیش کی گئی۔ یہ 1800cc انجن لگ بھگ 140 ہارس پاور فراہم کرنے کی اہلیت رکھتا تھا۔ اس انجن کے ساتھ مینوئل اور آٹومیٹک گیئر باکس منسلک کرنے کا انتخاب بھی موجود تھا۔ آٹھویں جنریشن ہونڈا سِوک کو بہترین گرفت کی وجہ سے کافی شہرت حاصل ہوئی۔
ہونڈا سِوک کی نویں جنریشن (2012-2016)
رواں سال اپنے اختتامی دور میں داخل ہونے والی ہونڈا سِوک کی نویں جنریشن تقریباً 4 سال قبل پیش کی گئی تھی۔ نویں جنریشن کی آمد سے ایسا محسوس ہوا کہ ہونڈا پچھلی جنریشن سے حاصل ہونے والی مقبولیت پر پانی پھیرنا چاہتا ہے۔ ظاہری انداز سے یہ گاڑی ساتویں جنریشن سے ملتی جلتی تھی اور اسی وجہ سے اکثر لوگوں نے اسے زیادہ پسند نہیں کیا۔ اس میں بھی R18 انجن ہی پیش کیا گیا تاہم اس کی رفتار میں بہت معمولی اضافہ (141 ہارس پاور) ہوا۔ پچھلی جنریشن کی طرح اس بار بھی مینوئل اور آٹومیٹک گیئر باکس کا انتخاب موجود رہا۔
ہونڈا سِوک کی دسویں جنریشن (سال 2016 سے شروعات)
یہاں سے ماضی کا قصہ تمام ہوتا ہے اور ایک نئے عہد کی شروعات ہوتی ہے۔ ہونڈا ایٹلس نے بالآخر نئی ہونڈا سِوک 2016 (جسے لوگ ہونڈا سِوک X بھی کہتے ہیں ) کی پاکستان میں باقاعدہ رونمائی کردی ہے۔لیکن سِوک کا چرچہ اس رونمائی سےکئی ہفتوں پہلے ہی شروع ہوچکا تھا۔ بالخصوص ہونڈا ڈیلرشپس پر پیشگی بُکنگ شروع کیے جانے کے بعد سے عوام میں اس گاڑی کو دیکھنے کی خواہش مزید زور پکڑ چکی تھی۔ اس بار ہونڈا ایٹلس نے نہ صرف ڈیزائن بلکہ بین الاقوامی معیار کے مطابق گاڑی پیش کرنے کی کوشش کی ہے۔
یہ بھی پڑھیں: کیا نئی “ہونڈا سِوک 1.5 ٹربو” اسپورٹس کار کہلانے کی حقدار ہے؟
دسویں جنریشن ہونڈا سِوک کی سب سے خاص بات ٹربو انجن کی پیش کش ہے۔ ہونڈا سِوک کو 1.5 ٹربو انجن کے ساتھ بھی پیش کیا جارہا ہے جو 170 سے زائد ہارس پاور فراہم کرسکتا ہے۔ جن لوگوں کو پچھلی جنریشن سِوک میں شامل انجن پسند ہے ان کے لیے بھی نئی سِوک 1.8 اوریئل دستیاب کی گئی ہے۔ تاہم اس بار مینوئل اور آٹومیٹک گیئر کے بجائے تمام ہی ماڈلز میں CVT گیئر باکس فراہم کیا جارہا ہے۔
اب دیکھنا یہ ہے کہ نئی ہونڈا سِوک (Honda Civic 2016) پاکستان میں کتنی مقبولیت حاصل کرپاتی ہے۔
